ناعىز كاسىبي وفيتسەر تۋرالى جازۋدى كوپتەن بەرى ويلاپ ءجۇر ەدىم. پولكوۆنيك داۋرەن قۋانىش ۇلىنىڭ ەسىمى شەكارا اكادەمياسىمەن قاتار ۇقو جانە شەكارا قىزمەتىندەگى اسكەري قىزمەتشىلەرگە جاقسى تانىس. شەكاراشى كۋرسانتتارعا تاربيە بەرۋدە ونەگەلى ۇلگىسى, جاڭاشىلدىق جولى, باستاماشىل ءىس-ارەكەتىمەن ابىرويلى قىزمەت اتقارىپ جۇرگەن تاجىريبەلى شەكاراشىنىڭ تىنىمسىز ەڭبەگى قانداي قۇرمەتكە دە لايىق. جانىنىڭ تازالىعى, كوڭىلىنىڭ ادالدىعى, قاراپايىم مىنەزى مەن قىزمەتتەگى بىلگىرلىگى ءۇشىن ونى ۇلگى تۇتىپ سىيلايدى, ءاردايىم بىلىكتى مامان رەتىندە قۇرمەتتەيدى.
داۋرەن قۋانىش ۇلى شەكارا اكادەمياسىندا قىزمەت ەتەدى. تاربيەلىك, الەۋمەتتىك-قۇقىقتىق جانە يدەولوگيالىق جۇمىستار باسقارماسى باستىعىنىڭ ورىنباسارى. ءتارتىپ پەن تاربيە تىزگىنىن تەڭ ۇستاعان تاربيەشى وفيتسەر. وسى وقۋ ورنىنىڭ 1998 جىلعى تۇلەگى. ول وقۋ ديۆيزيوندارى اراسىندا جانە قالاارالىق ۇيىمداستىرىلعان كتك ويىندارىنا قاتىسىپ, تالاي رەت كوپتىڭ كوڭىلىنەن شىعىپ ونەرپاز اتانعان. كەيىننەن قىزمەت اتقارا ءجۇرىپ, كۋرسانتتاردى وسى ونەرگە باۋلىپ, بىرنەشە رەت جۇلدەلى ورىندارعا قول جەتكىزىپ, رەسەيدىڭ سوچي قالاسىنا دەيىن بارىپ, كۋرسانتتاردىڭ ونەرىن پاش ەتىپ كەلگەن.
پولكوۆنيك اسكەري شەنىنە دەيىن جەتكەن شەكاراشى كەز كەلگەن ىستە تياناقتىلىقتى تالاپ ەتەدى. ءبىر نارسەنى ويىنا الدى ما, سونى اياعىنا دەيىن جەتكىزبەي تىنبايدى. بۇگىندە ونىڭ باستاماسىمەن شەكارا اكادەمياسىندا كوپتەگەن يگى ءىس جۇزەگە اسىرىلىپ كەلەدى. اتاپ ايتقاندا, اكادەميا ەمبلەماسىنىڭ ەسكيزىن جانە كادەسىي بۇيىمدارىنىڭ ديزاينىن جاساۋدى جانە ءبىتىرۋشى تۇلەكتەرگە داڭقتى قولباسشى باۋىرجان مومىش ۇلى تۋرالى جازىلعان الەكساندر بەكتىڭ «ۆولوكولامسكوە شوسسە» كىتابىن سالتاناتتى تۇردە تابىس ەتۋ ءراسىمىن داستۇرگە اينالدىردى. سونىمەن قاتار شەكاراشى وفيتسەردىڭ كەلىسسوزدەر جۇرگىزۋدەگى شەبەرلىگىنىڭ ناتيجەسىندە الماتىداعى حالىق بانكتىڭ «Freedom Life» قىزمەتكەرلەرىمەن ورتاق مامىلەگە كەلىپ, قارجىلاي قولداۋ كورسەتۋدى ۇيىمداستىرىپ, ەكى بىردەي پسيحولوگيالىق تۇزەتۋ جانە وڭالتۋ زەرتحاناسىنىڭ پايدالانۋعا بەرىلگەنىن ايتا كەتكەنىمىز ءجون.
