پرەزيدەنت قاسىم-جومارت توقاەۆتىڭ باستاماسىمەن قولعا الىنىپ وتىرعان ادىلەتتى قازاقستان جوباسىنىڭ حالىققا بەرەرى مول, ماڭىزى زور. كەيىنگى جىلداردا حالىقتىڭ ءال-اۋقاتىن كوتەرۋگە باعىتتالعان باعدارلامالار: جاعدايى جوق وتباسىلارعا بەرىلەتىن قارجى كولەمىنىڭ ارتۋى, زەينەتكەرلەردىڭ زەينەتاقىسىن ۇلعايتۋ, كارانتين كەزەڭدەرىندە حالىققا تولەنگەن قارجىلاي كومەك, از قامتىلعان شاڭىراق پەن كوپبالالى وتباسىلارعا ءبىر رەتتىك كرەديتتىك امنيستيا, ستۋدەنتتەردىڭ شاكىرتاقىسى مەن ۇستازداردىڭ ايلىعىن كوبەيتۋ سەكىلدى يگى شارالار اتقارىلىپ كەلەدى. 2024 جىلدان باستاپ 18-گە تولماعان ءار ازاماتىمىزعا دەربەس شوت اشىلىپ, ونىڭ قورىنا قارجىلاي كومەك اۋدارۋ دا جوسپارلانىپ وتىر. ودان باسقا دا ۇكىمەتتىڭ قايتا جاساقتالۋى, حالىقتىڭ مۇددەسىن ويلايتىن باسشىلاردىڭ كەلۋى, جاڭاشىل دەپۋتاتتاردىڭ مىنبەرگە كوتەرىلىپ, حالىقارالىق قارىم-قاتىناستاردى وڭ باعىتتا رەتتەۋ, ەلدە بەيبىتشىلىك پەن تاتۋلىقتى ساقتاۋ ماقساتىندا حالىقارالىق كەزدەسۋلەر, كەلىسسوزدەر جۇرگىزۋ سياقتى مەملەكەت باسشىسىنىڭ تاراپىنان جۇزەگە اسىرىلىپ جاتقان ىستەر از ەمەس. ەلدەگى ەكونوميكالىق جاعدايدىڭ ارتۋى مەن ەل بولاشاعى تەك باسشىلىقتىڭ قۇزىرەتىندەگى ماسەلە ەمەس, سونىمەن قاتار بارشا حالىق بولىپ بىرلەسە اتقاراتىن شارۋالار مەن يگى ىستەردىڭ ۇلەس سالماعى مول.
مەملەكەت تاراپىنان بەرىلىپ جاتقان ءبىلىم گرانتتارى مەن باسقا دا قارجىلاي گرانتتار – ەل بولاشاعىنا جاسالعان ينۆەستيتسيا, ەلدىڭ جارقىن بولاشاعىنىڭ كەپىلى. وسى ءىس-شارالاردىڭ وڭ جولعا قويىلۋى – ادىلەتتى قازاقستان قۇرۋدىڭ باستى قادامىنىڭ ءبىرى. وسىنداي يگى ءىس-شارالارمەن قاتار, حالىقتىڭ رۋحاني دامۋى مەن ىشكى جانە سىرتقى مادەنيەتكە نازار اۋدارۋى, بىلىمگە ۇمتىلۋى – ورتاق مۇددەگە جەتۋدەگى العىشارتتاردىڭ ءبىرى. ەل الەۋەتىنىڭ كوتەرىلىپ, حالىقتىڭ جاعدايىنىڭ ارتۋى بولاشاق ءۇشىن ماڭىزدى ءرول اتقارادى. مەملەكەتىمىزدىڭ كوركەيۋىنە ۇلەسىن قوسۋ – سانالى ۇرپاق مىندەتى. ادىلەتتى قوعامنىڭ پاراساتتى ۇرپاقتىڭ قاتارىنا قوسىلۋدىڭ كۇنى الىس ەمەس ەكەنىنە شىنايى سەنەمىن.
ەڭلىك قاسابەكوۆا,
فيلوسوفيا, ساياساتتانۋ جانە ءدىنتانۋ ينستيتۋتىنىڭ اعا عىلىمي قىزمەتكەرى
