ەكى كۇنگە سوزىلعان فورۋمدا رەسپۋبليكانىڭ تۇكپىر-تۇكپىرىنەن 50-گە جۋىق جاس كىتاپحاناشى, قوعام, عىلىم, مادەنيەت, ءبىلىم سالالارىنىڭ وكىلدەرى باسقوستى. سالتاناتتى اشىلۋ راسىمىندە ءسوز العان مادەنيەت جانە اقپارات مينيسترلىگى, ارحيۆ, قۇجاتتاما جانە باسپا ءىسى كوميتەتى, كىتاپحانالار باسقارماسىنىڭ ساراپشىسى – دينا امانجولوۆا, «التىن قىران» قوعامدىق قورى ماركەتينگ جانە جوبالار دەپارتامەنتىنىڭ ديرەكتورى سايات جوكەن ۇلى, «داۋلەتتەن» قايىرىمدىلىق قورى ديرەكتورىنىڭ ورىنباسارى بەكزات قايرات فورۋمنىڭ ماڭىزىنا توقتالىپ, جاس كىتاپحاناشىلارعا ساتتىلىك تىلەدى.
الدىن-الا الەۋمەتتىك جەلىدە ۇيىمداستىرىلعان «جاس كىتاپحاناشى – 2023: جىل تاڭداۋى» بايقاۋىنا قاتىسقان 40 شاقتى ۇمىتكەردەن ۇزدىك دەپ تانىلعان 10 مامان كىتاپحانا ساحناسىندا ءوز جوبالارىن قورعاپ, باق سىناستى. بار ونەرلەرىن, ىسكەرلىك قابىلەتتەرىن ورتاعا سالدى. وسىدان سوڭ كىتاپحاناشىلار نازارباەۆ ۋنيۆەرسيتەتى, م.نارىكباەۆ اتىنداعى قازگۋ, ل.ن.گۋميلەۆ اتىنداعى ەۇۋ عىلىمي كىتاپحانالارىنا, ۇلتتىق اكادەميالىق كىتاپحاناعا ارنايى ەكسكۋرسيا جاساپ, سالا بويىنشا مادەني, ءبىلىم وشاقتارىندا ۇيىمداستىرىلعان پانەلدىك, فورسايت سەسسيالارعا, پراكتيكالىق سەمينارلارعا, تاجىريبەلى مامانداردىڭ شەبەرلىك, ىسكەرلىك ساعاتتارىنا قاتىستى.
فورۋمنىڭ ەكىنشى كۇنىندە قاتىسۋشىلار ۇلتتىق كىتاپحانا ديرەكتورى ع.نۇرعاليەۆانىڭ جەتەكشىلىگىمەن وتكەن «كىتاپحانا يندۋسترياسىنداعى ترەندتەر: الەۋمەتتىك جەلىنى ستراتەگيالىق قولدانۋ جانە ءتيىمدى پايدالانۋ» اتتى شەبەرلىك ساعاتقا, كاسىبي مەدياتور, بيزنەس-ترەنەرى دينارا كاراماكينانىڭ «مەدياتسيا جاستار اراسىنداعى ارازدىقتىڭ الدىن الۋ قۇرالى رەتىندە» اتتى پراكتيكالىق سەمينارعا, مودەراتور – ۆەرونيكا بالگارسكايانىڭ «ينكليۋزيا – پرينيات نەلزيا وتۆەرگنۋت» اتتى ترەنينگىنە قاتىسىپ, بىلىمدەرىن جەتىلدىردى.
كاسىبي مامانداردىڭ جەتەكشىلىگىمەن «كىتاپحاناداعى جاساندى ينتەللەكت: مۇمكىندىك الدە قاۋىپ؟» تاقىرىبىندا ديسكۋسسيالىق پانەل, «زاماناۋي كىتاپحانانىڭ كەلبەتى» فورسايت-سەسسياسى, «كىتاپحاناداعى الەمدىك اقپاراتتىق رەسۋرستار» اتتى سەمينارلار فورۋم اياسىندا جان-جاقتى تالقىلانىپ, جاس ماماندار «QUIZ» ينتەللەكتۋالدار سا-يىسىنا قاتىستى. ودان سوڭ اشىق ميكروفون ۇيىمداستىرىلىپ, جاس كىتاپحاناشىلار ءوزارا پىكىر الماستى, جاستار لابوراتورياسىنان العان اسەرلەرىمەن ءبولىستى. فورۋمدى قورىتىندىلاي كەلە, رەسپۋبليكالىق جاستار لابوراتورياسىنىڭ رەزوليۋتسياسى قابىلداندى. «جاس كىتاپحاناشى – 2023: جىل تاڭداۋى» رەسپۋبليكالىق بايقاۋىنىڭ قورىتىندىسى جاريالانىپ, جەڭىمپازدار انىقتالدى. بايقاۋ ناتيجەسى بويىنشا باس جۇلدە جانە «Dauletten» قايىرىمدىلىق قورى ۇسىنعان – دۋبايعا جولدامانى شىعىس قازاقستان وبلىستىق بالالار جانە جاسوسپىرىمدەر كىتاپحاناسىنىڭ جاس مامانى دانا بوكەنوۆا جەڭىپ الدى. ۇزدىك جوبالارىمەن ەرەكشەلەنگەن قۇلپىناي جاسارال, ايگەرىم ابدۋحاليموۆا, ۇلجان راحىمعاليەۆا جانە جادىرا جاسۇلان ارنايى جۇلدەمەن ماراپاتتالدى. ولارعا ارنايى ديپلومدار جانە جوبا دەمەۋشىسى «Altyn Qyran Foundation» قوعامدىق قورى ۇسىنعان 100 مىڭ تەڭگە سىيلىق تابىستالدى. سونداي-اق ەكى ۇمىتكەر استانا قالالىق كىتاپحانالار جۇيەسى مەن «Qalamger.kz» ادەبي پورتالى تاعايىنداعان ارنايى سىيلىقتارعا يە بولدى.
كىتاپحانا سالاسىنا كەلگەن جاستاردىڭ ماماندىققا دەگەن سۇيىسپەنشىلىگىن ارتتىرىپ, كاسىبي بىلىكتىلىگىن شىڭداۋدى ماقسات ەتكەن ءىس-شارا بيىل ەكىنشى رەت ۇيىمداستىرىلىپ وتىر.
