فوتو: اشىق دەرەككوز
«سىزدەرگە جولداپ تۇرعان دەپۋتاتتىق ساۋالىمدى 3 مىڭ بالانىڭ كوز جاسى, 6 مىڭ اتا-انانىڭ سوڭعى ءۇمىتى دەپ قابىلداڭىزدار. ەلىمىزدە 3 مىڭ بالا ميكروتيا جانە اترەزيا پاتولوگياسىنا شالدىققان. قاراپايىم تىلمەن ايتسام, بۇل سابيلەر قۇلاقسىز تۋعان», دەدى نارتاي سارسەنعاليەۆ.
دەپۋتاتتىڭ ايتۋىنشا, ءبىر قۇلاقسىز تۋاتىن بوبەكتەر قازاقستاندا مۇگەدەك ساناتىنا جاتقىزىلمايدى. سايكەسىنشە, ولارعا جاردەماقى مەن زەينەتاقى تولەنبەيدى. وسى تۇستا ماجىلىسمەن قازاقستاندا مۇگەدەكتىك الۋ ءۇشىن ەكى قۇلاق تا بولماۋى كەرەك ەكەنىن ايتتى.
ايتا كەتسەك, ميكروتيا جانە اترەزيا پاتولوگياسىنىڭ ەمى وتە كۇردەلى. قۇلاقتىڭ ىشىنە جاسالاتىن وتانى اقش حيرۋرگتارى جاسايدى. وتكەن جىلى ءبىر قۇلاققا جاسالاتىن وپەراتسيانىڭ قۇنى 99 000 دوللار بولعان, ال بيىل 105 200 دوللار. وعان قوسا ناۋقاس 1 اي بويى دارىگەرلەردىڭ باقىلاۋىندا بولۋ كەرەك.
«ەستىمەيتىن بالانىڭ ءۇنىن ەستىرتەيىن دەپ اتا-انالارى ۇكىمەتكە جۇگىنگەن ەدى. مىناداي رەسمي جاۋاپ الىپتى: «الەۋمەتتىك مەديتسينالىق ساقتاندىرۋ قورى» كەاق دەرەكتەرىىنە سايكەس ميكروتيا جانە اترەزيا پاتولوگياسى بار بالالار بيۋدجەت قاراجاتى ەسەبىنەن شەتەلگە ەمدەلۋگە جىبەرىلەتىن بالالار ساناتىنا جاتپايدى جانە مەديتسينالىق كومەك ساپاسىنىڭ مونيتورينگى دەپارتامەنتىنىڭ «مۇقتاج ناۋقاستار» تىزىمىنە ەنگىزىلمەيدى». سوڭعى ۇمىتتەرىن ارقالاعان اتا-انالار اقىرىندا «قازاقستان حالقىنا» قورىنا بارىپتى. بىراق قور دا قور قىلىپ قايتارىپتى. قازاقستاندا اتالعان دەرتتى ەمدەيتىن مامان جوق. قۇلاقسىز تۋعان, ەستىمەيتىن بالالاردىڭ جانايقايىن قۇلاعى بار بيلىك وكىلدەرىنىڭ ەستيتىن كەزى كەلدى عوي؟», دەپ قىنجىلدى دەپۋتات.
ماسەلەنىڭ شەشىمىن تابۋ ماقساتىندا نارتاي ارالباي ۇلى ءوز ۇسىنىستارىن دا ورتاعا سالدى.
«ميكروتيا جانە اترەزيا پاتولوگياسىنا شالدىعىپ, ءبىر قۇلاقسىز تۋعان بالالارعا دا مۇگەدەكتىكتىڭ بەرىلۋىن قامتاماسسىز ەتۋىڭىزدى سۇرايمىن. «قازاقستان حالقىنا» قورى ارقىلى اتالعان دەرتتى ەمدەۋ ءۇشىن بالالاردىڭ اقش-قا بارۋىن قامتاماسىز ەتۋ قاجەت, ءتيىستى قاراجات ءبولۋ كەرەك. شەشىمدى جەدەل قابىلداۋ شارت, سەبەبى بۇل دەرت بالالاردىڭ ەكىنشى ساۋ قۇلاعىنىڭ ەستۋ قابىلەتىن ناشارلاتىپ جىبەرەدى», دەدى دەپۋتات.
ءسوز سوڭىندا نارتاي سارسەنعاليەۆ قاۋىپتى دەرتپەن كۇرەسۋ جانە وتاندىق مەديتسينا ساپاسىن كوتەرۋ ماقساتىندا قازاقستاننىڭ بىلىكتى دارىگەرلەرىن اقش-قا وقۋعا جىبەرۋدى ۇسىندى.
