The Jerusalem Post
سەنبى كۇنى كەشكە تەل-اۆيۆتە وتكەن ءباسپاسوز ءماسليحاتىندا نەتانياحۋ يزرايلدىكتەردى «ۇزاق ءارى تاباندى» شابۋىلعا دايىندالۋعا شاقىرىپ, قاقتىعىستى ەلدىڭ 1948 جىلدان بەرگى «تاۋەلسىزدىك ءۇشىن ەكىنشى سوعىسى» دەپ اتادى.
"بۇل - سوعىستىڭ ەكىنشى كەزەڭى, ونىڭ ماقساتى ايقىن – حاماس-تىڭ باسشىلىعى مەن اسكەري مۇمكىندىكتەرىن جويىپ, كەپىلگە الىنعانداردى ۇيلەرىنە قايتارۋ. ءبىز ازىرگە باسىندامىز. الايدا جاۋدى جويامىز», دەدى نەتانياحۋ جۋرناليستەرگە.
نەتانياحۋدىڭ بۇل مالىمدەمەسى گازادا تۇندە ءيزرايلدىڭ قارقىندى بومبالاۋى, اسكەرلەردىڭ ىلگەرىلەۋ جولىن تازارتۋ ءۇشىن جالعاسقان كوممۋنيكاتسيالاردىڭ تولىقتاي ءۇزىلۋى كەزىندە ايتىلدى.
پالەستينا اقپارات قۇرالدارى جەكسەنبى كۇنى تەلەفون جانە ينتەرنەت بايلانىستارى بىرتىندەپ قالپىنا كەلتىرىلىپ جاتقانىن حابارلادى.
گازاداعى حان يۋنيس ءتىلشىسى تارەك ابۋ اززوۋم جۇما كۇنى ءيزرايلدىڭ بومبالاۋى شىعىس جانە سولتۇستىك ايماقتاردا كۇشەيگەنىن ايتتى.
«بۇل شابۋىلدار ءيزرايلدىڭ قۇرلىق كۇشتەرىنىڭ اۋماققا تەرەڭىرەك ىلگەرىلەۋىنە ىقپال ەتەدى», - دەدى ابۋ اززوۋم.
ەسكە سالايىق, 7 قازاندا گازا سەكتورىنان يزرايلگە مىڭداعان زىمىران اتىلعان بولاتىن. يزرايل قورعانىس كۇشتەرى (IDF) جاپپاي زىمىراندىق شابۋىلدى پالەستينالىق حاماس قوزعالىسى جاساعانىن مالىمدەدى.
يزرايل اسكەري بيلىگى لاڭكەستىككە قارسى «تەمىر قىلىشتار» وپەراتسياسىنىڭ باستالعانىن جازدى. ءيزرايلدىڭ ونداعان جويعىش ۇشاعى حاماس-تىڭ گازا سەكتورىنداعى نىساندارىنا سوققى بەردى, اتاپ ايتقاندا گازاداعى كوپقاباتتى ۇيلەرگە شابۋىل جاسادى. يزرايل ارمياسىنىڭ مالىمەتى بويىنشا, وندا حاماس-قا تيەسىلى اسكەري ينفراقۇرىلىم ورنالاسقان. پالەستينا اقپارات قۇرالدارىنىڭ حابارلاۋىنشا, وندا 100-گە جۋىق تۇرعىن ءۇي بولعان.
بۇكىل يزرايلدە توتەنشە جاعداي جاريالاندى.
22 قازاندا گازا سەكتورىنداعى اتقىلاۋ سالدارىنان قازاقستان ازاماتى قازا تاپتى.
دەپۋتات نۇريا نيازوۆا گازا سەكتورىنداعى قازاقستاندىقتاردى بايلانىسپەن قامتاماسىز ەتۋدى ۇسىندى. ەلدىڭ سىرتقى ىستەر مينيسترلىگىنىڭ حابارلاۋىنشا, گازا سەكتورىنداعى قازاقستاندىقتاردىڭ ناقتى سانى تۋرالى اقپارات ۇنەمى جاڭارتىلىپ وتىرادى.
يزرايل جۇما كۇنى كەشكە گازادا تەلەفون بايلانىسىن تولىقتاي ءۇزدى.
