وسى جارىستىڭ 3-راكەتكاسى بولىپ تىركەلگەن وتانداسىمىز ءتۋرنيردىڭ جارتىلاي فينالىندا دۇنيەجۇزىلىك رەيتينگتە 127-ورىندا تۇرعان گەرمانيالىق ماكسيميليان مارتەرەرمەن شەبەرلىك بايقاستى. ەكى تەننيسشى بۇعان دەيىن كورتتا ەكى مارتە كەزدەسىپ, بىرەۋىندە بۋبليكتىڭ, ەكىنشىسىندە مارتەرەردىڭ مەرەيى ۇستەم بولعان. ال ءۇشىنشى كەزدەسۋدە جەرلەسىمىزدىڭ باعى جاندى. ءبىر جارىم ساعاتقا جالعاسقان ماتچتا ا.بۋبليك ەكى سەتتە 6:4, 6:4 ەسەبىمەن جەڭىسكە جەتىپ, ءتۋرنيردىڭ فينالدىق باسەكەسىنە جولداما الدى.
جەرلەسىمىز ءا دەگەننەن ءبىرىنشى پارتيانىڭ ءبىرىنشى گەيمىن برەيكپەن باستاپ, 2:0 ەسەبىمەن العا شىعىپ الدى. بۋبليك سول قارقىنىن سەت سوڭىنا دەيىن باسەڭدەتپەي, ەسەپتەگى باسىمدىعىن ساقتاپ قالدى – 6:4. ەكىنشى سەتتە ەسەپ 3:3 بولعان مەزەتتە بۋبليك تاعى ءبىر برەيك جاساپ, بۇل پارتيانى دا 6:4 ەسەبىمەن تۇيىندەدى. وتانداسىمىز ءتۋرنيردىڭ باس جۇلدەسىن جارتىلاي فينالدا الەمنىڭ 7-راكەتكاسى گرەكيالىق ستەفانوس تسيتسيپاستى تىزە بۇكتىرگەن فرانتسيالىق ارتيۋر فيستپەن ساراپقا سالادى. ەكى تەننيسشى بۇعان دەيىن ءبىر-بىرىمەن كەزدەسپەگەن.
