ۇكىمەت ينۆەستورلارعا جاۋاپكەرشىلىكتى كۇشەيتەدى

ەڭ الدىمەن ءاليحان اسحان ۇلى ۇكى­مەتتىڭ جانە جەكە ءوزىنىڭ اتىنان قازا تاپ­قانداردىڭ تۋىستارى مەن جاقىندارىنا قايعىرا كوڭىل ايتتى. بۇدان كەيىن مينيسترلەر كابينەتىنىڭ مۇشەلەرى مارقۇم بولعان كەنشىلەردى ءبىر مينۋت ۇنسىزدىكپەن ەسكە الدى.

«بارلىق زارداپ شەككەندەردىڭ تەزىرەك ساۋىعىپ كەتۋىن تىلەيمىن. دەنساۋلىق ساق­تاۋ مينيسترلىگى ەمدەلىپ جاتقان ءاربىر كەنشىنىڭ جاعدايىن باقىلاۋدا ۇستا­سىن. قازا تاپقانداردىڭ وتباسىلارىنا قاجەتتى كومەك كورسەتىلىپ جاتىر. مەم­لەكەت باسشىسى ءتيىستى تاپسىرمالار بەردى», دەدى پرەمەر-مينيستر.

كومپانيامەن ينۆەستيتسيالىق ىنتىماقتاستىق توقتايدى

توتەنشە جاعدايلار ءمينيسترى سىرىم ءشارىپحانوۆ ءمالىم ەتكەندەي, 28 قازانعا قاراعان ءتۇنى كوستەنكو شاح­تا­سىندا 700 مەتر تەرەڭدىكتە ءورت شى­عىپ, ودان كەيىن مەتان-اۋا قوسپاسى جا­رىلعان. وقيعا ورنىنا دەرەۋ كاسىبي اسكەري­لەندىرىلگەن اۆاريالىق-قۇتقارۋ قىزمەتتەرىنىڭ رەسپۋبليكالىق ورتالىق شتابى قاراعاندى فيليالىنىڭ كۇشتەرى جۇمىلدىرىلدى.

اپات كەزىندە اۋىسىمدا 252 كەنشى بولعان. ونىڭ 5-ەۋىن قۇتقارۋ قىزمەتىنىڭ كۇشتەرى ىزدەپ تاۋىپ, جەر بەتىنە شىعاردى. ال 200-دەن استام ادام جەر ۇستىنە ءوز بەتىنشە كوتەرىلگەن. ىزدەستىرۋ-قۇتقارۋ جۇمىستارى كەزىندە 45 كەنشىنىڭ دەنەسى جانە تاعى ءبىر ادامنىڭ دەنە بولشەكتەرى تابىلعان.

وتىرىستا ىزدەۋ جۇمىستارى ەلەكتر قۋا­تىنىڭ بولماۋى مەن تاۋ-كەن قازبا­لارى­نىڭ تەرەڭدىگى جانە مەحانيزمدەردىڭ بۇزىلۋى سالدارىنان قيىنداعانى ايتىلدى. وندا جەكەلەگەن سۋ باسقان قازبا ورىندارىنا جەتۋ قيىن بولعان. قازىرگى تاڭدا اشىق ءورت وشاقتارى جوق, گاز جاعدايى قالىپتى. شاحتا قىزمەتىن قالپىنا كەلتىرۋ ءۇشىن تاۋ-كەن قازبالارىن زەرتتەۋ جانە جەكەلەگەن ۋچاس­كەلەردە سۋ سورۋ جۇمىستارى جۇرگىزىلىپ جاتىر ەكەن.

اپات سەبەپتەرىن تەكسەرۋ شەڭبەرىندە ۇكىمەتتىك كوميسسيا مۇشەلەرى شاحتاعا تۇسكەن. وسى تەكسەرۋدە انىقتالعان­داي, تاۋ-كەن قازبالارىنداعى شاحتا جابدىقتارى جىلجىپ كەتكەن, 15-تەن استام وقشاۋلاعىش بوگەتتەر مەن جەلدەتۋ قوندىرعىلارى قيراعان. تەرگەۋ­گە قازاقستاننىڭ, جاقىن جانە الىس شەتەلدەردىڭ ساراپتامالىق ۇيىمدارى تارتىلىپ جاتىر.

