ەۋرازيالىق ەكونوميكالىق وداقتىڭ ەركىن ساۋدا تۋرالى كەلىسىمدەرى بار ەلدەردەن اكەلىنەتىن تاۋارلاردىڭ شىعۋ تەگىن قۇجاتتامالىق راستاۋدىڭ جەڭىلدەتىلگەن ءراسىمىنىڭ قولدانىلۋ مەرزىمىن ۇزارتۋ تۋرالى شەشىم قابىلداندى. بۇعان دەيىن اتالعان مۇمكىندىك ەاەو قۇقىعىندا 2023 جىلعى 31 جەلتوقسانعا دەيىن قاراستىرىلعان بولاتىن. ەندى تاعى ەكى جىلعا ۇزارتىلدى.
بيزنەس تاريفتىك پرەفەرەنتسيالاردى الۋ ءۇشىن تۇپنۇسقانىڭ ورنىنا تاۋاردىڭ شىعۋ تەگى تۋرالى سەرتيفيكاتتىڭ كوشىرمەسىن ۇسىنۋ ارقىلى تاۋارلارىنىڭ شىعۋ تەگىن راستاي الادى. دەگەنمەن بيزنەس قۇجاتتىڭ تۇپنۇسقاسىن تاپسىرۋ تالابىنان بوساتىلمايدى, تەك التى ايعا كەيىنگە قالدىرىلادى.
سونىمەن قاتار بىرقاتار قۇجاتقا: كەدەن وداعىنىڭ «شاعىن كولەمدى كەمەلەردىڭ قاۋىپسىزدىگى تۋرالى» تەحنيكالىق رەگلامەنتىنە وسى قۇجاتتىڭ تارالۋ اياسىن ناقتىلاۋ بولىگىندە جانە مەديتسينالىق قولدانۋعا ارنالعان دارىلىك زاتتاردى تىركەۋ جانە ساراپتاۋ قاعيدالارىنا وزگەرىستەر ەنگىزىلدى. سوڭعى قۇجاتتا 5 جىلدان استام ۋاقىت بۇرىن تىركەلگەن دارىلىك پرەپاراتتاردىڭ مەرزىمسىز تىركەۋ كۋالىكتەرىن بەرۋ ەرەجەسى تۇزەتىلدى.
ەەك شەشىمدەرىنە قاتىستى ناقتى اسەردى باعالاۋدى ء(ناب) جۇرگىزۋ جانە ەاەو شەڭبەرىندەگى حالىقارالىق شارتتارعا قاتىستى رەتتەۋشى اسەردى باعالاۋ جۇرگىزۋ ءتارتىبى ماقۇلدانعان. ءناب ءتيىستى شەشىم كۇشىنە ەنگەن كۇننەن باستاپ ءۇش جىل وتكەن سوڭ وتكىزىلەتىن بولادى.
ۇدەرىستىڭ ءوزى ەكى كەزەڭنەن تۇرادى:
ءبىرىنشى كەزەڭ – اعىمداعى باعالاۋ. بۇل – تاراپتاردىڭ بيزنەس-قاۋىمداستىقتار وكىلدەرىمەن جانە شارۋاشىلىق جۇرگىزۋشى سۋبەكتىلەرمەن جاريا كەڭەستەر وتكىزىپ, ولاردىڭ قورىتىندىلارىن شىعارۋى. ۋاقىت بويىنشا ءبىرىنشى كەزەڭگە 90 كۇننەن اسپايتىن مەرزىم قاراستىرىلعان: 60 كۇن – جاريا كەڭەستەر ءۇشىن, 30 كۇن – كەلىپ تۇسكەن ەسكەرتۋلەر مەن ۇسىنىستاردى جيناقتاۋ ءۇشىن.
ەكىنشى كەزەڭ – قورىتىندى باعالاۋ. بۇل ناقتى اسەردى باعالاۋ تۋرالى قورىتىندىنىڭ ءوزىن دايىنداۋ. ول ءۇشىن
30 كۇنتىزبەلىك كۇننەن ارتىق ەمەس ۋاقىت قاجەت.
سونداي-اق ەەك كەڭەسىندە كەدەندىك, تەحنيكالىق رەتتەۋ, قىزمەتتەر كورسەتۋ, اقپاراتتىق ءوزارا ءىس-قيمىل جانە باسقا سالالارداعى ەكونوميكالىق ينتەگراتسيانى دامىتۋعا باعىتتالعان بىرقاتار ماسەلە قارالدى جانە قابىلداندى.
