سونىڭ ىشىندە جالپى ءوڭىر ەكونوميكاسىنىڭ درايۆەرى بولىپ تابىلاتىن اۋىل شارۋاشىلىعى سالاسىندا بيىلعى توعىز ايدا 685,8 ملرد تەڭگەنىڭ ءونىمى شىعارىلىپ, بىلتىرعى سايكەس مەرزىممەن سالىستىرعاندا 15,9%-عا كەمىپ كەتكەن. ارينە, بيىل جالپى رەسپۋبليكا بويىنشا دا 9 ايداعى ءونىم كولەمى بىلتىرعىمەن سالىستىرعاندا تومەندەگەن. الايدا تومەندەۋدىڭ ورتاشا كورسەتكىشى رەسپۋبليكا بويىنشا 9,9% بولسا بىزدە ودان ءسال دە بولسا جوعارىلاۋ.
بيىلعى اۋا رايىنىڭ قولايسىزدىعى اۋىل شارۋاشىلىعىن بارىنشا تىعىرىققا تىرەپ باقتى. ديقاندار ماڭداي تەرىن تامشىلاتىپ ەككەن ءونىمىن ۋاقىتىندا جيناي الماي, تامىزدىڭ اياعىندا توقتاۋسىز قۇيعان جاڭبىردىڭ استىندا قالدىرۋعا ءماجبۇر بولدى. دەستەدە جاتقان ەگىن كوكتەپ كەتكەن جاعدايلار دا از بولعان جوق. تاناپتارعا كومبايندار كىرە الماي, جەر كەبۋ ءۇشىن بىرنەشە كۇن قاتارىنان كۇننىڭ اشىقتىعىن كۇتىپ تۇرىپ قالدى. الايدا اشىق بولعان ەكى كۇن ءۇشىنشى كۇنى نوسەر جاۋىنعا ۇلاسىپ وتىردى. مۇنداي جاعدايدا مول ونىمگە قول جەتكىزۋ قيىنداۋ, ارينە. «جىعىلعانعا جۇدىرىق» دەگەندەي ءدال وراق باستالعان كەزدە وبلىستىڭ ىسكەر اكىمىن اۋىستىرىپ جىبەرىپ, ونىڭ ورنى 19 كۇن بويى بوس تۇرعانى دا بۇل ىسكە جاناما بولسا دا كەسىرىن تيگىزىپ كەتكەنىن جاسىرۋعا كەلمەس...
مىنە, وسىنداي تىكەلەي جانە جاناما كەسىرلەردىڭ سەبەبىنەن ەگىس ونىمدەرى بىلتىرعىمەن سالىستىرعاندا 21,2%-عا قۇلدىرادى. ءسويتىپ, بىلتىرعى قاڭتار-قىركۇيەك ارالىعىندا 735,8 ملرد تەڭگەنىڭ ءونىمى الىنسا, بيىلعى مەجە 440 ملرد تەڭگەدەن ءارى اسپادى. اۋىل شارۋاشىلىعىندا كوڭىل كونشىتەتىن جالعىز كورسەتكىش مال شارۋاشىلىعىندا عانا بولىپ تۇر. ونىڭ كولەمى 242,7 ملرد تەڭگەگە جەتىپ, بىلتىرعىدان 2,8%-عا استى.
ال وبلىس بويىنشا جالعىز جۇبانتارلىق جاعداي ونەركاسىپ سالاسىندا عانا تۇراقتى ءوسىم كورسەتتى. بيىلعى 9 ايدا 457,6 ملرد تەڭگەنىڭ ءونىمى ءوندىرىلىپ, بىلتىرعى جىلدىڭ سايكەس مەرزىمىمەن سالىستىرعاندا 12,5 پايىزعا وسكەن. ونىڭ ىشىندە وڭدەۋ كاسىپورىندارىنداعى ءوسىم – 12%, تاۋ-كەن وندىرىسىندەگى ءوسىم – 12,1%, ەلەكتر ەنەرگياسىنىڭ ءوسىمى 20,8%-عا ارتقان.
ينفلياتسيا وسىمىمەن وبلىس ەكونوميكاسىنا بيىلعى 9 ايدا قۇيىلعان ينۆەستيتسيا كولەمى بىلتىرعى جىلمەن سالىستىرعاندا 16,1 پايىزعا ارتىپ, 296,2 ملرد تەڭگەگە جەتكەن. قۇرىلىس قارقىنى دا بىلتىرعىمەن سالىستىرعاندا ارتىپ, 102 ملرد تەڭگەگە جەتىپ وتىر. ءوسىم – 22,2 پايىز. سونىڭ ىشىندە قۇرىلىس-مونتاجداۋ جۇمىستارىنىڭ ارتۋى ناتيجەسىندەگى ءوسىم – 23,4%, كۇردەلى جوندەۋ جۇمىستارىنىڭ ارتۋىنداعى ءوسىم – 1,5 ەسە.
بىلتىرعى توعىز ايمەن سالىستىرعاندا بيىل پايدالانۋعا بەرىلگەن تۇرعىن-ءۇي قورى كولەمى دە ارتىپ وتىر. بيىل ونىڭ جالپى كولەمى 137,6 مىڭ شارشى مەتر بولىپ, بىلتىرعىدان 112,4%-عا وسكەن.
بيىل وبلىس بويىنشا 22 مىڭنان اسا ادام جۇمىسقا ورنالاستىرىلعان, الايدا بۇل – جوسپاردىڭ 90,7%-ى عانا. ايتا كەتەتىن جانە ءبىر جايت, 9 ايداعى ينفلياتسيا كولەمى 7,7% بولىپ, رەسپۋبليكالىق ورتاشا كورسەتكىشتەن 0,7 پايىزعا اسىپ كەتتى. سونىڭ ىشىندە ازىق-ت ۇلىك تاۋارلارىنىڭ باعاسى 7,4% بولدى, ال رەسپۋبليكالىق ورتاشا كورسەتكىش 6,2% بولاتىن.
قورىتىندىلاي كەلگەندە ايتپاعىمىز, وبلىس دەڭگەيىندە نەگىزگى كورسەتكىشتەر بويىنشا وڭ ناتيجە بايقالعانمەن, اۋداندار كەسىندىسىندە بىرنەشە كورسەتكىشكە قول جەتكىزبەگەن اۋداندار بار. ەڭ كوپ تەرىس ناتيجە كورسەتكەن – اققايىڭ اۋدانى 4 كورسەتكىش (اۋىلشارۋاشىلىق, ينۆەستيتسيا, قۇرىلىس, تۇرعىن ءۇي ەنگىزۋ), ايىرتاۋ اۋدانى – 3 كورسەتكىش (اۋىلشارۋاشىلىق, ونەركاسىپ, قۇرىلىس), جامبىل اۋدانى – 3 كورسەتكىش (اۋىلشارۋاشىلىق, ونەركاسىپ, قۇرىلىس), مامليۋت اۋدانى – 3 كورسەتكىش (اۋىلشارۋاشىلىق, ونەركاسىپ, تۇرعىن ءۇي ەنگىزۋ), ءۋاليحان اۋدانى – 3 كورسەتكىش بويىنشا (اۋىلشارۋاشىلىق, بولشەك ساۋدا, تۇرعىن ءۇي ەنگىزۋ) ارتتا كەلەدى.
سولتۇستىك قازاقستان وبلىسى