پرەمەر-مينيستر مەملەكەت باسشىسىنىڭ كوستەنكو شاحتاسىندا كەنشىلەردىڭ قازا بولۋىنا بايلانىستى تەرگەۋ جۇمىستارىن جۇرگىزىپ, «ارسەلورميتتال تەمىرتاۋ» كومپا­نياسىمەن ينۆەستيتسيالىق ىنتى­ماق­تاستىقتى توقتاتۋ جونىندەگى تاپسىرماسىنا توقتالىپ ءوتتى.

«بيىل تامىز ايىندا دا «ار­سە­لورميتتال تەمىرتاۋدا» وسىنداي اپات بولدى. ول كەزدە 5 شاحتەر قازا تاپتى. كوپ ادامنىڭ ءومىرىن قيعان بۇل اپاتتار وندىرىستەگى قاۋىپسىزدىك تا­لاپ­تارىنىڭ ساقتالماۋىمەن تىكەلەي باي­­لانىستى. بۇل – ءبىرىنشى كەزەكتە, كاسىپ­ورىن باسشىلىعىنىڭ كىناسى», دەدى ول.

«كومپانيا ءوز مىندەتتەمەلەرىن ورىن­­­داعان جوق. قازىرگى تاڭدا, «ارسەلورميتتال تەمىرتاۋ» كومپانيا­سىن قازاق­ستاننىڭ پايداسىنا بەرۋ راسىم­­دەرى اياقتالۋ ساتىسىندا», دەدى ءا.سمايىلوۆ.

ونىڭ ايتۋىنشا, ارنايى كوميسسيا اپاتتىڭ سەبەپتەرىن جان-جاقتى تەكسەرىپ, وعان كىنالى ادامداردى انىقتاۋ جۇمىس­تارىن جالعاستىرادى.

«قاراعاندى وبلىسىنىڭ اكىمدىگى مەن توتەنشە جاعدايلار مينيسترلىگى اپات سالدارىنان جويۋ جونىندە شارالار قابىلداۋعا ءتيىس. ەڭ باستىسى – قازا تاپقانداردىڭ وتباسىلارىنا بارلىق كومەكتى كورسەتىپ, زارداپ شەككەندەردىڭ دەنساۋلىقتارىن قالپىنا كەلتىرۋ. وسىنداي قيىن جاعدايدا ەش­كىم دە نازاردان تىس قالمايدى», دەپ قو­رى­تىندىلادى ءسوزىن پرەمەر-مينيستر.

شامادان تىس نەسيە شەكتەلەدى

ەلىمىزدە ازاماتتاردى قارجى­لىق ساۋاتتىلىق كۋرستارىمەن قامتۋدى كە­ڭەي­تۋ, سونداي-اق نەسيە بەرۋ جانە قارىز الۋ­شىلاردىڭ قۇقىقتارىن قورعاۋ كەزىن­دە تاۋەكەلدەردى ازايتۋ بويىنشا زاڭنامالىق تۇزەتۋلەر ازىرلەۋ جوسپارلاندى. پرەمەر-ءمينيستردىڭ ورىنباسارى – قارجى ءمينيسترى ەرۇلان جاماۋباەۆ حالىقتىڭ شامادان تىس نەسيە الۋىن ازايتۋ ءۇشىن بىرقاتار جۇيەلى جانە جەدەل شارا قابىلدانىپ جاتقانىن باياندادى. ولاردىڭ ءبىرى – بارلىق وبلىس پەن رەسپۋبليكالىق ماڭىزى بار قالادا حالىقپەن تىكەلەي جۇمىس ىستەي­تىن وڭىرلىك جوبالىق كەڭسەلەر قۇرۋ. جوبالىق كەڭسەلەردىڭ ماڭىزدى مىندەتى ازاماتتارعا نەسيەلەر بويىنشا مەرزىمى وتكەن بەرەشەكتى رەتتەۋ, قارجىلىق الاياقتىقتان قورعاۋ, سونداي-اق بانكروتتىق, جۇمىسقا ورنالاسۋ جانە بيزنەستى قولداۋ شارالارىن الۋ ماسەلەلەرى بويىنشا جاردەمدەسۋ سياقتى وزەكتى ماسەلەلەردى شەشۋدە كومەك كورسەتۋ بولماق.

