فوتو: اقوردا
مەملەكەت باسشىسى تۇركىستاندا وتكەن قۇرىلتايداعى سويلەگەن سوزىندە جاڭا قوعامدىق ەتيكا تۋرالى ايتقانىن, القالى جيىننان سوڭ قۇرىلتايدىڭ كەيبىر مۇشەلەرى ۇسىنىستارىن جولداعانىن, ولار ەلىمىزدە قۇندىلىقتار جۇيەسىن قالىپتاستىرۋ قاجەتتىگىنە نازار اۋدارىپ وتىرعانىن ايتتى. «شىن مانىندە, مۇنى وتە ماڭىزدى باستاما دەپ ويلايمىن. ونى جان-جاقتى تالقىلاپ, قاراستىرۋىمىز كەرەك», دەدى پرەزيدەنت.
«مەن بۇعان دەيىن ادال ازامات ۇعىمىن ۇسىندىم. وسى ورايدا جاستارىمىزعا ارنايى ۇندەۋ جولداعىم كەلەدى. ەلىمىزدە جۇزەگە اسىرىلىپ جاتقان ءاربىر باستاما, ەڭ الدىمەن, سىزدەرگە ارنالادى. قازىرگى رەفورمالاردىڭ يگىلىگىن كورەتىن دە, ەلدىك ىستەردى جالعاستىراتىن دا – سىزدەر», دەدى مەملەكەت باسشىسى.
پرەزيدەنت بۇگىنگى جاستاردى قازاقستاننىڭ كەلبەتى دەۋگە بولاتىنىن, شىن مانىندە, كەز كەلگەن مەملەكەت تۇرعىندارىنا قاراپ باعالاناتىنىن, ياعني, ءبىزدىڭ قانداي ەل بولارىمىز وسكەلەڭ ۇرپاققا بايلانىستى ەكەنىن اتاپ ءوتتى.
«سوندىقتان جاستارىمىز وتانشىل, ءبىلىمپاز, ەڭبەكقور, ۇنەمشىل, ءادىل ءارى جاناشىر بولۋى قاجەت. جاستار سپورتپەن, دەنە شىنىقتىرۋمەن اينالىسۋى كەرەك. مەن مۇنى ۇنەمى ايتىپ ءجۇرمىن. وسى قۇندىلىقتاردى بارىنشا ناسيحاتتاپ, تاراتۋ قاجەت. سوندا جەكە ادامنىڭ قاسيەتى تۇتاس ۇلتتىڭ قاسيەتىنە اينالادى», دەدى پرەزيدەنت.
جاستار كەز كەلگەن وزگەرىسكە بەيىم بولاتىنىن, ءار نارسەنى بويىنا تەز سىڭىرەتىنىن اتاپ وتكەن پرەزيدەنت: «مەن سىزدەردى جاقسىدان ۇيرەنۋگە, جاماننان جيرەنۋگە شاقىرامىن. ۇلى اباي ايتقان بەس نارسەدەن قاشىق, بەس نارسەگە اسىق بولىڭىزدار. سىزدەر دارىپتەگەن قۇندىلىقتار قوعامدا تەز ورنىعادى. سىزدەر قولداعان وزگەرىستەر جىلدام جۇزەگە اسادى. ءبارىمىزدىڭ تىلەگىمىز – ءبىر, بۇل – قوعامىمىزدا جاپپاي ادىلەتتىك ورناتۋ. ەندەشە, ماقساتىمىزعا بىرگە جەتەيىك», دەدى.
پرەزيدەنت جاس ۇرپاقتىڭ جاسامپازدىق قۋاتىنا سەنەتىنىن, سانالى ۇل-قىزدارى بار قازاقستان وركەنيەت كوشىنىڭ باسىندا بولارىن تىلگە تيەك ەتتى.
«مەملەكەتتىلىك تۇعىرىن نىعايتا ءتۇسۋ ءۇشىن زاڭ ۇستەمدىگىن ورنىقتىرۋ وتە ماڭىزدى. تارتىپكە باعىنعان قوعام وركەنيەتتى بولادى. بۇل – زاڭدىلىق. ءار ازامات ەلىمىزدىڭ زاڭىن قۇرمەتتەسە, بەرەكە-بىرلىك تە, باقۋاتتى تۇرمىس تا بولادى. ادىلەتتى قازاقستاندى قۇرۋ ءۇشىن قۇقىقتىق مادەنيەتتى دامىتۋ قاجەت. زاڭسىزدىق, تارتىپسىزدىك, مادەنيەتسىزدىك ەلدى جارعا جىعادى. مۇنداي جاعىمسىز ۇردىستەرگە بۇكىل قوعام بولىپ قارسى تۇرۋىمىز كەرەك. وسىنى ساناعا مىقتاپ سىڭىرگەن ءجون», دەدى مەملەكەت باسشىسى.
