سەلەن – الەمدىك مەتالل نارىعىندا جوعارى سۇرانىسقا يە جانە سيرەك كەزدەسەتىن ماتەريال. بىلۋىمىزشە, ونى ءوندىرۋ, تازارتۋ قيىن. ال ق.ساتباەۆ ۋنيۆەرسيتەتى مەتاللۋرگيا جانە بايىتۋ ينستيتۋتىنىڭ عالىمدارى ازىرلەگەن تەحنولوگيا ءبىر كەزەڭدە قۇرامىندا 99,5 پايىزدان اساتىن نەگىزگى كومپونەنتى بار تازا سەلەندى ارزان, رەاگەنتسىز تاسىلمەن الۋعا مۇمكىندىك بەرەدى. ياعني ەلىمىزدە وندىرىلەتىن تازا سەلەننىڭ قۇنى شەتەلدىكىنەن تومەن بولادى. سەلەن ەلەكترونيكا, كۇن باتارەيالارى, مەديتسينا جانە باسقا سالالاردا قولدانىلادى.
– وسى ۋاقىتقا دەيىن ەلىمىزدە نەگىزگى قۇرامداس بولىگى از مولشەردەگى شيكى سەلەن عانا ءوندىرىلدى. قازىر جاڭا تەحنولوگيا دامىعاننان كەيىن قازاقستان جوعارى تەحنولوگيالىق ءونىم شىعاراتىن ەلدەردىڭ قاتارىنا ەندى, – دەيدى ساتباەۆ ۋنيۆەرسيتەتى مەتاللۋرگيا جانە وڭدەۋ ينستيتۋتىنىڭ ديرەكتورى باعداۋلەت كەنجاليەۆ.
جوبا عىلىم كوميتەتىنىڭ قولداۋىمەن جۇزەگە اسىرىلعان. مەملەكەت باسشىسى قاسىم-جومارت توقاەۆ ەلدە جىلدار بويى عىلىمعا ءتيىستى كوڭىل بولىنبەگەنىن ءجيى ايتادى. سول سەبەپتى دە وسىنداي جەتىستىكتەرگە قانشاما جىل بويى جەتە المادىق. ساتباەۆ ۋنيۆەرسيتەتىنىڭ عالىمدارى ويلاپ تاپقان وسى ءادىس نەگىزىندە بالقاشتا «Kazakhmys Progress» كومپانياسىنىڭ تازا سەلەن وندىرەتىن تسەحى دا اشىلعان. زاماناۋي ءوندىرىستىڭ اشىلۋى عىلىم مەن ءوندىرىستىڭ بىرىگۋىنە سەپتىگىن تيگىزىپ, ەل عىلىمىن جاڭاشا جولعا باستايدى.
