ع.مۇسىرەپوۆتىڭ مۋزەي-ۇيىندە ءسوز زەرگەرىنىڭ ءومىرى مەن شىعارماشىلىعىنىڭ ايشىقتى كەزەڭدەرىن, ايتۋلى ەڭبەكتەرىن, ۇلت ادەبيەتىنە قوسقان زور ۇلەسىن, تاعىلىمى مەن ونەگەسىن قامتيتىن «عابيت مۇسىرەپوۆ كىم؟» اتتى جاڭا كىتاپتىڭ تانىستىرىلىمى بولدى. كىتاپ اۆتورى – اقىن, عالىم, حالىقارالىق «الاش» ادەبي سىيلىعىنىڭ لاۋرەاتى ادىلعازى قايىربەكوۆ. تۋىندى «مازمۇنداما» باسپاسىنان 2000 دانا بولىپ شىقتى.
كىتاپ تانىستىرىلىمىندا قازاقستان جازۋشىلار وداعى باسقارما توراعاسىنىڭ ورىنباسارى, اقىن, عالىم باۋىرجان جاقىپ, «مازمۇنداما» باسپاسىنىڭ باس ديرەكتورى شىڭعىس مۇقان, جازۋشىنىڭ قىزى گۇلنار مۇسىرەپوۆا, م.اۋەزوۆ اتىنداعى ادەبيەت جانە ونەر ينستيتۋتىنىڭ باس عىلىمي قىزمەتكەرى, جازۋشى نۇرداۋلەت اقىش, قازاقستاننىڭ ەڭبەك سىڭىرگەن قايراتكەرى, ءانشى ەركىن شۇكىمان, اباي اتىنداعى قازۇپۋ فيلولوگيا ينستيتۋتىنىڭ وقىتۋشىسى, فيلولوگيا عىلىمدارىنىڭ كانديداتى ەرلان قاسەن, الماتى مۋزەيىنىڭ جەتەكشىسى باقبەرگەن تايشەەۆ, قوناەۆ مۋزەيىنىڭ جەتەكشىسى ەلەنا قۇباشەۆا, ع.مۇسىرەپوۆ اتىنداعى №86 مەكتەپ-گيمنازيانىڭ مۇعالىمى بوتاگوز دوسقازيەۆا, مۋزەي كەشەنىنىڭ جەتەكشىسى انار كوشەرباەۆا وي-پىكىرلەرىمەن ءبولىستى. كەش قوناقتارىنا جانە ع.مۇسىرەپوۆ اتىنداعى مەكتەپ-گيمنازيانىڭ وزات وقۋشىلارىنا «عابيت مۇسىرەپوۆ كىم؟» كىتابى سىيعا تارتىلدى.
نازگۇل التاەۆا,
الماتىداعى س.مۇقانوۆ پەن
ع.مۇسىرەپوۆتىڭ ادەبي-مەموريالدىق
مۋزەي كەشەنىنىڭ ءبولىم مەڭگەرۋشىسى
