الدىمەن الماتىعا كوبىنەسە قىتاي, يسپانيا, گەرمانيا, برازيليا, مولداۆيا, رەسەي ەلدەرىنەن سالەمدەمەلەر, حابارلار, باندەرولدەر مەن شاعىن پاكەتتەر كەلەتىنىن ايتا كەتەيىك.
الماتى پوشتاسى ديرەكتورىنىڭ ءوندىرىس جونىندەگى ورىنباسارى نادەجدا زابۋرينانىڭ ايتۋىنشا, 2023 جىلدىڭ 8 ايىندا مەگاپوليستە 3 ملن 900 مىڭنان اسا حات-حابار قابىلدانسا, شامامەن ونىڭ 30%-ى حالىقارالىق پوشتا ەكەن. وتكەن جىلمەن سالىستىرعاندا سالەمدەمەلەر مەن حاتتاردى جىبەرۋ 20 پايىزعا وسكەن.
الماتى قالاسىنىڭ وزىندە اپتا سايىن 2 مىڭعا جۋىق حات ءتيىستى ورىندارعا جەتكىزىلىپ جاتادى. ەڭ قىزىعى, الماتىلىقتار ءالى دە مەرزىمدى باسىلىمدارعا بەلسەندى تۇردە جازىلىپ كەلەدى. بيىلعى 8 ايدا مەگاپوليس وقىرماندارىنا 950 مىڭ مەرزىمدى باسىلىم جەتكىزىلسە, جىل سوڭىنا دەيىن بۇل سان 1,5 ملن داناعا جەتۋگە ءتيىس.
وسى ورايدا قىزمەتتەردىڭ ساپاسىن باقىلاۋ ءبولىمىنىڭ باسشىسى زۋلفيرا ايۋپوۆا جەتكىزۋ مەرزىمى بويىنشا ۇنەمى مونيتورينگ جۇرگىزىلىپ وتىراتىنىن اتادى.
«ەگەر بۇرىن الماتى تۇرعىنىنىڭ استاناعا اتتاندىرعان سالەمدەمەسى 2-3 كۇن ىشىندە بارسا, ەندى ءبىز «تۋرا سول كۇنى جەتكىزۋ» دەگەن جاڭا قىزمەت ءتۇرىن ەنگىزدىك. بۇل ءۇشىن كليەنت ساعات 12.00-گە دەيىن «قازپوشتا» بولىمشەسىنە بارۋى قاجەت», دەيدى ز.ايۋپوۆا.
ال ەندى الماتى پوشتاسىندا 30 جىلدا نە وزگەردى دەسەك, الماتى پوشتا ءۇيىنىڭ بۇگىندە 54 بولىمشەسى مەن جۇزدەگەن قىزمەتكەرى بار. پوشتاشىلار جىل سايىن ميلليونداعان حاتتاردى قابىلداپ, جىبەرەدى جانە مىڭداعان سالەمدەمەلەردى وڭدەيدى.
الماتى پوشتاسىنىڭ ديرەكتورى التىن سادىقوۆا ەلەكتروندىق ساۋدانىڭ دامۋىنا بايلانىستى سالەمدەمە جونەلتىلىمدەرىنىڭ ايتارلىقتاي وسكەنىن مالىمدەي كەلە: «2015 جىلدان باستاپ «سالەمدەمەلەر سۋپەرماركەتى» جاڭا قىزمەتى ەنگىزىلگەن ەدى. بۇل – وزىنە-ءوزى قىزمەت كورسەتۋ رەجىمىندە پوشتا جونەلتىلىمدەرىن بەرۋ بولىمشەسى. وزىنە-ءوزى قىزمەت كورسەتۋ قاعيداتى كەزەكتەردى الىپ تاستاۋعا جانە سالەمدەمەنى الۋ ۋاقىتىن قىسقارتۋعا مۇمكىندىك بەردى. قازىرگى ۋاقىتتا كليەنتتەر پوشتا جونەلتىلىمدەرى تۋرالى حابارلامانى كۇتپەسە دە بولادى. ەگەر كليەنتتىڭ تەلەفون ءنومىرى دەرەكتەر بازاسىندا تىركەلگەن بولسا, ۇيالى تەلەفونعا سمس حابارلاما كەلەدى», دەدى.
