بانك باسشىسى قىلمىستىق توپ قۇرىپ, ەلدىڭ اقشاسىن جىمقىرعان

الماتى قالالىق سوتىنان ءمالىم ەتكەندەي, 14 سوتتالۋشىعا ەلدىڭ سەنىپ تاپسىرعان مۇلكىن يەمدەنۋ, بانك اقشاسىن جىمقىرۋ جانە ءوز وكىلەتتىگىن اسىرا پايدالانۋ بويىنشا ايىپ تاعىلعان. 

سوت انىقتاعانداي, ەرجان شايكەنوۆ بانك توراعاسى بولا تۇرا 2015-2020 جىلدارى 13 ادامنان تۇراتىن قىلمىستىق توپ قۇرعان.

ونىڭ كومەگىمەن قارىز الۋشىلاردىڭ تولەۋ قابىلەتىنە قاراماستان زاڭسىز نەسيەلەر راسىمدەگەن. وسىلايشا قارجى ۇيىمىنا جالپى سوماسى 23,5 ملرد تەڭگە زالال كەلتىرگەن. پروكۋرور سوتتان شايكەنوۆتى جانە جەتى ايىپتالۋشىنى 9 جىلدان 10 جىلعا دەيىن باس بوستاندىعىنان ايىرۋدى, قالعان التاۋىن 1,5 جىلعا سوتتاۋدى سۇرادى.

سوت پروتسەسى بارىسىندا ايىپتالۋشىلار كىناسىن مويىنداعان جوق. Tengri Bank-ءتىڭ بۇرىنعى باسشىسى ەرجان شايكەنوۆ 10 جىلعا باس بوستاندىعىنان ايىرىلدى.

ءدال وسىنداي جازانى بانك توراعاسىنىڭ ەكس-ورىنباسارى باقتيار ءىلياسوۆ تا الدى. سونداي-اق سوت ولاردىڭ مۇلكىن تاركىلەپ, قارجى ۇيىمدارىندا باسشىلىق قىزمەت اتقارۋعا ءومىر بويىنا تىيىم سالدى.

«التى ادام 8 جىلعا باس بوستاندىعىنان ايىرىلدى. ۇشەۋىنە بانك اقشاسىن زاڭسىز پايدالانعانى ءۇشىن كىنالى دەپ تانىلىپ, 1 جىلدان 1 جىل 6 ايعا دەيىن جىل سايىن 100 ساعات ءماجبۇرلى جۇمىسقا تارتۋ ارقىلى باس بوستاندىعىن شەكتەۋ جازاسىنا كەسىلدى. ەكەۋى ەسكىرۋ مەرزىمىنىڭ وتۋىنە بايلانىستى قىلمىستىق جاۋاپكەرشىلىكتەن بوساتىلدى. ال, بىرەۋىنە قاتىستى ءىس قايتىس بولۋىنا بايلانىستى جابىلدى», دەپ حابارلادى سوتتان.

سوت ۇكىمى زاڭدى كۇشىنە ەنگەن جوق.