دەپۋتاتتاردىڭ تالقىلاۋىنا سالىق كودەكسىنە ەنگىزىلەتىن تۇزەتۋلەر, سالىق جانە بيۋدجەتكە تولەنەتىن باسقا دا مىندەتتى تولەم مەن سالىق سالۋ ماسەلەلەرىنە قاتىستى زاڭ جوبالارىن ءبىرىنشى وقىلىمدا قاراۋ ۇسىنىلادى. بۇل زاڭ جوبالارىنىڭ نەگىزگى نورمالارى ەكىنشى دەڭگەيدەگى بانكتەردىڭ ۇلتتىق بانك نوتالارىنان تۇسەتىن كىرىسىن سالىقتان بوساتۋ قۇقىعىن الىپ تاستاۋعا, بالالارعا ۇلتتىق قوردىڭ تابىسىنان اۋدارىلاتىن نىسانالى جيناقتاردى سالىقتان بوساتۋعا باعىتتالعان. سونىمەن قاتار ارنايى ەكونوميكالىق جانە يندۋستريالدىق ايماقتاردىڭ قاتىسۋشىلارىنا جوبالارىنىڭ قۇنىنا قاراي سالىقتىق جەڭىلدىكتەردى بەرۋدىڭ سارالانعان ءتاسىلىن ەنگىزۋدى, جەكە تۇلعالاردىڭ بەرەشەگى ميكروقارجىلىق ۇيىمدارمەن جانە كوللەكتورلىق اگەنتتىكتەرمەن كەشىرىلگەن جاعدايدا قالىپتاسقان كىرىستەردى سالىقتان بوساتۋدى كوزدەيدى. سونداي-اق سوتتاردا مەملەكەتتىك باج تولەۋدى كەيىنگە قالدىرۋ ءتارتىبىن ەنگىزۋ مەن سالىقتىق اكىمشىلەندىرۋدى جەتىلدىرۋ ۇسىنىلعان.
جالپى وتىرىستا ءماجىلىس كوميتەتتەرى بىرقاتار راتيفيكاتسيالاناتىن زاڭ جوباسىن جۇمىسقا الادى. ولار: قىرعىز رەسپۋبليكاسىمەن اۆياتسيالىق ىزدەستىرۋ, قۇتقارۋ سالاسىنداعى ىنتىماقتاستىق جانە «قاراسۋ», «اق-تىلەك» اۆتوجول وتكىزۋ پۋنكتتەرى اۋدانىنداعى يندۋستريالىق ساۋدا-لوگيستيكالىق كەشەنىنە قاتىستى كەلىسىمدەر. ەۋرازيالىق ەكونوميكالىق وداق تۋرالى شارتقا ەلەكتروندىق نىساندا سالىقتار الۋ ءتارتىبىن ايقىنداۋ تۋرالى حاتتاما مەن ترانسفەرتتىك باعا بەلگىلەۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى زاڭ جوباسى.
