پرەمەر-ءمينيستردىڭ ورىنباسارى ءوز سوزىندە ەكى ەل اراسىنداعى سىندارلى ديالوگتى قۇرۋداعى ۇكىمەتارالىق كوميسسيانىڭ تيىمدىلىگىن اتاپ ءوتتى.
سەرىك جۇمانعارين رەسەي قازاقستاننىڭ ءىرى ساۋدا سەرىكتەسى ەكەنىن, وتكەن جىلدىڭ قورىتىندىسى بويىنشا ەكىجاقتى تاۋار اينالىمى 9,5%-عا ءوسىپ, 27 ملرد دوللارعا جەتكەنىن اتاپ ءوتتى. 2023 جىلدىڭ قاڭتار-تامىز ايلارىنىڭ قورىتىندىسى بويىنشا ەكى ەل اراسىنداعى ساۋدا كولەمى 17 ملرد دوللاردى قۇرادى, بۇل وتكەن جىلدىڭ سايكەس كەزەڭىمەن سالىستىرعاندا 1,1%-عا جوعارى.
بۇگىندە رەسەيلىك كومپانيالار قازاقستان ەكونوميكاسىنا قۇيعان قارجى كولەمى بويىنشا باستى ينۆەستورلاردىڭ بەستىگىنە كىرەدى, سوڭعى 17 جىلدا رەسەيلىك ينۆەستيتسيالار اعىنى 19 ملرد دوللاردى قۇرادى. ءوز كەزەگىندە رەسەيگە قۇيىلعان قازاقستاندىق ينۆەستيتسيالار 5,6 ملرد دوللاردان استى.
وتىرىستا تاراپتار كولىك-ترانزيت سالاسىنداعى ءوزارا ءىس-قيمىلدى كەڭەيتۋدىڭ ماڭىزدىلىعىن, ونىڭ ىشىندە ەكى ەل اۋماعى بويىنشا ترانزيتتىك تاسىمالداردى ۇلعايتۋدىڭ, اۆتوجول ينفراقۇرىلىمىن بىرلەسىپ دامىتۋدىڭ جانە قازاقستان-رەسەي شەكاراسىنداعى وتكىزۋ پۋنكتتەرىن جاڭعىرتۋدىڭ ماڭىزدىلىعىن اتاپ ءوتتى. وتىرىسقا قاتىسۋشىلار اۋىل شارۋاشىلىعى سالاسىندا ەكى ەلدىڭ ۆەتەرينارلىق جانە فيتوسانيتارلىق قاداعالاۋ سالاسىندا اقپاراتتىق ينتەگراتسيالاۋ جونىندەگى جۇمىستى جالعاستىرۋ قاجەتتىگىنە نازار اۋداردى.
رەسەي تاراپى ءوز كەزەگىندە تسيفرلىق سالاداعى ءوزارا ءىس-قيمىلدى دامىتۋعا قىزىعۋشىلىق ءبىلدىردى.
«تسيفرلاندىرۋ سالاسىنداعى رەسەي-قازاقستان ىنتىماقتاستىعىنىڭ زور الەۋەتىنە سەنىمدىمىز. اقپاراتتىق تەحنولوگيالار جونىندەگى كوميسسيا شەڭبەرىندە ءوزارا ءىس-قيمىلدى جالعاستىرۋعا ءۇمىتتىمىز. بۇگىندە رەسەيلىك ماركەتپلەيستەردە شامامەن 120 مىڭ قازاقستاندىق جەتكىزۋشى تىركەلگەن جانە ولاردىڭ سانى ارتىپ كەلەدى. وسىلايشا ەلدىڭ لوگيستيكالىق ينفراقۇرىلىمى مەن جەرگىلىكتى كاسىپكەرلىك دامۋدا», دەپ اتاپ ءوتتى الەكسەي وۆەرچۋك.
وتىرىستا تاراپتار ەلەكتر قۋاتى جانە مۇناي-گاز سالالارىنداعى ىنتىماقتاستىقتى ودان ءارى دامىتۋ جوسپارلارىن تالقىلادى, بىرقاتار جاڭا باستاماعا نازار قويدى.
اۋە كولىگى سالاسىندا دا قازاقستان مەن رەسەي ءوزارا اۋە قاتىناسىن كەڭەيتۋگە كەلىستى. اتاپ ايتقاندا, تاراپتار «qazaq air» كومپانياسىنىڭ ءنوۆوسىبىر مەن چەليابى قالالارىنا ۇشۋ سانىن ارتتىرۋعا ۋاعدالاستى.
جيىنعا قاتىسۋشىلار رەسەي تاراپىنان اعاش ماتەريالدارىن شىعارۋعا شەكتەۋ شارالارى تۋرالى دا ماسەلە قوزعادى. 2024 جىلدىڭ 1 قاڭتارىنا دەيىن قازاقستان-رەسەي شەكاراسىندا اتالعان ءونىمدى قازاقستان رەسپۋبليكاسىنا شىعارۋ ءۇشىن تاعى 4 وتكىزۋ بەكەتىن بەلگىلەۋ ماسەلەسىن پىسىقتاۋ تۋرالى كەلىسىمگە قول جەتكىزدى.
سونىمەن قاتار رەسەيلىك تاراپ رف ۇكىمەتىنىڭ №312 قاۋلىسىنا سايكەس قازاقستاندىق كومپانيالاردىڭ مەنشىگىندەگى جانە اۋماققا ۋاقىتشا اكەلىنەتىن تاۋارلاردىڭ جەكەلەگەن تۇرلەرىن اكەتۋگە رۇقسات بەرۋ ءتارتىبىن تاراتپاۋ مۇمكىندىگىن قاراستىرادى.
وتىرىس سوڭىندا, سەرىك جۇمانعارين ەكىجاقتى ىنتىماقتاستىقتىڭ بارلىق سپەكترى بويىنشا ءوزارا ءىس-قيمىلدى ودان ءارى ارتتىرۋعا دايىن ەكەنىن جەتكىزدى. تالقىلاۋ قورىتىندىسى بويىنشا تاراپتار ۇكىمەتارالىق كوميسسيانىڭ 24-وتىرىسىنىڭ حاتتاماسىنا قول قويدى.
