ال جولداعى شۇڭقىردىڭ قاسىرەتى قانداي بولاتىنىن بارشا جۇرگىزۋشى بىلەدى. مۇنداي جولدار, اسىرەسە قىستا وتە قاۋىپتى. ەكىنشى ماسەلە, جىپسىگەن قار تۇندە قاتىپ, جولدى كوكتايعاققا اينالدىرادى. وسىنىڭ كەسىرىنەن دە جول-كولىك اپاتى بولىپ جاتادى. سوندىقتان جولدى قاردان تازارتقاندا تولىق سىپىرىپ وتكەن ءجون.
جولداردى قىستا ساقتاۋدىڭ بۇدان باسقا دا تولىپ جاتقان ءادىس-ءتاسىلى بار. وسى باستان جولدىڭ شەتىندەگى قار ۇستايتىن اعاش بۇتاقتارى, قۋراي, كۇزگى ءشوپ ءبارىن تازالاپ تاستاۋ كەرەك. ايتپەسە, اعاشتارداعى قالىڭ قار جولدى جاۋىپ تاستايدى. جولاۋشى تاسىمالى جانە اۆتوموبيل جولدارى باسقارماسىنىڭ باسشىسى ماقسات باياحمەتتىڭ ايتۋىنشا, جەرگىلىكتى جولداردى 2023-2024 جىلعى قىس جانە كوكتەم ايلارىندا كۇتىپ-باپتاپ ۇستاۋ ءۇشىن 1,3 ملرد تەڭگە قاراجات قاراستىرىلعان. بۇل قاراجاتتىڭ 400 ملن تەڭگەسى تەك قىس ايلارى ءۇشىن بولىنگەن. «وسى قارجى شەڭبەرىندە جولداردى كۇتۋ جۇمىستارىنا التى ۇيىممەن كەلىسىمشارت جاسالدى. ولار 13 اۋداننىڭ اۋماعىنداعى جولدارعا جاۋاپتى», دەدى م.باياحمەت.
جالپى ايتقاندا, قىستا جولداردى كۇتۋگە 142 تەحنيكا, 278 ادام تارتىلماق. اۋداننىڭ ىشىندەگى جولداردى ساقتاۋعا دا جوعارىدا ايتىلعان قارجىنىڭ 400 ملن تەڭگەسى بولىنگەن. بۇل قاراجات اۋداندىق دەڭگەيدەگى بارلىق 4 463 شاقىرىم جولدى تازالاۋعا جۇمسالادى.
جولداردى قىستا قاردان تازارتۋ, تۇرىپ قالعان كولىكتەرگە كومەك بەرۋ سەكىلدى جۇمىستار اۋىل شارۋاشىلىعى كاسىپورىندارىنا دا جۇكتەلەدى. شامامەن 220 اۋىل شارۋاشىلىعى كاسىپورنى 1,3 مىڭ شاقىرىمدىق جولدىڭ ساقتالۋى مەن قاۋىپسىزدىگىنە جاۋاپ بەرۋگە مىندەتتەلگەن.
جولاۋشىلار تاسىمالى باسقارماسىندا جولدى قاردان تازالاۋعا ارنالعان تەحنيكالاردىڭ ىشىندە شنەكروتوردىڭ الاتىن ورنى ەرەكشە كورىنەدى. سولتۇستىك قازاقستانعا مەملەكەتتىك ماتەريالدىق رەزەرۆتەن بۇل تەحنيكانىڭ ەكەۋى بولىنگەن. ولار قار بارىنشا بيىك بولىپ, ءۇيىلىپ قالعان ايماققا جەدەل جەتكىزىلەدى. قازىرگى تاڭدا وڭىردە قار قالىڭ جاۋاتىن 266 ۋچاسكەگە قارايتىن 863 شاقىرىم جول انىقتالعان. «بۇل ايماقتار باسقارمانىڭ ءجىتى باقىلاۋىندا», دەدى م.باياحمەت.
وسى كۇندەرى باسقارما جول شەتىندەگى قار ۇستايتىن قۋرايلار مەن شوپتەردى قىرقۋ, سۋاعار قۇبىرلاردى تازالاۋ جانە كوكتايعاققا قارسى جولعا سەبىلەتىن ماتەريالداردى ءۇيۋ جۇمىستارىن ۇيىمداستىرىپ كەلەدى. «قازىر ءاربىر اۋدانداعى جول ۋچاسكەلەرىنە جاۋاپتى ادامداردىڭ ءتىزىمىن ارنايى بۇيرىقتارمەن بەكىتىپ جاتىرمىز. مۇنداي جۇمىستار قيىن جاعداي بولعاندا كىمنىڭ تىكەلەي جاۋاپتى ەكەنىن بىردەن انىقتاۋ ءۇشىن قاجەت. بەلگىلەنگەن شارالار تەگىس ورىندالسا, جولدارداعى اپاتقا جول بەرىلمەيتىنى انىق», دەدى باسقارما وكىلى.
سولتۇستىك قازاقستان وبلىسى