تاعى ءبىر باعىت – ازاماتتاردىڭ قار­جى­لىق ساۋاتتىلىعىن ارتتىرۋ. اتاپ ايتقاندا, بۇگىنگى تاڭدا جوو ستۋ­دەنت­تەرى ءۇشىن قارجىلىق ساۋاتتىلىق كۋرس­تارىن ەنگىزۋ پىسىقتالىپ جاتىر. وقۋشىلار ءۇشىن ارنايى كۋرس ازىر­لەنەدى. سونىمەن قاتار رەسپۋبليكادا بانك­روتتىق جانە جەكە تۇلعالاردىڭ تولەم قابىلەتتىلىگىن قالپىنا كەلتىرۋ ءراسى­مى قا­راستىرىلعان. ونى بانكتەر, ميك­روقارجى ۇيىمدارى جانە كوللەك­تورلىق اگەنتتىكتەر الدىنداعى بورىشتار بويىنشا قولدانۋعا بولادى. ازاماتتاردىڭ حقكو, eGov.kz پورتالى, e-Salyq Azamat جانە eGov Mobile ءموبيلدى قوسىمشالارى ارقىلى ءوتىنىش بەرۋ مۇمكىندىگى بار. سونداي-اق Qoldau دەپ اتالاتىن جەكە تۇلعالاردىڭ بانكروتتىعى جونىندەگى جاڭا اقپاراتتىق جۇيە ىسكە قوسىلدى. ول ءوتىنىش بەرۋ مۇمكىندىگىن جانە ءوتىنىش بەرۋشىنىڭ كريتەريلەرگە سايكەستىگىن اۆتوماتتى تۇردە تەكسەرۋدى كوزدەيدى. بۇگىنگى تاڭدا جالپى بورىش سوماسى 9 ملرد تەڭگەدەن اساتىن 6 مىڭنان استام ازامات بانكروت دەپ تانىلدى.

پرەمەر-مينيستر حالىقتىڭ شامادان تىس كرەديت الۋى ۇلكەن الەۋمەتتىك-ەكونوميكالىق پروبلەماعا اينالىپ بارا جاتقانىن ايتتى. بيىلعى 1 قىركۇيەكتەگى جاعداي بويىنشا بانكتەردىڭ تۇتىنۋ كرەديتتەرىنىڭ پورتفەلى 9,2 ترلن تەڭ­گەنى قۇراعان. بۇل ورايدا ءبىر قارىز الۋ­شىعا شاققانداعى بەرەشەكتىڭ ورتاشا مولشەرى – شامامەن 1,5 ملن تەڭگەنى, ال پروبلەمالىق تۇتىنۋ كرەديتتەرى بويىنشا 1 ملن تەڭگەنى قۇرايدى.

بۇل ماسەلەنى شەشۋ ماقساتىندا مەملەكەت باسشىسى «قارىزسىز قوعام» جوباسىنىڭ اۋقىمىن كەڭەيتۋدى تاپ­سىرعانىن ايتتى. جوبا حالىقتىڭ قار­جىلىق ساۋاتتىلىعىن ارتتىرۋعا, ازا­ماتتاردىڭ كرەديتتەر بويىنشا پروب­لەمالىق بەرەشەكتەرىن رەتتەۋدە جانە جۇمىسقا ورنالاسۋدا كونسۋلتاتسيا­لىق كومەك بەرۋگە باعىتتالعان. قازىردىڭ وزىندە 8 وڭىردە 45 مىڭ ادام قارجىلىق ساۋاتتىلىق نەگىزدەرى بويىنشا ءبىلىم الدى. 2023 جىلدىڭ سوڭىنا دەيىن 60 مىڭ ازاماتتى قامتۋ جوسپارلانعان.

«ميكروقارجىلىق ۇيىمداردىڭ, اسىرەسە «جالاقىعا دەيىن» قارىز بە­رە­تىن ۇيىمداردىڭ شەكتى كرەديتتەۋ مولشەرلەمەلەرىن, سومالارى مەن مەر­زىمدەرىن قايتا قاراۋ قاجەت. وسىعان بايلانىستى ۇسىنىلىپ وتىرعان بارلىق زاڭنامالىق تۇزەتۋ پىسىقتالىپ, جىل سوڭىنا دەيىن پارلامەنتكە ەنگىزىلۋگە ءتيىس. اتالعان شارالار ازاماتتاردىڭ شامادان تىس قارىز الۋىن شەكتەۋگە ىقپال ەتەدى», دەدى ءا.سمايىلوۆ. ءسويتىپ, وقۋ-اعارتۋ مينيسترلىگى وقۋ باعدارلاماسى اياسىندا قارجىلىق ساۋاتتىلىق كۋرس­تارىن ەنگىزۋ ماسەلەسىن پىسىقتاۋى كەرەكتىگى, عىلىم جانە جوعارى ءبىلىم مينيسترلىگى بۇل ماسەلەلەردى جوعارى وقۋ ورىندارىمەن بىرگە قاراۋعا ءتيىس ەكەنىن دە ايتتى.

