بايقاۋعا 14 نوميناتسيا بويىنشا 70-تەن اسا ءوتىنىم تۇسكەن. ونىڭ ىشىندە 10-ى مادەنيەت جانە ونەر, 31-ءى ادەبيەت, ال 30-ى جۋرناليستيكا سالاسى بويىنشا اۆتورلىق جۇمىستار مەن جوبالار. كىل مىقتىلاردى «قازمەديا» ورتالىعىندا مادەنيەت جانە اقپارات ءمينيسترى ايدا بالاەۆا مەن قازاقستان حالقى اسسامبلەياسى توراعاسىنىڭ ورىنباسارى مارات ءازىلحانوۆ ارنايى ماراپاتتادى.
– ماڭىزدى ۇلتتىق مەرەكە قارساڭىندا ءبىز مادەنيەتارالىق جانە ەتنوسارالىق بىرلىكتى نىعايتۋعا ۇلەس قوسقان وتانداستارىمىزدىڭ ەڭبەگىن ماقتانىشپەن اتاپ وتكىمىز كەلەدى. پرەزيدەنت قاسىم-جومارت توقاەۆتىڭ بيىل قازاقستان حالقى اسسامبلەياسىنىڭ سەسسياسىنداعى تاپسىرماسىنا سايكەس «مادەنيەت جانە ونەر سالاسىنداعى ۇزدىك تۋىندىلار» جانە «ادەبيەت پەن جۋرناليستيكا سالاسىنداعى ۇزدىك جۇمىستار» اتاۋىمەن ارنايى سىيلىقتار تاعايىندالدى. بۇل ماراپات جۋرناليستەر, جازۋشىلار مەن ونەر ادامدارى ءۇشىن ەڭ قۇرمەتتى جانە بەدەلدى سىيلىقتىڭ ءبىرى بولاتىنىنا سەنىمدىمىن. سونداي-اق ەلىمىزدە ەتنوسارالىق كەلىسىمدى قامتاماسىز ەتۋدىڭ جاڭا جانە ءتيىمدى قۇرالى بولادى. ويتكەنى سىيلىق سالا ازاماتتارى ءۇشىن تىڭ سەرپىن بەرەدى ءارى ەتنوسارالىق سالانىڭ دامۋىن جاڭا دەڭگەيگە كوتەرەدى. مەملەكەت باسشىسى, بەيبىتشىلىك پەن كەلىسىم ءبىزدىڭ قوعامدىق جانە ەڭبەك قىزمەتىمىزدىڭ اجىراماس بولىگى بولۋعا ءتيىس ەكەنىن اتاپ ءوتتى. بۇل ماڭىزدى يدەيا كونكۋرستىڭ قازىرگى جانە بولاشاق قاتىسۋشىلارى ءۇشىن ۇلكەن ميسسيا بولادى دەپ سەنەمىز, – دەدى ايدا بالاەۆا.
«ۇزدىك كىتاپحانا جوباسى» اتالىمى بويىنشا نۇريا بايمۇراتوۆا برايل جۇيەسى بويىنشا قازاق, ورىس جانە اعىلشىن تىلدەرىندەگى «قازاق حالىق ەرتەگىلەرى» جوباسىمەن جەڭىمپاز اتاندى. «ۇزدىك فيلم» (كينو ونەرى) نوميناتسياسىنا ءسابيت قۇرمانبەكوۆ «كومپوزيتور» كوركەم فيلمىمەن يە بولدى. دينارا مىڭجاسارقىزىنىڭ «Soile» ايدارى بويىنشا ماقالا-سۇحباتتار توپتاماسى» ينتەرنەت-جوباسى جەڭىمپاز دەپ تانىلدى. قازىلار القاسىنىڭ نازارىنا «ۇزدىك باعدارلاما» (مۋزىكا) بويىنشا « ۇلى دالا مۇراسى» جوباسى دا ىلىكتى.
– ەجەلگى ساق, عۇن ءداۋىرىنىڭ كوستيۋمدەرىن تىگىپ جۇرگەنىمە, جالپى كيىم ديزاينى سالاسىندا 40 جىلدان اسا تاجىريبەم بار. وسى ۋاقىت ارالىعىندا ەلىمىزدە قازاقتىڭ ءتول ونەرىن ناسيحاتتاۋ, كيىم-كەشەگىن دارىپتەۋ, ىلگەرىلەتۋ ماقساتىندا ءبىراز جۇمىس ىستەلدى. بۇل مەنىڭ پارىزىم ىسپەتتى, – دەدى قازاقستاننىڭ ەڭبەك سىڭىرگەن قايراتكەرى, ۇلتتىق برەند ديزاينەرى ءمۇسلىم جۇماعاليەۆ.
ادەبيەت سالاسىنان ۇزدىك پروزا رەتىندە نۇرجان قۋانتاەۆتىڭ «ومارتانىڭ ويرانى» تۋىندىسى, ال بالالار ادەبيەتىنەن پاتيگۇل ماحساتوۆانىڭ «مەن ادەپتى بالامىن», بەيبىت سارىبايدىڭ «دياديا ۆانيا» شىعارماسى وزىق دەپ تانىلدى.
جۋرناليستيكا سالاسىنان «كازاحستان بەز گرانيتس» راديو جوباسىمەن تاتيانا ءجاندىلدينا, تەلەارناداعى «ەدينىي نارود» جۇمىسىمەن نادەجدا بەلوۆا ماراپاتتالدى.
«پوەزيا» نوميناتسياسى بويىنشا «اراراتتان ەسكەن لەپ» شىعارماسىنىڭ اۆتورى ەرتاي اشىقباەۆ جەڭىمپاز اتاندى.
ەستەرىڭىزگە سالا كەتەيىك, مەملەكەت باسشىسىنىڭ باستاماسىمەن تاعايىندالعان سىيلىق ەكى جىلدا ءبىر رەت بەرىلەدى.
