اتا ساقالى اۋزىنا تۇسكەندە ارسىز قىلىق تانىتقان 63 جاستاعى ازامات – مەكتەپكە كۇزەتشىسى. جارتى جىلدان بەرى جۇمىس ىستەيدى. بۇعان دەيىن تەرىس قىلىعى بايقالماعان ول ارەكەتىن تولىق مويىنداعان. الدىنا كەلگەن التىنشى سىنىپ وقۋشىسىن ء«وز نەمەرەم ەكەن دەپ ويلاپ قالدىم» دەپ تۇسىندىرگەن.
– كۇزەتشى ماس بولعان. قىزىم ۇيگە كەلگەندە وقيعانىڭ قالاي بولعانىن تۇگەل بايانداپ بەردى. بەتىن سۇيگىزۋدەن جيىركەنەتىنىن ايتتى. مەن بالامنىڭ سول ساتتە قاشىپ شىقپاعاندا, قانداي جاعدايعا تاپ بولارىن ويلاۋدان قورقامىن. كۇزەتشى ارەكەتى ءۇشىن جازالانسىن, – دەدى جابىرلەنۋشىنىڭ اناسى.
– كۇزەتتە بولعان ازاماتتىڭ تۋىستارى ونىڭ ماسكۇنەمدىكتەن ەمدەلىپ جۇرگەنىن ايتتى. پسيحوتروپتىق زاتتاردى دا قولدانادى ەكەن. مۇنداي ازامات قالاي بالالاردىڭ ورتاسىندا قىزمەت اتقاردى؟ جۇمىس كەزىندە دە ماس بولۋىنا نەگە جول بەرىلگەن؟ جاۋاپتىلار قايدا قاراپ وتىر؟ – دەدى اتا-انا ليۋدميلا لوۆەنكو.
مەكتەپ اكىمشىلىگى بۇل ازاماتتى كۇزەت قىزمەتىنە كومپانيانىڭ وكىلى ۇسىنعانىن ايتتى. دەمەك وقۋ ورنىنىڭ باسشىلىعى ازعىننىڭ الكوگولگە قۇمارلىعىنان بەيحابار بولعان. جاعداي بولعان كۇنى-اق مەكەمەمەن اراداعى كەلىسىمشارتتى بۇزعان.
– ءپان مۇعالىمىنە, تاربيە ءىسى جونىندەگى ورىنباسار مەن شاۋاشىلىق ءبولىمىنىڭ باسشىسىنا سوگىس بەرىلدى, – دەدى № 160 جبب مەكتەپتىڭ ديرەكتورى گۇلشات امينوۆا.
مەكتەپ ديرەكتورى ازاماتتىڭ ماساڭ كۇيدە بولعانىن راستايدى. ونىڭ ايتۋىنشا, وقۋشى كۇزەتشىدەن مۇعالىم بەرگەن تاپسىرما قاعازىن الماق بولعان. ونىڭ وزىندە دە, ءۇي جۇمىسى بۇل قىزعا تيەسىلى ەمەس. ول تەك ونىنشى سىنىپتاعى قۇربىسىنىڭ ءوتىنىشىن ورىنداعان.
– الماتى قالالىق پوليتسيا دەپارتامەنتى اتالعان دەرەك بويىنشا الاتاۋ اۋداندىق پوليتسيا باسقارماسىمەن قر قك-ءنىڭ 124-بابى 1-بولىگىنە سايكەس تەرگەۋ جۇرگىزىپ جاتقانىن حابارلايدى. ساراپتامالار تاعايىندالدى. وقيعانىڭ ءمان-جايى انىقتالۋدا. كۇدىكتى اك-ءتىڭ 444-بابىنىڭ نورمالارى بويىنشا سوتتىڭ شەشىمىمەن اكىمشىلىك قاماۋعا الىندى, – دەدى الماتى قالالىق پوليتسيا دەپارتامەنتىنىڭ رەسمي وكىلى سالتانات ازىربەك.
اتا-انالار «ەل الدىندا ارسىزدىعىن تىيماعان ازامات وڭاشادا قانداي ارەكەتكە بارادى؟» دەپ الاڭدايدى. ولار «وقۋشىلاردىڭ قاۋىپسىزدىگىن قامتاماسىز ەتەتىن ماماننىڭ ءوزى بالالارعا وسىلاي قاۋىپ توندىرسە, باسقادان نە قايىر؟» دەپ كەيىپ وتىر.
ايتا كەتەيىك, مەكتەپتە 1220 بالا ءبىلىم الادى.