پروبلەمالىق قارىز الۋشىلاردى كوبىرەك قامتۋ ءۇشىن قارجى مينيسترلىگى وسى جىلدىڭ سوڭىنا دەيىن قۇجات­تار بەرۋدى وڭايلاتۋ جانە سوتتان تىس بانكروتتىقتى قولدانۋ ءراسىمىن جەتىلدىرۋ جونىندە شارالار قابىلداۋى قاجەت. قازىر بانك سالاسىنداعى ينتەرنەت-الاياقتىق وزەكتى ماسەلەگە اينالعانى دا نازاردان تىس قالمادى. سوڭعى جىلدارى مۇنداي فاكتىلەردىڭ سانى 5 ەسەگە دەيىن كوبەيىپتى.

وسى جىلدىڭ باسىنان بەرى ينتەرنەت-الاياقتىققا بايلانىستى 15 مىڭنان استام قىلمىستىق ءىس تىركەلدى. كەلتىرىلگەن زياننىڭ مولشەرى 13 ملرد تەڭگەنى قۇرادى. ونىڭ 65%-ىن شەتەلدەن كەلگەن الاياقتار جاساعان. ءىىم مۇددەلى مەملەكەتتىك ورگاندارمەن جانە ءموبيلدى بايلانىس كومپانيالارىمەن بىرگە وسىنداي جاعدايلارعا مونيتورينگتى كۇشەيتىپ, الاياقتىق فاكتىسى بويىنشا ازاماتتاردىڭ وتىنىشتەرىن جەدەل قاراۋى كەرەك.

توپ-20 ساناتىنداعى تۋريستىك اۋماق

تۋريزم جانە سپورت ءمينيسترى ەرمەك مارجىقپاەۆتىڭ ايتۋىنشا, ءبىرىنشى جارتىجىلدىقتا 3 ملن-نان استام وتان­داسىمىز ەل ىشىندە ساياحات جاساعان. بۇل وتكەن جىلدىڭ سايكەس كەزەڭىندەگى كورسەتكىشتەن 400 مىڭعا ارتىق. جىل سوڭىنا دەيىن ىشكى تۋريستەر سانى 9 ملن ادامعا جەتەدى دەگەن بولجام بار. ال شەتەلدىك تۋريستەردىڭ سانى ەكى ەسە وسكەن. جارتى جىلدا 500 مىڭنان استام شەتەلدىك تۋريست كەلگەن. جىل سوڭىنا دەيىن ولاردىڭ سانى 1,4 ملن-عا جەتەدى دەگەن ءۇمىت بار. تۋريستەر سانى وسكەندىكتەن سالاداعى كاسىپكەرلەردىڭ تابىسى دا ارتقان. ساياحاتشىلار مەن دەمالۋشىلاردى ورنالاستىرۋ ورىندارى 100 ملرد تەڭگەگە جۋىق تابىس تاپتى. بۇل وتكەن جىلدىڭ سايكەس كەزەڭىمەن سالىستىرعاندا 30 ملرد تەڭگەگە كوپ. بيىلعى 9 ايدا تۋريزم سالاسىنا 404,8 ملرد تەڭگە ينۆەستيتسيا تارتىلدى – كورسەتكىش 44%-عا ءوستى. وڭىرلەر بويىنشا سولتۇستىك قازاقستان, پاۆلودار, اقتوبە جانە الماتى وبلىس­تارى كوش باستاپ تۇر.

