ۇكىمەت باسشىسى قازىرگى ۋاقىتتا كاسىپورىندا كەنشىلەردىڭ ولىمىنە بايلانىسى تەرگەۋ جۇرگىزىلىپ جاتقانىن ەسكە سالدى.
«وتكەن جىلدىڭ قاراشا ايىندا قايعىلى وقيعا سالدارىنان 4 شاحتەر قازا تاپقان بولاتىن. بۇل جاعداي بويىنشا تەرگەۋ اياقتالدى, جاۋاپكەرلەر قازىر ماتەريالدارمەن تانىسىپ جاتىر. جاقىن ارادا ولار سوتقا جىبەرىلەدى. تامىز ايىندا دا قايعىلى وقيعا ورىن الىپ, تاعى 5 شاحتەر قازا تاپتى. ول بويىنشا تەرگەۋ ءجۇرىپ جاتىر, ءالى اياقتالعان جوق. سوڭعى فاكتى بويىنشا جان-جاقتى تەرگەۋ جۇرگىزىلىپ, كىنالى ادامداردىڭ بارلىعى جاۋاپقا تارتىلادى», دەدى ءاليحان سمايىلوۆ.
ونىڭ سوزىنشە, ۇكىمەتتىڭ جۋىق اراداعى مىندەتى – بۇل كومپانيانىڭ قازاقستان رەسپۋبليكاسىنا قايتارىلۋىن قامتاماسىز ەتۋ.
«كاسىپورىنداعى جالاقى مەن جۇمىس ورىندارىنىڭ ساقتالۋى, بارلىق الەۋمەتتىك مىندەتتەمەنىڭ, ونىڭ ىشىندە كەنشىلەر قازا بولعاننان كەيىن تۋىنداعان مىندەتتەمەلەردىڭ ورىندالۋىن قامتاماسىز ەتۋ. ولاردىڭ تولىق ورىندالۋىن قاداعالايتىن بولامىز», دەدى پرەمەر-مينيستر.
ۇكىمەت باسشىسى كومپانيانى قازاقستان رەسپۋبليكاسىنا قايتارۋ تۋرالى الدىن الا مامىلەگە سايكەس, ونىڭ ەگجەي-تەگجەيىن جاريا ەتۋگە بولمايتىنىن ايتتى.
«ول تۋرالى مامىلە اياقتالعاننان كەيىن, ءبىر ايدىڭ ىشىندە حابارلانادى. 30 قاراشاعا دەيىن قايتارۋدىڭ بارلىق زاڭدى ءراسىمىن اياقتاۋىمىز كەرەك», دەدى ءاليحان سمايىلوۆ.
قورىتىندىلاي كەلە پرەمەر-مينيستر مەملەكەتتىڭ «ارسەلورميتتال تەمىرتاۋ» اق-نىڭ مەنشىك يەسى بولۋ جانە وعان بيۋدجەت قاراجاتىن ءبولۋ جوسپارى جوق ەكەنىن اتاپ ءوتتى.
ء«بىز الداعى 3 جىلدا كەمىندە 3 ملرد دوللار ينۆەستيتسيالاۋعا دايىن جەكە ينۆەستوردى تارتۋىمىز كەرەك. ونىڭ شامامەن 1,3 ملرد دوللارىن بىردەن قۇيۋ قاجەت, ويتكەنى كاسىپورىنداعى قازىرگى جاعداي ونەركاسىپتىك قاۋىپسىزدىك پەن جابدىقتى جاڭعىرتۋ ماسەلەلەرىن تەز ارادا شەشۋدى تالاپ ەتەدى. بۇل قازاقستاندىق ينۆەستور بولادى دەپ جوسپارلاپ وتىرمىز», دەپ تۇيىندەدى ول.
