تاس ءمۇسىن مۋزەيگە 1986 جىلى تاپسىرىلعان. ول قوستاناي قالاسىنىڭ ماڭىنداعى قىزىل پارتيزان كەڭشارىنىڭ اۋماعىنان تابىلعان. ايتپاقشى, 1976 جىلى ءدال وسى توڭىرەكتەن ارحەولوگيا عىلىمىنداعى تىڭ جاڭالىقتىڭ ءبىرى سانالعان «توبىل ويشىلى» دا تابىلعان ەدى. ءمۇسىن اقشىل سارى ءتۇستى ءىرى تۇيىرشىكتى قۇمتاستان قاشاۋ جانە تەگىستەۋ تەحنيكاسىمەن جاسالعان. بيىكتىگى – 19 سانتيمەتر. عالىمدار ونى ەنەوليت داۋىرىندە جاسالعان دەپ جورامالدايدى. ياعني ءبىزدىڭ زامانىمىزعا دەيىنگى ءىىى مىڭجىلدىقتىڭ سوڭى مەن ءىى مىڭجىلدىقتىڭ باس كەزىنە سايكەس كەلەدى. ءمۇسىننىڭ بەتى سىزىلماعان, جاعى جايلاپ كەۋدەنىڭ جوعارى جاعىنا ۇلاسادى, تەك يەگى عانا العا شىعىپ تۇر. اۋزى شىعىڭقى بەدەر ەمەس, ويىلعان سىزىقپەن كورسەتىلگەن. دەنەسىنىڭ الدىڭعى بولىگى وڭدەلمەگەن جانە ەشقانداي ويىعى جوق. دوڭگەلەنگەن ارقاسى ەپتەپ وڭدەلگەن. قولى مەن اياعى بەدەرلەنىپ بەرىلگەن. ءمۇسىن ورنىقتى, بىراق تىك وستەن ءسال اۋىتقىعان.
