عالامتورداعى اشىق دەرەكتەرگە سۇيەنسەك, يۆان اكيموۆيچ كوستەنكو 1892 جىلى 27 مامىردا دونباسستا, چيستياكوۆسكي اۋدانىندا دۇنيەگە كەلگەن, 1934 جىلى 27 شىلدەدە قازاقستانداعى بالقاشتىڭ ماڭىندا ومىردەن وزىپتى. قاراعاندى كومىر باسسەينىن يگەرۋدى ۇيىمداستىرۋشىلاردىڭ ءبىرى.
"ول شاحتەر وتباسىندا تۋدى. ماسكەۋ ونەركاسىپ اكادەمياسىن بىتىرگەن (1932). 1918-1920 جىلدارى بروندى پويىزدىڭ كومانديرى بولدى, دونباسستى قورعاۋعا قاتىسۋشى. 1920-1928 جىلدارى پارتيا-مەملەكەتتىك جۇمىستا ىستەگەن, 1931-1933 جىلدارى دونباسستاعى كومىر ترەسى باستىعىنىڭ ورىنباسارى, 1933-1934 جىلدارى «قاراعاندىكومىر» ترەسىندە باسقارۋشى قىزمەتىن اتقاردى", دەلىنگەن جازبادا.
ونىڭ قاتىسۋىمەن № 30, 31, 33/34 جانە № 20 شاحتالار ىرگە قالادى, قاراعاندى باسسەينىندە كومىر ءوندىرۋدى دامىتۋ مەن تەحنولوگياسىنىڭ جۇيەسى قۇرىلدى, قاراعاندى قالاسىنىڭ جاڭا تۇرعىن اۋدانى سالىندى. 1934 جىلى 27 شىلدەدە ۇشاق اپاتىنان قايتىس بولدى. قاراعاندىدا ءبىر كوشە مەن شاحتاعا كوستەنكو ەسىمى بەرىلگەن.
«ارسەلورميتتال تەمىرتاۋ» اق مالىمەتتەرى بويىنشا 1934 جىلى 13 تامىزدا «گيگانت-ا» كەنىشىنە ۇشاق اپاتىنان قازا تاپقان «قاراعاندىكومىر» ترەسىنىڭ باسقارۋشىسى يۆان اكيموۆيچ كوستەنكونىڭ ەسىمى بەرىلدى. كەنىش 1942 جىلى ىسكە قوسىلدى.
اشىق اقپارات كوزدەرىنە سۇيەنسەك, ەكىنشى دۇنيەجۇزىلىك سوعىس كەزىندە كەنىش ۋاقىتشا يگەرۋ سحەماسى بويىنشا جۇمىس ىستەگەن. 1952 جىلى 26 مامىردا جوبالىق قۋاتى جىلىنا 750 مىڭ توننا كومىر وندىرەتىن شاحتانىڭ ءبىرىنشى كەزەگى ىسكە قوسىلدى. 1962 جىلى ءدال وسىنداي قۋاتتىلىقتىڭ ەكىنشى كەزەگى ەنگىزىلدى.
1968 جىلى 1 قاڭتاردا 86/87 شاحتا كوستەنكو اتىنداعى شاحتاعا قوسىلدى, ودان كەيىن قايتا قۇرۋ جانە وندىرىستىك قۋاتتىلىق 3 ملن 200 مىڭ تونناعا دەيىن ءوستى. 1984 جىلى كەنىشتىڭ بۇكىل تاريحىندا ەڭ كوپ كومىر ءوندىرىلدى – 3 ملن 942 مىڭ توننا. 1992 جىلى 7 مامىردا شاحتا ۇجىمى 100 ميلليونىنشى توننا كومىر ءوندىردى.
1996 جىلدان باستاپ كەنىش «ارسەلورميتتال تەمىرتاۋ» اق (بۇرىنعى «يسپات كارمەت» اق, «ميتتالستيل تەمىرتاۋ» اق) كومىر دەپارتامەنتىنىڭ قۇرامىنا ەندى.
1998 جىلى 1 قاڭتاردا «ستاحانوۆسكايا» شاحتاسى كوستەنكو اتىنداعى شاحتاعا قوسىلدى. كەنىشتە وندىرىلەتىن كومىردىڭ سورتتارى - 2كو, 1كو, 1ك.
2018 جىلدىڭ 10 ناۋرىزىندا ۆەنتيلياتسيالىق تۇيىسپە ايماعىنداعى كوستەنكو شاحتاسىندا ءورت بولدى. سودان كەيىن بارلىق شاحتا جۇمىسشىلارى جەر بەتىنە كوتەرىلدى, زارداپ شەككەندەر جوق.
2022 جىلدىڭ ساۋىرىندە 36 جاستاعى كەنشى قايتىس بولدى. ول 2 ساۋىردە لاۆادا جۇمىس ىستەگەن كەزدە ومىرىنە قاۋىپ توندىرەتىن جاراقاتتار العان.
1938-2013 جىلدار ارالىعىنداعى قاراعاندى كومىر باسسەينىنىڭ اشىق ەستەلىك كىتابىندا كوستەنكو شاحتاسىندا قازا تاپقان 80-نەن استام ادام تۋرالى دەرەكتەر بار.
2023 جىلدىڭ 28 قازانىندا شاحتادا جارىلىس بولدى. قازىرگى اقپارات بويىنشا, جارىلىس سالدارىنان قازا تاپقاندار سانى 45 ادامعا جەتكەن. 1 كەنشى جەر استىندا.
اشىق دەرەككوزدەرگە سۇيەنسەك, بۇل بولعان قايعىلى وقيعا قۇربان بولعاندار سانى بويىنشا ەڭ ۇلكەن وقيعا بولدى.
