كورىكتى كەلبەتى تالايدى تامسانتقان جالاڭاش اۋىلىنداعى كەگەن اۋدانى بويىنشا تەحنيكالىق, شىعارماشىلىق جانە كاسىبي باعدار بەرۋ ورتالىعىنىڭ بەينەلەۋ ونەرى ۇيىرمەسىنە بۇل كۇنى مەكتەپ وقۋشىلارىنىڭ قىزىعۋشىلىعى ارتا تۇسكەن. وعان سان بوياۋلى ونەردى ءسۇيۋ مەن ونى تۇسىنۋگە دەگەن تالپىنىستارى سەبەپ.
«الەمدە بايقامپاز ەكى توپ بار, ءبىرى – سۋرەتشى, ەكىنشىسى – بالا» دەگەن. ەكەۋى دە ءبىر وبەكتىگە قارايدى. نەگە ولاي, نەگە بۇلاي دەپ زەرتتەيدى. بىلمەگەنىن سۇرايدى, ىزدەنەدى. وسى زەردەلەۋ ولاردىڭ لوگيكالىق ويلاۋ جۇيەسىن دامىتادى. اتا-انالار, ۇستازدار وسى جۇيەنىڭ ءارى قاراي ورىستەۋىنە جول اشۋى كەرەك. ەستە ساقتاۋ قابىلەتىن دامىتۋدىڭ جولى ولەڭ جاتتاۋ بولسا, كاسىپتىك باعىتتاعى تالانتىن اشۋ شىدامدىلىق پەن ىزدەنىستى, ەڭبەكتى قاجەت ەتەدى», دەگەن ۇلاعاتى مول ۇستاز بولات سارسەنباي شاكىرتتەرىن ءاردايىم تاباندىلىققا, تابىستى بولۋعا باۋلىپ كەلەدى.
بۇگىندە وزىنەن ءتالىم الىپ جۇرگەن 30-دان استام بالدىرعاننىڭ تالانتىن اشىپ, سۋرەتشىلىك شەبەرلىگىن شىڭداۋ ناتيجەسىندە ولاردىڭ 20-عا جۋىعى رەسپۋبليكالىق كوركەمسۋرەت بايقاۋلارىنا قاتىسىپ, 4-ەۋى باس جۇلدە يەلەنگەنىن ايرىقشا اتاعىمىز كەلەدى.
جالپى, ونەرگە قۇشتار وقۋشىلاردىڭ اراسىندا ۇزدىكتەر كوپتەپ كەزدەسەتىنىن اڭگىمە ارقاۋى ەتكەن بولات جاپسارباي ۇلى فينليانديادا وقۋشىلاردىڭ دەنى قوسىمشا بىلىممەن قامتاماسىز ەتىلەتىندىگىن, سونىڭ ارقاسىندا ءار فين ازاماتىنىڭ سان قىرلى تالانتى اشىلىپ, تۇلعالىق قاسيەتكە يە بولاتىندىعىن تىلگە تيەك ەتە كەلە, مۇنداي مۇمكىندىكتەن اۋىل بالالارى شەت قالماعاندىعىن اتاپ ءوتتى.
«بولام دەگەن بالانىڭ بەتىن قاقپا, بەلىن بۋ» دەگەن دانالىقتى تەمىرقازىق ەتكەن سۋرەتشى-ۇستاز تاۋەلسىز ەلىمىزدىڭ تالانتتى ۇل-قىزدارىنىڭ قيالىنا قانات بىتىرۋمەن قاتار, سۋرەتشىلىك ونەردىڭ قىر-سىرىنا قانىعۋىنا بارىنشا ىقپال ەتىپ كەلەدى. بالعىن سۋرەتشىلەردى تابيعات توسىنە شىعارىپ, ۇشقان قۇس, تەربەلگەن گۇلدىڭ قيمىل-قوزعالىسى مەن اۋىلدىڭ تىنىس-تىرشىلىگىن قالت جىبەرمەي, قاعاز بەتىندە ورنەكتەۋگە ۇيرەتۋدەن جالىقپايدى.
الماتى وبلىسى