«جاس شەكاراشى» بالالار اسكەري-پاتريوتتىق كلۋبى مەن اكادەميانىڭ ايەلدەر قاۋىمداستىعى ۇيىمىنىڭ جۇزەگە اسۋىنا دا داۋرەن قۋانىش ۇلى تىكەلەي سەبەپشى بولدى. وقۋ ورداسىنىڭ وڭ ءيميدجىن قالىپتاستىرۋ ماقساتىندا ابىرويىن اسقاقتاتىپ, بەدەلىن بيىكتەتەتىن بەينەروليكتەردى مونتاجداپ, الەۋمەتتىك جەلىلەرگە تۇراقتى تۇردە جاريالاپ تۇرۋدى ادەتكە اينالدىرعان كرەاتيۆتى وفيتسەر كەيىنگى جاستارعا جيعان تاجىريبەسىن ۇيرەتۋدەن جالىققان ەمەس. ۇجىمدا جاس وفيتسەرلەر «باسقارما ەنتسيكلوپەدياسى» دەپ اتايتىن كەيىپكەرىمىزدىڭ اقىل-كەڭەسىنە جۇگىنۋدى ۇردىسكە اينالدىرعان. ءوز كەزەگىندە ولار دا كەز كەلگەن ۋاقىتتا جولىعىپ, وي-پىكىرلەرىن ورتاعا سالىپ, ءاردايىم كوڭىلگە قونىمدى, تولىققاندى كەڭەس الىپ تۇرادى.
داۋرەن بەلگوجاەۆتىڭ تاعى ءبىر ەرەكشەلىگى – ونىڭ تۇلا بويى تولعان يدەيا. ماماندىعىن جەتە مەڭگەرگەن, جيناعان تاجىريبەسى مول تالىمگەردىڭ ۇيىمداستىرۋشىلىق قابىلەتى ەرەكشە دامىعان. مىسالى, ناۋرىز ايىندا شەكارا اكادەمياسىندا وتكەن حالىقارالىق تمد شەكارا اسكەرلەرى قولباسشىلىعى كەڭەسىنىڭ وكىلدەرىنە ۇيىمداستىرىلعان كونتسەرتتىك باعدارلاماسىن تمد شەكارا اسكەرلەرى كەڭەسىنىڭ توراعاسى, ارميا گەنەرالى ۆ.كۋليشوۆتىڭ ءوزى جوعارى باعالاپ, ماراپاتتاعان.
عاسىرعا جۋىق تاريحى بار شەكارا اكادەمياسىنىڭ توقسان جىلدىعىنا وراي وقۋ ورداسىنىڭ تىنىس-تىرشىلىگىنەن سىر شەرتەتىن قۇندى كىتاپتىڭ جارىق كورۋىنە تىكەلەي اتسالىسقان داۋرەن قۋانىش ۇلى ونداعى كەمشىلىكتەردى, جەتىسپەي تۇرعان جەرلەردى كورسەتىپ, مەرەيتويلىق كىتاپتىڭ ساپالى بولىپ شىعۋىن مىقتاپ قولعا الدى. قاشاندا ىزدەنىستە جۇرەتىن بىلىكتى وفيتسەر ۇجىمداعى ارىپتەستەرىمەن بىرگە اكادەميا اۋماعىنداعى ستەندتەر مەن باننەرلەردىڭ, وقۋ ديۆيزيوندارىنىڭ مادەني-اعارتۋ م ۇلىكتەرىن جانە «ەرلىكپەن قازا تاپقان شەكارا اكادەمياسىنىڭ تۇلەكتەرى» مەموريالدىق ەسكەرتكىش تاقتانىڭ بوي كوتەرۋىنە اتسالىستى.
اكادەميا باسىلىمى «اكادەميا: بۇگىن. ەرتەڭ. كەشە» اتتى ايلىق گازەتىنىڭ جارىق كورۋىنە قولداۋ بىلدىرگەن تاربيەشى وفيتسەر جاقىندا عانا ۇلتتىق قاۋىپسىزدىك كوميتەتى ءباسپاسوز قىزمەتىمەن كەلىسىپ, تەلەگرام-كانالدى ىسكە قوسۋعا مۇرىندىق بولدى. سونداي-اق اكادەميا تاريحىنان حاباردار ەتەتىن سۋرەتتەرمەن كومكەرىلىپ, ساپالى بەزەندىرىلگەن توقسان سايىن جارىق كورەتىن البومنىڭ شىعۋىنا باستاماشىلىق جاسادى. ارىپتەسىمىزدىڭ اتقارىپ جاتقان جۇمىسى اۋقىمدى ءارى ءار الۋان. ءبىز ماڭىزدى دەگەندەرىنە عانا توقتالىپ وتتىك.
قولىنان كەلسە جاقسىلىق جاساپ, كىشىگە – اعا, ۇلكەنگە ءىنى بولىپ جۇرەتىن جاقسى قاسيەتتەرى ۇنەمى كوز الدىمىزدا. بىرەۋلەرگە ىستەگەن جاقسىلىعىن بۇلدامايتىن اسىل قاسيەتى تاعى بار. ولاي بولسا, ءسوزى دە ءوتىمدى, قولىنان ءىس تە كەلەتىن ناعىز وفيتسەردىڭ قىزمەتىنە ساتتىلىك تىلەپ, وسى قارقىنىڭنان تايما دەگىمىز كەلەدى.
جانات جابىربەكوۆ,
ۇقك شەكارا اكادەمياسىنىڭ ءباسپاسوز حاتشىسى
