ۇلى دالا پاتشايىمدارىن كىلەم بەتىنە سۋرەتتەگەن گيپەررەاليست سۋرەتشى اسەل سابىرجانقىزى شىعارماشىلىقتا ءتۇرلى تەحنيكانى قولدانىپ, تاجىريبە جاساعانعا قۇمار. ونىڭ بۇعان دەيىنگى تۋىندىلارى دا قوعامنىڭ ىستىق ىقىلاسىنا بولەنگەن ەدى. اتاپ ايتساق, باۋىرجان مومىش ۇلى, باتىرحان شۇكەنوۆ, گەننادي گولوۆكين سىندى ەل ماقتانىشتارىنىڭ پورترەتتەرى ءساتتى شىققان.
اسەل كەيىنگى ۋاقىتتا گيپەررەاليزم جانرىندا شەبەرلىگىن شىڭداپ كەلەدى. گيپەررەاليزم – نىساندى فوتورەاليزاتسياعا نەگىزدەلگەن سۋرەت سالۋ مەن مۇسىندەۋدىڭ ءستيلى. سۋرەتشىنىڭ وسى باعىتتا التى قارىنداشپەن ءبىر ۋاقىتتا التى ادامنىڭ پورترەتىن سالۋى كورەرمەنىن كەزەكتى رەت ەلەڭ ەتكىزدى.
«ون جىلدان اسا كەسكىندەمە بويىنشا ءبىلىم الدىم. ماعان گيپەررەاليزم باعىتى بويىنشا سۋرەت سالۋ قاتتى ۇنايدى. ءدال وسى باعىتتى ەلىمىزدە العاشقىلاردىڭ ءبىرى بولىپ دامىتقىم كەلدى, ويتكەنى تىكەلەي وسى جانردا سۋرەت سالاتىن مامان تاپشى. سوندىقتان دا بۇل جولدا وتە ۇزاق ىزدەندىم. گيپەررەاليزم باعىتىندا كوپتەگەن سۋرەت سالا باستادىم. سودان كەيىن تاپسىرىستار دا تۇسەتىن بولدى. 2021 جىلدان باستاپ الەۋمەتتىك جەلىدە بەلسەندى تۇردە بلوگ جۇرگىزدىم. ءارتۇرلى تەحنيكامەن سۋرەت سالعانىمدى ۆيدەوعا ءتۇسىرىپ, جاريالاپ وتىردىم. ءوز بلوگىمدە ماشينانىڭ كاپوتىنا دا, قولىممەن, اياقتارىممەن دە سۋرەت سالدىم, سونىمەن قاتار 3 جانە 6 پورترەتتى ءبىر ۋاقىتتا سالىپ, ءتۇرلى تاجىريبە جاسادىم. وسىلايشا, اۋديتوريام كۇننەن-كۇنگە كوبەيىپ, ونەرگە قىزىعاتىن ادامداردىڭ سانى ارتتى», دەيدى اسەل سابىرجانقىزى.
اتالعان كورمە نەگىزىنەن دالا ايەلىنىڭ باتىل بەينەسىن كورسەتۋ ماقساتىندا ۇيىمداستىرىلعان. اسىرەسە قوعامعا بەيمالىم ايەلدەردىڭ بەينەلەرىنە ايرىقشا ءمان بەرىلگەن.
ء«توميريستى, ءاليا مولداعۇلوۆانى ءبارى بىلەدى. بىراق بىزدە ۇمىتىلعان باتىر قىزدارىمىز قانشاما؟ مىسالى, گاۋھار باتىردى, ايبيكە باتىردى, سۇيىنبيكە مەن بوپايدى كوپ ادام بىلمەيدى. مەن جاستارعا قازاقتىڭ ۇمىت بولعان باتىر قىزدارىن, تاريحىمىزداعى مىقتى ايەل وبرازدارىن كورسەتكىم كەلدى», دەيدى سۋرەتشى.
قاز-قاتار تىزىلگەن قازاق قىزدارىنىڭ بەينەسى ءبىر ساتتە-اق رۋحىڭدى وياتىپ, اتا-بابادان قالعان ىشتەگى ءبىر باتىلدىعىڭدى تىرىلتەدى. ءتىپتى تۋىندىلاردىڭ شىنايى شىققانى سونشالىق, كوزدەرىندەگى قايرات پەن جىگەر وڭمەنىڭنەن وتەدى. پورترەتتەردىڭ بارىنە ورتاق كۇش – ۇلتتىق رۋح. ۇلان-عايىر دارقان دالانىڭ بار كەڭدىگىن جيعان وبرازدار ۇلتتىڭ ۇرانى سەكىلدى جان تەربەتەدى. مۇنداي رۋحتى وياتاتىن تۋىندىلاردىڭ ەل ىشىنە تارالىپ, جاس ۇرپاقتى تاربيەلەپ جاتقانى دا ۇلكەن ولجا ەمەس پە؟ سۋرەتشىنىڭ دىتتەگەن ماقساتى دا وسى.
جەمىستى جۇمىستىڭ ارعى جاعىندا ارقاشان تىنىمسىز ەڭبەك پەن ۇزدىكسىز ىزدەنىس جاتاتىنى ايقىن. سۋرەتشىنىڭ تىڭ ءستيلى, وزىندىك قولتاڭباسى دا سونىڭ دالەلى. ول بۇعان دەيىن كوپتەگەن رەسپۋبليكالىق جانە حالىقارالىق بايقاۋلاردا جۇلدەلى بولىپ, شىڭدالىپ كەلەدى. 2012 جىلى «Ernst & Young» كومپانياسى وتكىزگەن كونكۋرسقا قاتىسىپ, ەكى كارتيناسى جۇلدەلى ءبىرىنشى جانە ەكىنشى ورىن العانى ەسىمىزدە. بۇگىندە اتالعان كارتينالار كومپانيانىڭ كەڭسەسىندە ءىلۋلى تۇر.
ءيا, اسەلدىڭ بۇگىندە اتاعى ارقادان اتىراۋعا دەيىن جايىلعان. الەۋمەتتىك جەلىنى دە وسى ماقساتتا ءتيىمدى پايدالانىپ وتىر. قازىر جاس سۋرەتشىنىڭ TikTok-تا – 320 مىڭ, Instagram-دا 113 مىڭ ادامدىق اۋديتورياسى بار. بۇل – ۇلكەن ناتيجە. ءوز تۋىندىلارىن زاماننىڭ اعىمىنا ساي كورەرمەنگە ۇسىنىپ, قوشەمەتىنە يە بولۋ دا ونەر ەمەس پە!
