دۇنيەجۇزىلىك جەكپە-جەك ويىندارى (WCG) – بۇل حالىقارالىق وليمپيادا كوميتەتى (حوك) قولدايتىن جانە الەمنىڭ تۇكپىر-تۇكپىرىنەن جەكپە-جەك ونەرى مەن ونىڭ ەڭ مىقتى وكىلدەرى قاتىساتىن حالىقارالىق سپورتتىق ءىس-شارا. WCG-ءدىڭ باستى ماقساتى – جارىستاردى وتكىزۋ عانا ەمەس, سونىمەن قاتار ءوزىن-ءوزى باقىلاۋ جانە تەحنيكالىق شەبەرلىك سياقتى سپورتتىق قۇندىلىقتاردى ناسيحاتتاۋ. بۇل ويىندار ءارتۇرلى مادەنيەتتەردىڭ ءوزارا ينتەگراتسيالانۋىنا جانە جەكپە-جەك ونەرى بويىنشا ءبىلىم مەن تاجىريبە الماسۋعا ىقپال ەتەدى.
قازاق كۇرەسىن جەكپە-جەكتىڭ ەڭ تانىمال تۇرلەرى بويىنشا وتكىزىلەتىن WCG باعدارلاماسىنا ەنگىزۋ تۋرالى شەشىمدى حالىقارالىق سپورت فەدەراتسيالارى, حالىقارالىق سپورت فەدەراتسيالارىنىڭ جاھاندىق قاۋىمداستىعىنىڭ (GAISF) مۇشەلەرى قابىلداعان بولاتىن. GAISF – تاۋەلسىز حالىقارالىق سپورت فەدەراتسيالارىن جانە بۇكىل الەم بويىنشا سپورتتى دامىتۋعا باعىتتالعان باسقا دا حالىقارالىق ۇيىمداردىڭ باسىن بىرىكتىرەتىن ۇيىم. قازىرگى ۋاقىتتا GAISF جۇزدەن استام حالىقارالىق ۇيىممەن تىعىز قارىم-قاتىناس ورناتىپ, ءتيىمدى جۇمىس ىستەيدى. بۇگىنگى تاڭدا WCG GAISF قولداۋىنىڭ ارقاسىندا ەليتالىق سپورت پەن جەرگىلىكتى قاۋىمداستىقتار اراسىندا التىن كوپىر ورناتىپ, جاستاردى جەكپە-جەك سپورت تۇرلەرىمەن اينالىسۋعا ىنتالاندىرۋ جۇمىستارىنا باسىمدىق بەرەدى.
ەر-ريادتاعى جارىس بارىسىندا بىرقاتار سپورت تۇرلەرى, سونىڭ ىشىندە قازاق كۇرەسى بويىنشا ماراپاتتار جيىنتىعى ساراپقا سالىندى. بەس سالماقتا (3 ەر جانە 2 ايەل) جەڭىمپاز جۇلدەگەرلەر انىقتالدى. ابىروي بولعاندا, ۇلتتىق قۇراما بالۋاندارى جوعارى باسەكەلەستىككە قاراماستان ۇزدىكتەر قاتارىنان كورىنە ءبىلدى. اتاپ ايتقاندا, جۇماجان قوجامبەكوۆ (75 كگ), ءمادي امانگەلدى (85 كگ) جانە روزا نىسانتاي-
قىزى (70 كگ) قارسىلاس شاق كەلتىرمەي, جەڭىستىڭ بيىك تۇعىرىنا كوتەرىلدى. نۇر امانشۇكىروۆ (65 كگ) فينالدا وزبەكستاننان كەلگەن سپورتشىعا جول بەرىپ, كۇمىس مەدالعا قول جەتكىزدى. ال راۋزا نۇرمۇحامبەتوۆانىڭ (60 كگ) ەنشىسىندە – قولا مەدال.
وسىلايشا, قازاقستان قۇراماسى ۇزدىك ناتيجە كورسەتە وتىرىپ, جالپىكوماندالىق ەسەپتە ءبىرىنشى ورىندى يەلەندى. وزبەكستاننىڭ بالۋاندارى ەكىنشى بولسا, قىرعىزستاندىق سپورتشىلار ۇزدىك ۇشتىكتى تۇيىندەدى.
«ەگەمەن-اقپارات»