سول سياقتى 2015 جىلى «پوچتاماتتار» ەنگىزىلگەنى بەلگىلى. بۇل – ينتەرنەت-دۇكەندەر مەن كاتالوگتەردە تاپسىرىس بەرىلگەن تاۋارلاردى بەرۋگە ارنالعان اۆتوماتتاندىرىلعان تەرمينالدار. وسى ارقىلى كەم دەگەندە 8 ساعاتتىق جۇمىس رەجىمىمەن بالاما جەتكىزۋ قىزمەتى رەتىندە جاسالعان.
سونداي-اق قىزمەتتەردىڭ گيپەرماركەتىنىڭ ءرولىن اتقاراتىن كورپوراتيۆتىك ينتەرنەت پورتالى بار «post.kz» تۋرالى دا ايتا كەتكەن ءجون. ونلاين رەجىمدە پوشتا جانە قارجى قىزمەتتەرىن پايدالانۋشىلار ءۇشىن پورتالدىڭ ىڭعايلىلىعىن ارتتىرۋ جۇمىستارى ۇنەمى جۇرگىزىلەدى. بۇل جۇيە بانك كارتالارىن بايلانىستىرا وتىرىپ, جەكە تۇلعالار ءۇشىن ينتەرنەت-بانكينگتى جۇزەگە اسىرۋعا مۇمكىندىك بەرەدى. سونداي-اق بولىمشەلەردە تولەمدەردى قابىلداۋ بويىنشا تەرمينالدار ورناتىلعان.
سپيكەردىڭ ايتۋىنشا, كەيىنگى بىرنەشە جىلداعى ءۇردىس ءداستۇرلى پوشتا كولەمىنىڭ جىل سايىن ازايىپ كەلە جاتقانىن كورسەتىپ وتىر. وسىلايشا, گيبريدتى ەلەكتروندىق پوشتا (گەپ) پايدا بولدى. بۇل – پايدالانۋشىلارعا ەلەكتروندىق تۇردە جەكەلەگەن كەزەڭدەردە جىبەرىلگەن حابارلامالارمەن نەمەسە قۇجاتتارمەن الماسۋعا مۇمكىندىك بەرەتىن قىزمەت. قازىرگى تاڭدا وسى ۇدەرىسكە جاۋاپ رەتىندە گيبريدتى جونەلتۋ قىزمەتتەرى ۇسىنىلىپ وتىر.
بۇگىندە «قازپوشتا» 150-دەن اسا ەلدەن سالەم-ساۋقات قابىلداپ نەمەسە كەرى اتتاندىرىپ جاتادى. ال الماتى پوشتاسى كەيىنگى وتىز جىلدا ءداستۇرلى ەمەس قىزمەت تۇرلەرىن ەنگىزگەن. ەندىگى جەردە «قازپوشتا» كورسەتەتىن قارجىلىق قىزمەتتەر سپەكترىنە زاڭدى جانە جەكە تۇلعالارعا ەسەپ ايىرىسۋ-كاسسالىق قىزمەت كورسەتۋ, ءوز ەميسسياسىنىڭ تولەم كارتوچكالارىنا قىزمەت كورسەتۋ مەن جالاقى بەرۋ, اقشا اۋدارىمدارى, ۆاليۋتا ايىرباستاۋ, حالىقتان تولەمدەردى قابىلداۋ كىرەدى. سونداي-اق نەسيە بەرۋ, اۋە جانە تەمىرجول بيلەتتەرىن ساتۋ بويىنشا اگەنتتىك قىزمەتتەر كورسەتىلەدى. ورايى كەلىپ تۇرعاندا «قازپوشتا» 192 ەل كىرەتىن دۇنيەجۇزىلىك پوشتا وداعىنىڭ مۇشەسى ەكەنىن ايتا كەتۋگە بولادى.
الماتى
