فوتو: ۇكىمەت
«ەڭ الدىمەن, قازا تاپقان كەنشىلەردىڭ تۋىستارى مەن جاقىندارىنا قايعىرىپ كوڭىل ايتامىن. مارقۇمداردىڭ وتباسىلارىنا بارلىق قاجەتتى كومەك كورسەتىلەدى. زارداپ شەككەندەرگە تەزىرەك ساۋىعىپ كەتۋلەرىن تىلەيمىز. ولارعا تولىق كولەمدە مەديتسينالىق كومەك كورسەتىلىپ جاتىر», دەدى ءاليحان سمايىلوۆ.
وتىرىس بارىسىندا شاحتاداعى قازىرگى احۋال, قۇتقارۋ جۇمىستارىنىڭ بارىسى جانە وزگە دە قابىلدانىپ جاتقان شارالار تۋرالى تولىق اقپارات بەرىلدى.
پرەمەر-مينيستر كاسىپورىنداعى ونەركاسىپتىك قاۋىپسىزدىكتى قامتاماسىز ەتۋ بويىنشا جاعداي سول شەشىلمەگەن وتكىر كۇيىندە قالىپ وتىرعانىن اتاپ ءوتتى.
وتىرىس قورىتىندىسى بويىنشا ۇكىمەت باسشىسى قاراعاندى وبلىسىنىڭ اكىمدىگىنە تجم جانە باسقا دا مەملەكەتتىك ورگاندارمەن بىرلەسىپ, اپاتتى جويۋ جونىندە قاجەتتى شارالار قابىلداۋدى تاپسىردى.
سونىمەن قاتار پرەمەر-مينيستر اپات سەبەپتەرىن جان-جاقتى تەرگەۋ جانە كىنالىلەردى انىقتاۋ ماڭىزدى ەكەنىن اتاپ ءوتتى.
وعان قوسا ەڭبەك جانە حالىقتى الەۋمەتتىك قورعاۋ مينيسترلىگىنە اكىمدىكپەن جانە «ارسەلورميتتال تەمىرتاۋ» اق-مەن بىرلەسىپ, زارداپ شەككەن جانە قازا تاپقان كەنشىلەردىڭ وتباسىلارىنا كومەك كورسەتۋ, ال ونەركاسىپ جانە قۇرىلىس مينيسترلىگىنە كاسىپورىندى قازاقستان رەسپۋبليكاسىنىڭ پايداسىنا بەرۋ راسىمدەرىن اياقتاۋ جونىندە شارالار قابىلداۋ تاپسىرىلدى.
سونىمەن قاتار مەملەكەت باسشىسىنىڭ تاپسىرماسى بويىنشا كوميسسيانىڭ شەشىمىمەن ۆاديم باسين «ارسەلورميتتال تەمىرتاۋ» اق باس ديرەكتورىنىڭ مىندەتىن اتقارۋشى بولىپ تاعايىندالدى.
ۆ. باسين 2022 جىلعى قازان ايىنان باستاپ قاراعاندى وبلىسى اكىمىنىڭ ءبىرىنشى ورىنباسارى بولىپ جۇمىس ىستەيدى. ەڭبەك جولىن مەتاللۋرگيا كومبيناتىندا ەلەكترومونتەر بولىپ باستاعان. ۇلتتىق قۇرىلتاي مۇشەسى, «قازاقستاننىڭ ەڭبەك ەرى» اتاعىنىڭ يەگەرى.
