وقۋ-جاتتىعۋ جۇمىستارىنىڭ باستى ماقساتى – ورمان جانە دالا ءورتى ورىن الا قالعان جاعدايدا بىرلەسكەن ءىس-قيمىلدى مەيلىنشە پىسىقتاۋ. بارلىق قىزمەت اراسىندا ءورتتى جەدەل ءسوندىرۋدىڭ ءتيىمدى ءادىس-تاسىلدەرى تۋرالى تاجىريبە الماسۋ. بۇل, شىن مانىندە, وتە قاجەت دۇنيە. الاپات ءورت باستالعان كەزدە كوپتى كورگەن ورمان قورعاۋشىلاردىڭ وزدەرى ابدىراپ قالاتىن دا كەز بولادى. تىلسىم تابيعات تاقسىرەت تارتپاۋ ءۇشىن ءورت وقيعاسىنىڭ الدىن الۋ جانە لەزدە وقشاۋلاپ, ءسوندىرۋ تاسىلدەرى جەتىلدىرىلە بەرمەك.
وقۋ-جاتتىعۋ جۇمىسىنا توتەنشە جاعدايلار مينيسترلىگىنىڭ, ەكولوگيا جانە تابيعي رەسۋرستار مينيسترلىگىنىڭ, جەرگىلىكتى اكىمدىكتەردىڭ وكىلدەرى, توتەنشە جاعدايلار دەپارتامەنتىنىڭ قىزمەتكەرلەرى جانە ەرىكتىلەر قاتىستى.
قاتىسۋشىلار ءورت شىققان جەردى اۋەدەن تەكسەرىپ, اۋقىمىن انىقتاعاننان كەيىن ءورت سوندىرۋشىلەر دەسانتىن ءتۇسىرىپ, زارداپ شەككەندەردى قۇتقارماق. ورمان شارۋاشىلىعى مەكەمەلەرىنىڭ كۇشتەرى مەن قۇرال-جابدىقتارى مەيلىنشە ءتيىمدى جۇمىلدىرىلماق. مىنە, وسىنداي جۇمىستاردى سارالاعاننان كەيىن ءوزارا ءىس-قيمىلدى ۇتىمدى ۇيلەستىرۋ ماسەلەسى تالقىلاندى. ءتىلسىز جاۋدىڭ قاۋپى وتە زور. سوندىقتان قىزىل ءتىلى سۋماڭداعان ءورتتىڭ شارپۋى مۇمكىن دەپ ەسەپتەلگەن اۋىل-ايماقتىڭ تۇرعىندارىن قاۋىپسىز جەرگە كوشىرىپ, ۋاقىتشا ورنالاستىرۋ ماسەلەسى دە باستان جاقتى ايىرعانداي ەتىپ تاپتىشتەلدى. ولارعا مەديتسينالىق جانە پسيحولوگيالىق كومەك كورسەتۋ جايى دا ەكشەلدى. جاتتىعۋعا 250-دەن اسا ادام, 100-دەن اسا تەحنيكا جانە 5 تىكۇشاق جۇمىلدىرىلدى.
– بۇل فورماتتاعى وقۋ-جاتتىعۋ جۇمىستارى العاش رەت وتكىزىلىپ وتىر. ەگەر جاعداي كۇردەلى بولسا, بارلىق رەسپۋبليكالىق كۇش-قۋات جۇمىلدىرىلادى. ءبىز بۇگىن ورمان كودەكسىنە جانە ىلەسپە نورماتيۆتىك-قۇقىقتىق اكتىلەرگە وزگەرىستەردى ەنگىزۋدى تالاپ ەتەتىن نورمالار مەن زاڭنامالاردى تالقىلادىق, – دەيدى توتەنشە جاعدايلار مينيسترلىگىنىڭ ورتكە قارسى قىزمەت كوميتەتىنىڭ توراعاسى راميل كامالوۆ.
اۋقىمدى ءىس-شارانىڭ سوڭىندا ورمان جانە دالا ءورتىن ءسوندىرۋ تاسىلدەرى مەن تاكتيكاسى پىسىقتالدى.
اقمولا وبلىسى,
اقكول اۋدانى
