بۇگىندە ماڭعىستاۋ وبلىسى – قازاقستان بويىنشا تابيعي گازدى ەڭ كوپ تۇتىناتىن ايماق. اتاپ ايتقاندا, وتكەن جىلى وبلىس 2,8 ملرد تەكشە مەتر كوگىلدىر وتىن تۇتىنعان, بۇل رەسپۋبليكانىڭ ىشكى نارىعىنداعى جالپى قاجەتتىلىكتىڭ 19%-ىن قۇرايدى.
«بەينەۋ-جاڭاوزەن» ماگيسترالدى گاز قۇبىرىنىڭ ەكىنشى جەلىسىن ىسكە قوسۋ ەلدى مەكەندەردى, ءىرى ونەركاسىپتىك نىسانداردى, سونداي-اق جىلۋ جانە ەلەكتر قۋاتىن وندىرەتىن ماڭعىستاۋ وبلىسىنىڭ باس ەنەرگەتيكالىق كاسىپورنى – «ماەك» جشس-نى گازبەن تۇراقتى تۇردە قامتاماسىز ەتۋگە مۇمكىندىك بەرەدى.
ءاليحان سمايىلوۆ ءوز سوزىندە اتالعان جوبا مەملەكەت باسشىسىنىڭ تاپسىرماسى بويىنشا ىسكە اسىرىلعانىن جانە ءوڭىردىڭ ەكونوميكالىق دامۋى ءۇشىن ۇلكەن ماڭىزعا يە ەكەنىن اتاپ ءوتتى.
ماسەلەن, «بەينەۋ-جاڭاوزەن» گاز قۇبىرىنىڭ ەكىنشى جەلىسىنىڭ وتكىزۋ قابىلەتى جىلىنا 5,8 ملرد تەكشە مەتردى قۇرايدى. بۇعان دەيىن «وكارەم-بەينەۋ» گاز قۇبىرىنىڭ اتالعان باعىت بويىنشا وندىرىستىك قۋاتى شامامەن 3 ملرد تەكشە مەتر عانا بولاتىن. ەندى ەكى گاز قۇبىرىنىڭ جالپى وتكىزۋ قابىلەتى جىلىنا شامامەن 9 ملرد تەكشە مەترگە جەتەدى, بۇل ءوڭىر قاجەتتىلىكتەرىن تولىعىمەن جابادى.
«كوگىلدىر وتىندى ۇزدىكسىز جەتكىزۋ ماڭعىستاۋ وبلىسىنىڭ ەكونوميكالىق دامۋىنا بەلسەندى ىقپال ەتەدى. سونىمەن قاتار اتالعان جوبا ەلىمىزدىڭ ەنەرگەتيكالىق قاۋىپسىزدىگىن نىعايتا تۇسەدى», دەدى ءاليحان سمايىلوۆ.
نىسان قۇرىلىسى كەزىندە ماگيسترالدى قۇبىرلاردى سالۋ سالاسىنداعى زاماناۋي تەحنولوگيالار, سونداي-اق كورروزيادان قورعاۋدىڭ سەنىمدى قۇرالدارى پايدالانىلدى. بۇل رەتتە وتاندىق تاۋار وندىرۋشىلەردىڭ جابدىقتارى مەن ماتەريالدارى تارتىلدى.
«QazaqGaz» ۇلتتىق كومپانياسىنىڭ باسقارما توراعاسى سانجار جاركەشوۆ اتاپ وتكەندەي, «بەينەۋ-جاڭاوزەن» جاڭا گاز قۇبىرىن سالۋ جوباسىنا «QazaqGaz» جانە «سامۇرىق-قازىنا» اق-نىڭ جەكە قاراجاتى ەسەبىنەن شامامەن 180 ملرد تەڭگە ينۆەستيتسيا تارتىلدى.
«بۇل ماڭعىستاۋ وبلىسىنىڭ ەكونوميكالىق دامۋى مەن ەنەرگەتيكالىق قاۋىپسىزدىگىنە قوسىلعان قوماقتى ۇلەس», دەدى ول.
سونىمەن قاتار «جاڭاوزەن-جەتىباي-اقتاۋ» ءىرى گاز قۇبىرىنىڭ ءۇش جەلىسىن كۇردەلى جوندەۋ جۇمىستارى اياقتالدى. بۇل – «بەينەۋ-جاڭاوزەن» ەكىنشى جەلىسىنىڭ ىسكە قوسىلۋىمەن بىرگە ماڭعىستاۋ وبلىسىنىڭ گاز تاسىمالداۋ جۇيەسىن جاڭعىرتۋداعى ۇلكەن قادام.
ءوڭىر اكىمى نۇرلان نوعاەۆ اتالعان جوبالاردى ىسكە اسىرۋ شاعىن جانە ورتا بيزنەستى دامىتۋعا ىقپال ەتەتىنىن, سونداي-اق جالپى ماڭعىستاۋ ءۇشىن جاڭا مۇمكىندىكتەر اشاتىنىن باسا ايتتى.
«مەملەكەت باسشىسى جۇمىس ساپارى بارىسىندا ءوڭىردى گازبەن ۇزدىكسىز قامتاماسىز ەتۋدى تاپسىرعان بولاتىن. ماگيسترالدى گاز قۇبىرلارىنىڭ قۇرىلىسى مەن جوندەۋ جۇمىستارىن مەرزىمىندە ءارى تولىق اياقتاعان «QazaqGaz» كومپانياسىنا ماڭعىستاۋ وبلىسىنىڭ تۇرعىندارى اتىنان العىسىمدى بىلدىرەمىن», دەدى نۇرلان نوعاەۆ.
«بارشاڭىزدى وسى ماڭىزدى جوبالاردىڭ اياقتالۋىمەن قۇتتىقتايمىن», دەپ سالتاناتتى ءىس-شارانى قورىتىندىلادى ءاليحان سمايىلوۆ.
سالتاناتتى ءىس-شاراعا ورتالىق جانە جەرگىلىكتى اتقارۋشى مەملەكەتتىك ورگانداردىڭ, «سامۇرىق-قازىنا» اق, «QazaqGaz» ۇلتتىق كومپانياسىنىڭ باسشىلارى, گاز سالاسىنىڭ جۇمىسشىلارى مەن ارداگەرلەرى قاتىستى.
