كاسىپتىك كوللەدجدى ءتامامداپ, 18 جاسىنان باستاپ اۋىلدىق پوشتا بولىمىنە جۇمىسقا ورنالاسقان ول وسى كۇنى اۋدان ورتالىعىنداعى شامامەن جالپى ۇزىندىعى 10 شاقىرىمدى قۇرايتىن 27 كوشەدەگى 1 300 تۇتىنگە 500-دەن اسا گازەت, 100 شاقتى جۋرنال مەن حات-حابار, سالەم-ساۋقات پەن زەينەتاقىسىن ۋاقتىلى جەتكىزۋدى ءوز جاۋاپكەرشىلىگىنە العان. ونى تاراتىپ بىتپەيىنشە وليانىڭ دامىل تاپپايتىنى انىق.
«1988 جىلدان بەرى وسى سالادا ەڭبەك ەتىپ كەلەمىن. گازەت-جۋرنال تاراتۋدىڭ قيىنشىلىعى از ەمەس. ءارتۇرلى جاعداي كەزدەسىپ جاتادى. يتتەن دە, ادامنان دا قورقاتىن جايتتار بولادى. يىعىمىزعا ارقالايتىن جۇكتىڭ دە سالماعى جەڭىل ەمەس. سوعان قاراماستان وقىرمانعا جازىلعان گازەت-جۋرنالىن كەشىكتىرمەي قولىنا تابىستاۋعا تىرىسامىز. «كوڭىل كوڭىلدەن سۋ ىشەدى» دەمەكشى, جاياۋلاپ جۇرەتىن جۇمىسىمىزعا العىس جاۋدىراتىن كەڭپەيىل تۇرعىنداردىڭ تىلەگىنە قاناتتانىپ, كوڭىلىمىز مارقايىپ قالاتىن كەزدەر دە جوق ەمەس. وسى جۇمىسىم ارقىلى اۋىلداستارىمدى تۇگەلگە جۋىق تانىپ الدىم», دەيدى تاجىريبەلى پوشتاشى و.دىلدەباەۆا.
جىل ون ەكى ايداعى اۋا رايىنىڭ قۇبىلمالىعى مەن قيىندىعىنا مويىماي كوشە ارالايتىن ەڭبەگى ەسكەرۋسىز قالماعان ولگا قالىشبەكقىزى تاباندىلىعى ءۇشىن 2013 جىلى «ۇزدىك بايلانىسشى» توسبەلگىسىن العان ەكەن. بۇعان قوسا مەرەكەلىك شارالاردا يەلەنگەن العىسحاتتارى دا بار. بۇگىندە تاجىريبەلى پوشتاشى عانا ەمەس, جەتكىزۋ ۋچاسكەسىنىڭ بريگاديرى بولىپ تاعايىندالعان. ماراپاتتىڭ ەڭ ۇلكەنى تۇتىنۋشىلاردىڭ العىسى ەكەنىن ايتقان وليا بيىل ءوزىنىڭ جۇمىسىن جەڭىلدەتۋ ءارى جىلدامداتۋ ماقساتىندا ەلەكتروموپەد ساتىپ العان ەكەن. زاماناۋي تەحنيكانى تىزگىندەگەن ولياعا قىزىعا قارايتىندار وسى كۇنى العىسپەن قاتار, اق جول تىلەۋدى ادەتكە اينالدىرعان.
«وقۋشى شاعىمىزدا پوشتاعا بارىپ, ءبىر قۇشاق گازەت-جۋرنالدى ۇيگە اكەلۋشى ەدىك. جانە وسى ءبىر ادەمى ءساتتىڭ ءوز راقاتى بار. كەيدە ۇيگە جەتكەنشە گازەتتى اقتارىپ, ماقالالاردى وقىپ تاستايتىنبىز. پوشتا تەرەزەسىنەن وليا تاتەمىز قول بۇلعاپ, ك ۇلىمدەپ قارسى الاتىن. مىنە, بيىل پوشتادا اقادال قىزمەت ەتىپ جاتقانىنا 36 جىل تولىپتى. ەشكىمگە نازدانبايدى. ۇزىناعاشتى بەس ساۋساعىنداي بىلەدى», دەيدى ارىپتەسىمىز الماس سادۋاقاس.
جۇزىنەن مەيىرىم توگىلىپ تۇراتىن پوشتاشىنىڭ ەڭبەكقورلىعى مەن ادامگەرشىلىگى ءالى تالاي تاقىرىپقا ارقاۋ بولارى اقيقات.
الماتى وبلىسى
