بايراقتى باسەكەدە سارى قۇرلىقتىڭ 23 ەلىنەن 450-گە جۋىق جاس سپورتشى ازيا چەمپيونى اتاعىنا تالاسادى. ولاردىڭ قاتارىندا وزبەكستان, قىتاي تايبەيى, جاپونيا, فيليپپين, گونكونگ, وڭتۇستىك كورەيا, موڭعوليا, يران, قىرعىزستان, ءۇندىستان, ۆەتنام, تايلاند, بىرىككەن اراب امىرلىكتەرى, تاجىكستان, تۇرىكمەنستان, پالەستينا, پاكىستان, يەمەن, يراك, يوردانيا, كۋۆەيت, مالايزيا جانە قازاقستان بار.
ءتۋرنيردىڭ اشىلۋ سالتاناتىنا تۋريزم جانە سپورت ءمينيسترى ەرمەك مارجىقپاەۆ, IBA حالىقارالىق بوكس قاۋىمداستىعىنىڭ پرەزيدەنتى ۋمار كرەمليوۆ, قازاقستان بوكس فەدەراتسياسىنىڭ پرەزيدەنتى كەڭەس راقىشەۆ, ازيا بوكس قاۋىمداستىعىنىڭ باس حاتشىسى الي سالامەح قاتىستى.
«بۇل ءىس-شارا ەڭ الدىمەن تۋريزم مەن سپورت سالاسىنىڭ دامۋىنا ەرەكشە سەرپىن بەرەدى. كوپتەگەن سپورت شەبەرلەرىن وسىرگەن قازاق دالاسىندا بوكس قاشاندا باعالانعان. وزدەرىڭىزگە بەلگىلى, بىزدە وليمپيادا جانە الەم چەمپيوندارى شىققان ۇلكەن بوكس مەكتەبى بار. وسى كۇنگە دەيىن جەرلەستەرىمىز وليمپيادانىڭ 7 التىن, 7 كۇمىس, 10 قولاسىن يەلەنىپ, 3 مارتە «ۆەل باركەر» كۋبوگى اتاعىن الدى. ول بوكسشىلار دا وسىنداي كىشكەنتاي كەزىنەن باستاپ, جاسوسپىرىمدەر, جاستار اراسىنداعى جارىستارعا قاتىسقان. سوڭعى 5 جىلدا جاس سپورتشىلارىمىز الەم چەمپيوناتىندا 6 التىن, 10 كۇمىس, 11 كۇمىس الدى. بۇگىندە بوكسپەن 100 مىڭعا جۋىق بالا اينالىسادى. وسىنداي تۋرنيرلەر جاستارىمىزعا شەبەرلىكتەرىن شىڭداپ, تاجىريبە الماسۋعا كەرەمەت مۇمكىندىك بەرەدى. شىن مىقتىلار جەڭىس تۇعىرىنان كورىنسىن!», دەپ تۋريزم جانە سپورت ءمينيسترى ەرمەك مارجىقپاەۆ ءوز قۇتتىقتاۋىن ءبىلدىردى.
ايتا كەتەيىك, جارىس 3 قاراشاعا دەيىن سوزىلادى. بوكس باسەكەسىن ASBC YouTube كانالىنان تىكەلەي ەفيردە كورۋگە بولادى.