مينيستر بىلتىردان باستاپ ەلى­مىز­دە سالاداعى كاسىپكەرلەردىڭ بەل­­سەن­دىلىگىن ىنتالاندىرۋعا باعىت­تال­عان جاڭا مەملەكەتتىك قولداۋ شارالارى ەنگىزىلگەنىن ايتتى. جالپى, 2023 جىل­دىڭ باسىنان باستاپ بارلىق مەم­لە­كەتتىك قولداۋ شاراسى بويىنشا وڭ ديناميكا بايقالادى. بۇگىنگى تاڭدا جالپى 600 ملن تەڭگەدەن استام سوماعا ءوتىنىم ماقۇلداندى. سونداي-اق تۋريستىك ينفراقۇرىلىمدى دامىتۋ, «Kids go free» باعدارلاماسىن كەڭەيتۋ, رەسپۋبليكانىڭ تۋريستىك ءيميدجىن حالىقارالىق دەڭگەيدە ىلگەرىلەتۋ, سالانى تسيفرلاندىرۋ جانە تاعى دا باسقا جۇمىستار جالعاسىپ جاتىر. ءا.سمايىلوۆ مەملەكەت باسشىسىنىڭ تاپسىرمالارىنا سايكەس ۇكىمەت ەكونوميكانى ءارتاراپتاندىرۋ ماسەلەسىندە ەلدىڭ تۋريستىك الەۋەتىن دامىتۋعا كوڭىل بولۋگە ءتيىس ەكەنىن اتاپ ءوتتى.

«بىزگە تۋريزم سالاسىندا جاڭا سەرپىندى جوبالار قاجەت. سوڭعى 3 جىلدا سالاعا 4 ملرد دوللار كولەمىندە ينۆەستيتسيا تارتىلدى. 400-دەن استام نىسان سالىنىپ, 7 مىڭعا جۋىق تۇراق­تى جۇمىس ورنى قۇرىلدى», دەدى ول. ءسويتىپ, قازاقستاندا 20-دان استام تانىمال حالىقارالىق دەڭگەيدەگى قوناق ۇيلەر اشىلعانىن, مۇنىڭ ءوزى شەتەلدىك تۋريستەردى تارتۋعا ايتارلىقتاي ىقپال ەتەتىنىن اتاپ ءوتتى.

«وتكەن جىلدان بەرى تۋريزم نىساندارىن سالۋ, تاۋ شاڭعىسى كۋرورتتارىن دامىتۋ جانە تۋريستىك اۆتوبۋستار ساتىپ الۋ جونىندەگى جوبالار مەملەكەتتىك قولداۋ شارالارىمەن قامتىلدى. ەل ىشىندە ساياحاتتايتىن ازاماتتار ءۇشىن بالالار اۆيابيلەتى سۋبسيديالانادى. تۋروپەراتورلارعا شەتەلدىك تۋريستەردى تارتقانى ءۇشىن سۋبسيديالار بەرىلەدى», دەدى ءا.سمايىلوۆ. جالپى, 80 ەلدىڭ ازاماتى قازاقستاندا ۆيزاسىز ءجۇرىپ-تۇرا الادى. 109 مەملەكەتتەن كەلەتىن شەتەلدىكتەر ءۇشىن ەلەكتروندىق ۆيزا الۋ مۇمكىندىگى بار. حالىقارالىق اۋە قاتىناسىنىڭ گەوگرافياسى دا كەڭەيىپ كەلەدى.

«بۇگىنگى تاڭدا ەلىمىزدە باسىم تۋريستىك اۋماقتار ايقىندالدى. وندا «زاكىرلىك» جوبالار ىسكە اسىرىلاتىن بولادى. بۇدان بولەك, ەلىمىزدەگى تۋريستىك سالانىڭ ۇلكەن الەۋەتىن ەسكەرە وتىرىپ, اتالعان جۇمىسقا ءاربىر ءوڭىر تارتىلۋعا ءتيىس دەپ سانايمىن», دەدى پرەمەر-مينيستر. بۇل رەتتە, تۋريستىك نىسانداردى جىل بويى پايدالانۋ تۇجىرىمداماسىن كەڭەيتۋ جانە قۇرۋ قاجەت. ناتيجەسىندە, بۇل دۇنيەجۇزى­لىك ەكونوميكالىق فورۋمنىڭ ساياحات پەن ءتۋريزمدى دامىتۋدىڭ جاھان­دىق يندەكسىندە رەيتينگتى ارتتىرۋعا مۇمكىن­دىك بەرەدى. دەسە دە ول سالانىڭ ءتيىمدى دا­مۋىنا بىرقاتار فاكتور كەدەرگى كەلتىرەتى­نىن دە ايتتى. ولار – ينفراقۇرىلىم­نىڭ جەتىسپەۋى, شەكتەۋلى جاتىن ورىندارى, لوگيستيكا مەن كورسەتىلەتىن قىزمەتتەر ساپاسىنىڭ تومەن دەڭگەيى.

