الەمدە تەحنوگەندىك اپاتتار كوبەيگەن سايىن توتەنشە جاعداي قىزمەتكەرلەرىنىڭ دە قادىرى ارتىپ بارادى. الا جازداي دالادا ءجيى تۇتاناتىن الاپات ءورت, سۋعا ءتۇسۋ كەزىندەگى جازاتايىم وقيعالار, قىستىڭ ۇسكىرىك ايازىندا جولدا قالاتىن جولاۋشىلاردى قوسساڭىز, ەلىمىزدە توتەنشە جاعداي قىزمەتكەرلەرىنە تۇسكەن سالماقتىڭ قانشالىقتى اۋىر ەكەنىن كورەسىز.
ادام ءومىرىن قۇتقارۋ مينۋتپەن ەمەس, سەكۋندپەن ولشەنگەن ساتتەردە قۇتقارۋشىنىڭ ەپتىلىگى, شيراقتىعى, جاعدايدى تەز تارازىلاي ءبىلۋى, سپورتتىق دايىندىعى, شىدامدىلىعى سىنعا تۇسەدى. توتەنشە جاعداي كەزىندە قۇتقارۋشىنىڭ قىزمەتىنە ادالدىعى مەن جەكە باسىنىڭ قاسيەتتەرى ءبىر-بىرىمەن استاسىپ جاتادى. ازاماتتىق قورعاۋ قىزمەتىنىڭ ستارشيناسى اسكەربەك قۇلباراقوۆ – وسىنداي جىگىتتەردىڭ ءبىرى. ونىڭ توتەنشە جاعداي قىزمەتىندەگى ەڭبەك ءوتىلى – 17 جىل. اسكەردەن كەيىن ەڭبەك جولىن ءورت ءسوندىرۋشى بولىپ باستاپ, سودان بەرى قانشاما قيىندىق ساتتەرگە تاپ كەلسە دە, ءوز ماماندىعىنان باس تارتقان ەمەس.
اقتوبەدە ءورت كەزىندە ءوز باسىن قاتەرگە تىگىپ, بىرنەشە ادامدى الىپ شىققان قۇتقارۋشىنىڭ ەرلىگىن اقتوبەلىكتەر جاقسى بىلەدى. 2011 جىلى اقتوبە قالاسىنىڭ ابىلقايىر كوشەسى بويىنداعى 9 قاباتتى تۇرعىن ۇيدە ءورت تۇتانىپ, ودان ءۇيدىڭ پلاستيكپەن قورشالعان قابىرعالارى جانعان كەزدە اسكەربەك جەدەلساتىمەن كوتەرىلىپ, بىردەن 9 ادامدى الىپ شىقتى. 2021 جىلى قالاداعى كوپپاتەرلى ۇيدەن شىققان تاعى ءبىر ءورت كەزىندە ول التى بالا مەن ءبىر قارت كىسىنى الىپ شىقتى.
اسكەربەك 2011 جىلى «توتەنشە جاعدايداعى ەرلىگى ءۇشىن» مەدالىمەن, 2020 جىلى «ەرلىگى ءۇشىن» مەدالىمەن ماراپاتتالدى. «ۇزدىك قورعاۋشى» اتاعىن دا يەلەندى. وتباسىندا ۇلگىلى اكە. ونىڭ ەڭبەك جولى – بالالارى مەن تۋىستارىنا ۇلگى. قولى بوس كەزىندە سپورتپەن اينالىسادى. سونىڭ ىشىندە قىسقى سپورت تۇرلەرىن ۇناتادى. اسكەربەك ءوزى باس بولىپ شايبالى حوككەي كومانداسىن ۇيىمداستىرىپ, وعان جاس جەتكىنشەكتەردى تارتىپ ونەگە كورسەتىپ ءجۇر. بەيبىت كۇننىڭ باتىرى اسكەربەك – مىنە, وسىنداي ازامات.
اقتوبە وبلىسى
