ول 1912 جىلى اقتوبە وبلىسىنىڭ قارابۇتاق اۋدانىندا دۇنيەگە كەلگەن. سول اۋداندا باستاۋىش مەكتەپتى ۇزدىك ءبىتىرىپ, كەيىن اقتوبە قالاسىندا ءبىلىم الىپ, العاشقى ەڭبەك جولىن قىزىلوردا وبلىسىنىڭ ارال اۋدانىنا قاراستى ۇشكول اۋىلدىق باستاۋىش مەكتەبىندە مۇعالىم بولىپ باستاعان. بۇل – 1933 جىل بولاتىن. كەيىن 1935 جىلى ءجۇسىپ اتامىز «ميلليونەر تاستۇبەك كولحوزى» اتانعان اۋىل مەكتەبىنە اۋىستىرىلادى. بالالاردىڭ ساناسىنا بىلىممەن قوسا تاربيەنى دە سىڭىرۋگە بەل شەشە كىرىسكەن جاس ۇستاز بك(ب) پارتياسى مۇشەلىگىنە وتەدى. 1938 جىلى وسى ۇجىمشار قۇرامىنداعى قارابۇلاق ەلدى مەكەنىنىڭ باستاۋىش مەكتەبىنە مەڭگەرۋشى بولىپ اۋىسادى.
ەل باسىنا كۇن تۋعاندا ءجۇسىپ اتامىز دا ارال اۋداندىق اسكەري كوميسسارياتىنىڭ شاقىرۋىمەن مايدانعا اتتانادى. الدىمەن ساراتوۆ قالاسىنداعى جوعارى اسكەري كومانديرلەر دايارلايتىن ارناۋلى ۋچيليششەدە لەيتەنانت شەنىن الىپ شىعادى دا, 79-گۆارديالىق اتقىشتار پولكىنە قاراستى 26-شىعىس ءسىبىر گۆارديا اتقىشتار ديۆيزياسىنىڭ ۆزۆود كومانديرى شەنىندە سوعىسقا ارالاسادى. ەلدى جاۋدان ازات ەتۋ جولىندا كۇش-جىگەرىن جۇمسايدى.
1944 جىلدىڭ اقپان ايىندا 26-گۆارديالىق اتقىشتار ديۆيزياسى ۆيتەبسك قالاسىن جاۋدان ازات ەتۋگە قاتىسادى. لەيتەنانت ءجۇسىپ بۇزاۋباەۆ باسقاراتىن ۆزۆودقا قالانىڭ باتىسىنداعى مالىە رۋبينى سەلوسىن باسىپ الۋعا بۇيرىق بەرىلگەن. ۆزۆود جاۋىنگەرلەرىنىڭ جانقيارلىق ەرلىگىنىڭ ارقاسىندا بۇيرىق بۇلجىتپاي ورىندالىپ, ەلدى مەكەن جاۋدان تولىق ازات ەتىلەدى. وكىنىشكە قاراي, سول شايقاستا ءبارى دە ەرلىكپەن قازا تابادى.
شىبىن جانىن وتانى ءۇشىن پيدا ەتكەن اتامىز بەلورۋستىڭ ۆيتەبسك وبلىسى گورودسكوي اۋدانى مالىە رۋبينى سەلوسىنداعى باۋىرلاستار زيراتىندا جەرلەنگەن. ول جونىندە 1944 جىلعى 31 ناۋرىزداعى بۇيرىقتىڭ كوشىرمەسىندە جازىلعان. بۇل قۇجات ارال اۋداندىق ااك-ءتىڭ №30-تىزىمىندە تىركەلگەن, ارداگەرلەر اللەياسى تىزىمىندە تۇر. 1999 جىلى شىققان «بوزداقتار» كىتابىنداعى سوعىستا قازا بولعان قىزىلوردالىقتار تۋرالى تاريحي دەرەكتەردە اتامىزدىڭ ەكىنشى دۇنيەجۇزىلىك سوعىسقا قاتىسىپ, ەرلىك كورسەتكەنى جونىندە ايتىلعان.
ءجۇسىپ اتامىزدىڭ ۇرپاقتارى اراسىندا مۇعالىمدەر دە, اسكەري سالانى تاڭداعاندار دا بولدى. ءوزىنىڭ بەل بالاسى ساعيتجان ءجۇسىپوۆ 1940 جىلى سەكسەۋىل كەنتىندە دۇنيەگە كەلگەن. ەڭبەك جولىن سەكسەۋىل ستانساسىندا ۆاگون قاراۋشى بولىپ باستايدى. بىلىكتىلىگى مەن ىزدەنىمپازدىعىنىڭ ارقاسىندا قازالى ۆاگون جوندەۋ دەپوسىنا قىزمەتكە اۋىسادى. وسى جەردە 1974 جىلعا دەيىن ەڭبەك ەتىپ, جامبىل قالاسىنداعى ۆاگون جوندەۋ دەپوسىنا اعا شەبەر, ۆاگون رەۆيزورى بولىپ, جامبىل قالالىق ءماسليحات دەپۋتاتتىعىنا سايلانىپ, قوعامدىق جۇمىس اتقارادى. 2003 جىلى ەڭبەك دەمالىسىنا شىعىپ, 2012 جىلى قايتىس بولدى.
ساعيتجان اعامىزدىڭ ارتىندا 4 ۇل, 1 قىز قالدى. ۇلدارىنىڭ ءبىرى رىسماعانبەت ءجۇسىپوۆ ۇزاق جىل اسكەري قىزمەتتە بولىپ, پودپولكوۆنيك شەنىندە زەينەتكە شىعىپ, قازىر تاراز قالاسىنداعى №24 گيمنازيادا العاشقى اسكەري دايىندىق جانە تەحنولوگيا ءپانىنىڭ مۇعالىمى. ال تاعى ءبىر ۇلى التىنبەك ءجۇسىپوۆ كوپ جىل بويى ۇلتتىق ۇلاندا باسشىلىق قىزمەت اتقارىپ, بۇگىنگى تاڭدا قۇرمەتتى زەينەتكە شىققان پولكوۆنيك. تاۋلى قاراباق سوعىسىنىڭ ارداگەرى, پروفەسسور.
ءجۇسىپ بۇزاۋباەۆتىڭ دا ەڭبەگى مەن ەرلىگى تۋعان جەرىندە ءوز دارەجەسىندە قۇرمەتتەلۋگە ءتيىس. ول سۇراپىل سوعىس جىلدارىندا جانقيارلىقپەن وتانىن قورعاعان. سوندىقتان بولاشاق ۇرپاق ءۇشىن كەۋدەسىن وققا توسىپ, باسىن بايگەگە تىككەن مايدانگەر اتامىزدى ەسكە الۋ – كەيىنگى ۇرپاقتىڭ مىندەتى. سىن ساعاتتا ەلىن قورعاعان ارداگەرلەرىمىزدى قۇرمەتتەۋ – پارىزىمىز. ەرلىگى ايان, باتىرلىعى بەلگىلى قاھارمان بوزداقتىڭ تۋعان جەرى سەكسەۋىل كەنتىنەن ءبىر مەكتەپتىڭ اتىن بەرسە, نۇر ۇستىنە نۇر بولار ەدى.
باقىتجان جولمىرزا,
سەكسەۋىل كەنتى ارداگەرلەر كەڭەسىنىڭ توراعاسى
التىنبەك ءجۇسىپوۆ,
زاپاستاعى پولكوۆنيك, مايدانگەردىڭ نەمەرەسى