بۇگىندە ەلىمىزدىڭ بۇكىل تۋريستىك الەۋەتىن پايدالانۋ وزەكتى كۇيىندە قالىپ وتىر. اتاپ ايتقاندا, باياناۋىل كۋرورتتىق ايماعىندا ءتۋريزمدى دامىتۋ تەك جاسىباي كولىمەن شەكتەلگەن. وڭىردەگى باسقا دا كولدەردىڭ, تاۋلار مەن مادەني ەسكەرتكىشتەردىڭ مۇمكىندىكتەرى نازاردان تىس قالعانىن ايتتى.

«وتكەن جازعى ماۋسىمدا اسسى ءۇستىرتى مەن قاپشاعاي ايماعىنا تۋرلاردى ۇيىمداستىرۋ كەزىندە قىزمەتتەردىڭ ساپاسىنا كوپتەگەن شاعىم ءتۇستى. تاكسي, تاماقتانۋ جانە قوناق ءۇي قىزمەتتەرى باعالارىنىڭ شارىقتاپ كەتۋىنە قاتىستى شاعىمدار ءجيى ايتىلادى. مۇنداي كەلەڭسىز جاعدايلار ەلدىڭ تۋريستىك تارتىمدىلىعىن تومەندەتەدى», دەدى ول. قوناق ۇيلەردى كلاسسيفيكاتسيالاۋ جۇيەسىن رەفورمالاۋ جانە ستاندارتتاردى حالىقارالىق دەڭگەيگە دەيىن كوتەرۋ جۇمىستارىن باستاۋ قاجەت. وسىعان بايلانىستى تۋريزم جانە سپورت مينيسترلىگىنە ساۋدا جانە ينتەگراتسيا مينيسترلىگىمەن بىرلەسىپ, تۋريزم سالاسىنداعى نىساندار مەن كورسەتىلە­تىن قىزمەتتەرگە الەمدىك ستاندارتتارعا سايكەستىگى تۇرعىسىنان تەكسەرۋ جۇرگىزۋ جونىندە شارالار قابىلداۋدى تاپسىردى. ءسويتىپ, توپ-20 تۋريستىك اۋماقتاردى دامىتۋ جونىندەگى جول كارتالارىن بەكىتۋ قاجەتتىگىن ەسكە سالدى.

«جەرگىلىكتى تاريحي ەسكەرتكىشتەر, كوركەم تابيعي پەيزاجدار مەن حالقى­مىزدىڭ باسقا دا يگىلىكتەرى تۇگەلدەي تۋريستىك ونىمدەرگە دۇرىس ينتەگراتسيالانۋى قاجەت», دەدى ول. ۇكىمەت باسشىسى مادەني, اگرو جانە ەكوتۋريزمدى دامىتۋ بويىنشا ناقتى تاسىلدەردى ازىرلەۋدى تاپسىردى. سونداي-اق تۋريستىك نىسانداردى قاجەتتى ينفراقۇرىلىممەن قامتاما­س­ىز ەتۋ, قاۋىپسىزدىگىن ارتتىرۋعا باعىتتال­عان شارالاردى قابىلداۋ, قازاقستان­نىڭ شەتەلدەگى تۋريستىك الەۋەتى تۋرالى بەلسەندى اقپاراتتىق ناۋقان جۇرگىزۋدى قامتاماسىز ەتۋ, سالانى تسيفرلاندىرۋ جانە قىزمەت كورسەتۋ ساپاسىن ارتتىرۋ جونىندەگى ءىس-شارالار جوسپارىن بەكىتۋ قاجەتتىگىن قاداپ ايتتى.

«بۇل رەتتە, شەتەلدىك ءتۋريستىڭ ەل اۋماعىنا كەلگەننەن باستاپ, كەتۋىنە دەيىنگى بارلىق كەزەڭىن تسيفرلاندىرۋدىڭ جانە وڭايلاتۋدىڭ تولىق تسيكلىن, سونداي-اق ىشكى تۋريزمگە ارنالعان قىزمەتتەردىڭ بارلىق سپەكترىن قامتۋ ماڭىزدى», دەدى ۇكىمەت باسشىسى.