"وتىرار" تەلەارناسىنىڭ جازۋىنشا, وقيعا جاز مەزگىلىندە بولعان. زورلىق كورگەن قىزداردىڭ الدى 7 جاستا.
جابىرلەنۋشى قىزداردىڭ ءبىرىنىڭ اناسىنىڭ ايتۋىنشا, 33 جاستاعى كۇدىكتى كورشى تۇرادى ءارى اعايىنى بولىپ كەلەدى. بۇل تۋرالى جەرگىلىكتى تۇرعىن 17 قازان كۇنى تۇسكى ۋاقىتتا حاباردار بولعان. قىزىن دەرەۋ دارىگەرگە كورسەتىپ, كەيىن پوليتسياعا شاعىم تۇسىرگەن.
«اۋرۋحاناعا بارىپ, تەكسەرتتىم. الدىمەن راسىمەن سونداي جاعداي بولدى ما؟ كوز جەتكىزىپ الايىن دەدىم. ءبارى ايدان انىق كورىنىپ تۇر. تەك مەن ەمەس, بىرنەشە قىزدى زورلاعانى انىق… مەنىڭ قىزىم 7 جاستا», دەدى جابىرلەنۋشى قىزداردىڭ ءبىرىنىڭ اناسى.
تۇركىستان وبلىستىق پوليتسيا دەپارتامەنتىنىڭ باستىعى مۇرات قابدەنوۆتىڭ حابارلاۋىنشا, قازىرگى تاڭدا ەكى تۇرعىن ارىز جازعان. سوعان سايكەس سوتقا دەيىنگى تەرگەۋ امالدارى جۇرگىزىلۋدە.
«ارنايى جەدەل-تەرگەۋ توبى قۇرىلدى. قىلمىستىق كودەكستىڭ 120-بابى 4-بولىگى «زورلاۋ» بويىنشا قىلمىستىق ءىس قوزعالدى. بارلىق ءمان-جايدى انىقتاۋ ءۇشىن قاجەتتى ءىس-شارالاردىڭ بارلىعى جۇرگىزىلۋدە. جەدەل-ىزدەستىرۋ ءىس-شارالارى بارىسىندا قىلمىس جاسادى دەگەن كۇدىكپەن وتىرار اۋدانىنىڭ تۇرعىنىن ۇستاپ, بىردەن قاماۋعا الدىق. ەر ادام ءوز كىناسىن مويىندادى. قازىرگى ۋاقىتتا تەرگەۋ امالدارى جالعاسۋدا. ءتيىستى ساراپتامالاردىڭ بارلىعى تاعايىندالعان», دەپ جازدى جەلى پاراقشاسىندا پد باستىعى.
بۇل ءىستىڭ تەرگەلۋ بارىسىن ۆەدومستۆو باسشىسى ءوز باقىلاۋىنا الىپ وتىر.
تۇركىستان وبلىستىق ءبىلىم باسقارماسىنىڭ مالىمەتىنشە, كۇدىككە ىلىنگەن ەر ادام جەكەمەنشىك بالاباقشادا جۇمىس ىستەپ كەلگەن. وسى جايتتان كەيىن وعان قاتىستى اكت ءتۇزىلىپ, جۇمىستان شىعارىلىپتى.
«قىزدىڭ اناسى وتىرار اۋداندىق پوليتسيا بولىمىنە ارىزدانعان. ءبىلىم سالاسىنىڭ وكىلدەرى مەن پسيحولوگ ماماندار تىكەلەي جۇمىس جۇرگىزىلۋدە. وقيعا جازعى كانيكۋل كەزىندە بولعان. بۇگىن بالا قۇقىقتارى جونىندەگى وڭىرلىك ۋاكىل وقۋشى مەن اتا-اناسىنا پسيحولوگيالىق-قۇقىقتىق قولداۋ شارالارىن جۇرگىزدى. ءىس جەكە ازاماتتاردىڭ ماسەلەسى بولعاندىقتان تەرگەۋ بارىسى مەن قازىرگى تاڭداعى پروتسەسستى انىقتاۋ مۇمكىندىگى جوق ەكەنىن مالىمدەيمىز» دەلىنگەن ءبىلىم باسقارماسىنىڭ مالىمەتىندە.
