فوتو: اشىق دەرەككوز
«ساعات 16:00-دەگى جاعداي بويىنشا 32 ادامنىڭ ءمايىتى تابىلدى, 14 كەنشى ءالى دە ىزدەستىرىلىپ جاتىر», دەلىنگەن حابارلامادا.
«ارسەلورميتتالتەمىرتاۋ» اق كومىر دەپارتامەنتىنىڭ كوستەنكو اتىنداعى شاحتاداعى اۆاريالىق-قۇتقارۋ جۇمىستارىنا «كاسىبي اسكەريلەندىرىلگەن اۆاريالىق-قۇتقارۋ قىزمەتتەرىنىڭ رەسپۋبليكالىق ورتالىق شتابى» جشس قاراعاندى فيليالىنىڭ تاۋ-كەن قۇتقارۋشىلارى جۇمىلدىرىلدى.
گاز جاعدايىن باقىلاۋ, سىنامالاردى الۋ, سونداي-اق تابىلعان مايىتتەردى شىعارۋ جۇمىستارى جۇرگىزىلىپ جاتىر. «ارسەلورميتتال تەمىرتاۋ» اق كومىر دەپارتامەنتى شاحتالارىنىڭ جۇمىسى ءبىر تاۋلىككە توقتاتىلدى. وسى ۋاقىت ىشىندە گازدان قورعاۋ قۇرىلعىلارى تەكسەرىلەدى.
ەسكە سالايىق, «ارسەلورميتتال تەمىرتاۋ» اق-عا قاراستى كوستەنكو شاحتاسىنان ءورت شىقتى. پرەزيدەنت ۇكىمەتكە «ارسەلورميتتالتەمىرتاۋ» كومپانياسىمەن ينۆەستيتسيالىق ىنتىماقتاستىقتى توقتاتۋدى تاپسىردى. باس پروكۋراتۋرا اتالعان ىسكە قاتىستى سوتقا دەيىنگى تەرگەپ-تەكسەرۋدى باستادى. مەملەكەت باسشىسىنىڭ تاپسىرماسىنا سايكەس پرەمەر-مينيستر ءاليحان سمايىلوۆتىڭ توراعالىعىمەن قاراعاندى وبلىسىندا «ارسەلورميتتال تەمىرتاۋ» اق-نىڭ كوستەنكو اتىنداعى شاحتاسىندا ورىن العان اپاتتىڭ سەبەپتەرىن تەرگەۋ جانە ونىڭ سالدارىن جويۋ جونىندەگى ۇكىمەتتىك كوميسسيا قۇرىلدى. مەملەكەت باسشىسى قاسىم-جومارت توقاەۆ اپاتتىڭ ءمان-جايىن انىقتاپ, ءتيىستى شەشىم قابىلداۋ ءۇشىن قاراعاندى وبلىسىنداعى قايعىلى وقيعا ورىن العان جەرگە باردى. 29 قازان ەلىمىزدە جالپىۇلتتىق ازا تۇتۋ كۇنى دەپ جاريالاندى.
