سالتاناتتى ءىس-شارا بارىسىندا قازاقستان رەسپۋبليكاسىنىڭ شالعاي ايماقتارىنداعى حالىقتى ونكولوگيالىق سكرينينگتىك جانە پروفيلاكتيكالىق تەكسەرۋدى دەر كەزىندە جۇزەگە اسىرۋعا باعىتتالعان «QH دەنساۋلىق جولى» قايىرىمدىلىق جوباسىنىڭ تۇساۋكەسەرى ءوتتى. جوبا اياسىندا ءوڭىردىڭ ءۇش وبلىستىق ونكولوگيالىق ورتالىقتارىنا جىلجىمالى مەديتسينالىق كەشەندەر ساتىپ الۋى جوسپارلانىپ وتىر.
مەديتسينالىق قۇرال-جابدىقتارمەن قامتىلعان 2 كولىكتەن تۇراتىن جىلجىمالى مەديتسينالىق كەشەن الماتى وبلىستىق كوپسالالى ەمحاناسىنا سالتاناتتى تۇردە بەرىلدى.
«OPTIMA» جىلجىمالى مەديتسينالىق كەشەنى توموسينتەز فۋنكتسياسى بار ساندىق مامموگرافيالىق جابدىقپەن, ساراپشىلىق دەڭگەيدەگى ۋلترادىبىستىق جۇيەمەن جانە جوعارى دەڭگەيدە زەرتتەيتىن كومپيۋتەرلىك توموگرافپەن جابدىقتالعان. كەشەننىڭ قۇنى 1,091 ملن تەڭگەنى قۇرايدى. بۇل مەديتسينالىق كەشەن ەكى كولىكتەن تۇرادى, ونىڭ بىرەۋى 128 كەسىندىلىك كومپيۋتەرلىك توموگرافپەن, ەكىنشىسى تسيفرلىق مامموگرافيالىق اپپاراتپەن جانە ۋدز اپپاراتىمەن جابدىقتالعان. ەكى قۇرال دا جاپونيادا جاسالعان. كولىكتەر قاتەرلى ىسىك سكرينينگىنە ارنالعان. مۇنداي كلاستاعى جانە كونفيگۋراتسياداعى مەديتسينالىق جابدىق قازاقستاندا العاش قولدانىسقا بەرىلىپ وتىر.
شاراعا الماتى وبلىسىنىڭ اكىمى مارات سۇلتانعازيەۆ, «قازاقستان حالقىنا» قوعامدىق قورىنىڭ باسشىسى بولات جامىشەۆ جانە قازاق ونكولوگيا جانە راديولوگيا عىلىمي-زەرتتەۋ ينستيتۋتىنىڭ ديرەكتورى, ەلىمىزدىڭ باس شتاتتان تىس ونكولوگى ديليارا قايداروۆا قاتىستى.
«بۇگىندە ەلدە شالعاي اۋىلداردىڭ تۇرعىندارىن ونكولوگيالىق سكرينينگتىك تەكسەرۋلەرمەن قامتۋ دەڭگەيى تومەن. ءموبيلدى مەديتسينالىق كەشەندەر, اسىرەسە قاتەرلى ىسىككە شالدىعۋى مۇمكىن ناۋقاستارعا جوعارى تەحنولوگيالىق كونسۋلتاتيۆتىك-دياگنوستيكالىق كومەككە قولجەتىمدىلىكتى ارتتىرىپ, تومەن دوزالى كومپيۋتەرلىك توموگرافيانى قولدانۋ ارقىلى سكرينينگتىك تەكسەرۋلەردى ۋاقتىلى وتكىزۋگە ىقپال ەتەدى», دەدى «قازاقستان حالقىنا» قق توراعاسى بولات جامىشەۆ.
«QH دەنساۋلىق جولى» جوباسىن قازاقستان رەسپۋبليكاسىنىڭ قاناتقاقتى ايماقتارى – الماتى, قىزىلوردا جانە اقتوبە وبلىستارىندا ىسكە اسىرۋ ارقىلى حالىقتى قامتۋ كولەمىن جانە ناۋقاستاردا, اسىرەسە ەرتە (0–1 كەزەڭدەرىندە) ونكولوگيالىق اۋرۋلاردى انىقتاۋدى ارتتىرادى دەگەن ءۇمىت بار. جوبانى جۇزەگە اسىرۋ ارقىلى حالىقتى ونكولوگيالىق سكرينينگپەن قامتۋدى قاناتقاقتى ايماقتاردا 50-دەن 70 پايىزعا دەيىن ارتپاق.
«الماتى وبلىسى – حالىق سانى مەن اۋدانى بويىنشا قازاقستاننىڭ ءىرى وڭىرلەرىنىڭ ءبىرى. وبلىستا 1,5 ميلليوننان استام ادام تۇرادى, ونىڭ 1,3 ميلليوننان استامى – اۋىل تۇرعىندارى. جوعارى تەحنولوگيالىق جابدىقتارمەن جابدىقتالعان ەكى جىلجىمالى مەديتسينالىق كەشەندى الۋ وبلىستىڭ شالعاي جانە جەتۋى قيىن اۋداندارىندا حالىقتى ۋاقتىلى قولجەتىمدى جانە بىلىكتى مەديتسينالىق كومەكپەن قامتاماسىز ەتۋگە ۇلەس قوساتىنى ءسوزسىز», دەگەن ءوڭىر باسشىسى مارات سۇلتانعازيەۆ جىلجىمالى مەديتسينالىق كەشەننىڭ حالىق دەنساۋلىعىن جاقسارتۋعا سەپتىگى تيەرىنە سەنىم ارتتى.
ايتا كەتەرلىگى, ءبىر عانا الماتى وبلىسىندا 10617 ونكولوگيالىق ناۋقاس ديسپانسەرلىك ەسەپتە تۇر. بيىلعى جىلدىڭ 8 ايىندا تاعى 1342 ناۋقاس تىركەلگەن.
جوبانى «قازاقستان حالقىنا» قوعامدىق قورى قازاق ونكولوگيا جانە راديولوگيا عىلىمي-زەرتتەۋ ينستيتۋتىمەن, قاناتقاقتى وبلىس اكىمدىكتەرىمەن جانە وبلىستىق ونكولوگيالىق ورتالىقتارمەن سەرىكتەستىكتە جۇزەگە اسىرادى.
كەلەسى اپتادان باستاپ جىلجىمالى مەديتسينالىق كەشەندەر وسى وبلىستىڭ شالعايداعى كەگەن, رايىمبەك, ۇيعىر اۋداندارىنا جول تارتادى.
الماتى وبلىسى
