قازىرگى قازاق بەينەلەۋ ونەرىندەگى ورنەگى ەرەك, بەدەرى انىق, ايتۋلى كەسكىندەمەشىلەردىڭ ءبىرى جۇماقىن قايرامباەۆتىڭ ۇلتتىق ناقىشقا باي تۋىندىلارى سيۋجەتىنىڭ قاراپايىمدىلىعىمەن, سىرشىلدىعىمەن, شىنايىلىعىمەن بىردەن باۋراپ اكەتەدى. ول اسقاق تاۋلاردى, سايىن دالانى نەمەسە عاجايىپ قۇبىلىسقا تولى تابيعاتتى بەينەلەسە دە ءوز بويىنداعى ادالدىعى, تازالىعى شىعارمالارىنان كورىنىپ تۇرادى.
كورمەگە سۋرەتشىنىڭ جۇمىستارى عانا ەمەس, سونىمەن بىرگە ونىڭ شاكىرتتەرىنىڭ شىعارمالارى دا قويىلدى. ءار تۋىندى – تەرەڭ فيلوسوفيالىق مازمۇنىمەن, بوياۋلارىنىڭ قانىقتىعىمەن, اق كەنەپكە توگىلىپ تۇسكەن كوركەمدىگىمەن جۇرتشىلىقتىڭ قىزىعۋشىلىعىن تۋعىزدى. اسىرەسە كورمەدە قازاق ءۇشىن كيەلى سانالعان جىلقى بەينەسى كەڭ قامتىلعان. جۇماقىن اعامىز كوپ جىلدان بەرى الماتىداعى ت.جۇرگەنوۆ اتىنداعى ونەر اكادەمياسىنىڭ پروفەسسورى. ونىڭ ءتالىم-تاربيەسىن الىپ, ءدارىسىن تىڭداعان شاكىرتتەرىنىڭ الدى الەمگە تانىلدى. سوندىقتان بۇل كورمە – سۋرەتشىنىڭ شاكىرتتەرىمەن بىرگە قولعا العان ءتورتىنشى جوباسى. «پەرىشتە ءىزى» دەگەن اتاۋىنىڭ ءوزى ەرەكشە مانگە يە.
مادەني ءىس-شارانىڭ اشىلۋىندا ەۋرازيالىق ديزاينەرلەر وداعىنىڭ توراعاسى, پروفەسسور ەرمەك اسىلحانوۆ استانا حالىقارالىق ۋنيۆەرسيتەتى ديزاين فاكۋلتەتىنىڭ دەكانى سايات ىبىراي ءسوز الىپ, قىلقالام شەبەرىنىڭ شىعارماشىلىعى تۋرالى ماعىنالى ءسوز قوزعاپ, مەرەيتوي يەسىنە ىزگى لەبىزدەرىن ءبىلدىردى.
پارلامەنت ءماجىلىسىنىڭ دەپۋتاتى جاناربەك ءاشىمجان قىلقالام شەبەرىنىڭ ۇلتتىق بەينەلەۋ ونەرىندە ورنى بولەك ەكەنىنە توقتالدى.
«الاتاۋدىڭ ەتەگىندەگى الاقانداي اۋىلدا تۋىپ, قازاق بەينەلەۋ ونەرىنىڭ بيىگىنە كوتەرىلگەن تۇلعانى وسى ونەردىڭ كلاسسيگى دەپ ايتۋعا بولادى. ونىڭ كارتينالارىنىڭ بارلىعى جاقسىدان ونەگە الۋعا باعىتتالعان پالساپالىق ەسسەلەردەن تۇرادى. جۇماقىن اعا ءداستۇرلى ونەر مۇرالارىن بۇگىنگى كەسكىندەمە مۇمكىندىكتەرىمەن قاتار مەڭگەرگەن شەبەر. تۋىندىلارىنىڭ باسىم كوپشىلىگى پاتريوتتىق سەزىمدى وياتاتىن تىلسىم كۇشكە يە» دەپ, ىنىلىك ءىلتيپاتىن جەتكىزدى.
جۇماقىن قايرامباەۆ – سانكت-پەتەربۋرگتەگى ي.ە.رەپين اتىنداعى مەملەكەتتىك اكادەميالىق كەسكىندەمە, ءمۇسىن جانە ساۋلەت ينستيتۋتىن بىتىرگەن. وسىندا وقىپ جۇرگەندە اتاقتى ەرميتاج مۋزەيىندەگى رەمبراندتتىڭ اتاقتى «دانايا» تۋىندىسىنىڭ كوشىرمەسىن جاساعان. بۇل كوشىرمە سۋرەت ينستيتۋت قورىندا قالىپ, كەيىن ەرميتاجدا تۇرعان تۇپنۇسقا «داناياعا» بىرەۋ ءسىلتى شاشىپ زاقىم كەلتىرگەندە, كاسىبي قايتا جاڭعىرتۋشىلار ۇلى تۋىندىنى قالپىنا كەلتىرۋ ءۇشىن ينستيتۋتتىڭ قورىندا ساقتاۋلى تۇرعان قازاق سۋرەتشىسىنىڭ كوشىرمە ەڭبەگىن پايدالانعان. بۇل جاعدايدان وقىرمانداردىڭ كوپشىلىگى تانىس بولماۋى مۇمكىن. وسىدان-اق قايرامباەۆتىڭ ەشكىمگە ۇقسامايتىن بولەك قولتاڭباسى بار ەكەنىن تانيسىز.
ءىس-شارا سوڭىندا كورنەكتى سۋرەتشى شىعارماشىلىعى تۋرالى از-كەم ءسوز قوزعاپ, كورمەگە كەلگەن قاۋىمعا ريزاشىلىعىن ءبىلدىردى.
