2023 جىلدىڭ تامىز ايىندا استانا-ىستانبۇل باعىتىنىڭ جولاۋشىسى جول جۇگىنەن 19 مىڭ اقش دوللارى سوماسىندا اقشالاي قاراجاتىنىڭ جوعالعانىن بايقاپ ارىزدانعان. ءدال وسىنداي شاعىم استانا-دۋباي باعىتىنداعى اۋە رەيسىنىڭ جولاۋشىسىنان دا تۇسكەن. بۇل جولى 7 800 اقش دوللارى جوعالعان ەدى.
ۇرلىق فاكتىسىن اشكەرەلەۋ ماقساتىندا كولىك پوليتسەيلەرى كولىك پروكۋراتۋراسىمەن بىرلەسىپ, اۋە ايلاعىندا جۇك تيەۋشى بولىپ جۇمىس ىستەگەن 6 ادامدى ۇستادى. ولار وزگە ادامداردىڭ اقشاسىن قولدى قىلعاندارىن مويىندادى.
«اقشا ۇرلاۋ فاكتىسىنە قاتىسى بار قىزمەتكەرلەردىڭ ارەكەتى ديستسيپلينارلىق كوميسسيانىڭ قاراۋىنا الىندى. ودان بولەك قۇزىرلى ورگاندار تەرگەۋ امالدارىن جۇرگىزىپ جاتىر. تەرگەۋ اياقتالىپ, سوت شەشىمى شىققانان سوڭ قىزمەتكەرلەردىڭ جۇمىستا قالۋ-قالماۋى بەلگىلى بولادى. قازىر اتالعان ىسكە قاتىسى بار اۋەجاي قىزمەتكەرلەرى جۇمىستا جوق», دەيدى استانا حالىقارالىق اۋەجايىنىڭ رەسمي وكىلى, PR ءبولىمىنىڭ باسشىسى تويگۇل جۇبانىسوۆا.
ايتا كەتسەك, اۋە ايلاعىنىڭ جۇك بولىمشەسى تولىقتاي بەينەباقىلاۋ كامەرالارىمەن جابدىقتالعان. دەسە دە جولاۋشىلاردىڭ جۇگى پەرروندا باگاج لەنتاسىنان ۇشاقتىڭ جۇك بولىمىنە وتكەندە «كورىنبەيتىن ايماققا» ءتۇسىپ قالاتىن كورىنەدى.
«ۇشاقتاردىڭ جۇك ءبولىمى بەينەباقىلاۋ كامەرالارىمەن جابدىقتالماعان. كەلەڭسىز جاعدايلاردىڭ الدىن الۋ جانە ۇرلىق فاكتىلەرىن ازايتۋ ماقساتىندا اۋەجاي اكىمشىلىگى «كورىنبەيتىن ايماقتارعا» كامەرا ورناتۋ جۇمىستارىن پىسىقتاپ جاتىر. جولاۋشىلاردان قۇندى زاتتارىن جول جۇگىندە الىپ ءجۇرۋىن سۇرايمىز», دەپ قوستى اۋەجاي وكىلى.
