اقش-تىڭ تەحاس شتاتىنداعى روزەنبەرگ قالاسىندا ۇيىمداستىرىلعان كاسىپقوي بوكس كەشىندە جەرلەسىمىز IBF نۇسقاسى بويىنشا چەمپيوندىق بەلبەۋدىڭ يەسى گەرمانيالىق ۆينچەنتسو گۋالتەريدى (22-1-1, 7 KO) سۇلاتىپ سالىپ, ورتا سالماقتا قوس بەلبەۋدىڭ سۋ جاڭا چەمپيونى اتاندى.
وسىدان بىرەر جىل بۇرىن ەلىمىزدەگى بوكس جانكۇيەرلەرىن «ەگەر الدا-جالدا گەننادي گولوۆكين قولعابىن شەگەگە ىلسە, ونىڭ ورىن كىم باسار ەكەن؟» دەگەن سۇراق مازالاپ, وسى سۇراقتى الەۋمەتتىك جەلىلەر ارقىلى وتاندىق جانە شەتەلدىك بوكس ماماندارىنا توتەسىنەن قوياتىن. سوندا بوكس ساراپشىلارىنىڭ باسىم بولىگى ءدال سول مەزەتتە جاقسى جۇدىرىقتاسىپ, كوزگە كورىنىپ جۇرگەن بوكسشىلاردىڭ ەسىمىن اتايتىن. سول ءتىزىمنىڭ بەل ورتاسىندا جانىبەك ءالىمحان ۇلىنىڭ دا اتى-ءجونى تۇراتىن. ەندى, مىنە, جانىبەك ءوزىنىڭ كەشەگى جارقىن جەڭىسىنەن كەيىن گولوۆكيننىڭ لايىقتى ءىزباسارى ەكەنىن, مۇحيتتىڭ ارعى بەتىندە ونىڭ ورنىن جاقىن جىلدارى جوقتاتپايتىنىن دالەلدەدى. ەندى بوكس جانكۇيەرلەرى «جانىبەكتەن كەيىن كىم شىعادى, ءالىمحان ۇلىنىڭ الەۋەتىنەن كىم اسىپ تۇسەر ەكەن؟» دەگەن سۇراققا باس قاتىرادى. گولوۆكيننىڭ ورنىن كىم باسادى دەگەن سۇراق وسىمەن ءتامام!
بىلتىر تامىز ايىندا عانا اتاقتى امەريكالىق بوكسشى دەمەتريۋس اندرادە ورتا سالماقتاعى WBO نۇسقاسىنىڭ چەمپيوندىق اتاعىنان باس تارتقاننان كەيىن جانىبەك ءالىمحان ۇلى بۇل تۇجىرىمنىڭ جاڭا چەمپيونىنا اينالعان ەدى. ارادا بىرەر اي وتكەن سوڭ ول لاس-ۆەگاستاعى جارىستا دەنزەل بەنتليدى ۇپاي سانىمەن جەڭىپ, العاش رەت ءوز اتاعىن ءساتتى قورعادى. ال مامىر ايىندا قانداسىمىز 27 جاستاعى كانادالىق ستيۆەن باتلەرمەن جۇدىرىقتاسىپ, ورتا سالماق چەمپيونىنا لايىق ەكەنىن تاعى ءبىر مارتە بۇكىل الەمگە كورسەتتى. 2014 جىلدان بەرى كاسىپقوي بوكستا كانادالىق 37 كەزدەسۋ وتكىزىپ, 33 رەت جەڭىسكە جەتكەن, 26 قارسىلاسىن مەرزىمىنەن بۇرىن جەڭگەن تاجىريبەلى بوكسشى بولاتىن. سونداي-اق ول ءۇش رەت جەڭىلىپ, تاعى ءبىر باسەكەدە تەڭ تۇسكەن. ءتىپتى 2017 جىلى گەننادي گولوۆكين مەن ساۋل الۆارەس العاشقى جەكپە-جەگىن وتكىزگەن كەزدە ءدال وسى باتلەر «كانەلونىڭ» سپاررينگ-سەرىكتەسى بولعان.
وسىنداي ازۋلى قارسىلاسپەن قولعاپ تۇيىستىرگەن وتانداسىمىز كانادالىقتىڭ اتاق-داڭقىنان ەش قايمىقپاي, ستيۆەندى نەبارى ەكىنشى راۋندتا سۇلاتىپ سالعان ەدى. ءالىمحان ۇلى اۋەلى قارسىلاسىن ەكى رەت نوكداۋنعا جىبەردى. ءبىرىنشى نوكداۋننان كەيىن-اق باتلەردىڭ بەتى قايتىپ قالدى. بىراق تورەشى كانادالىققا تاعى ءبىراز جۇدىرىقتاسۋعا مۇمكىندىك بەردى. ارادا ساناۋلى سەكۋندتار وتكەندە جانىبەك اپپەركوت سوققىسىمەن قارسىلاسىن ەسەڭگىرەتىپ الدى دا, سول قولىمەن قۇلاق-شەكەدەن ۇردى. نوكاۋت!
وسى جەكپە-جەكتەن كەيىن ورتا سالماقتاعى ءبىراز بوكسشى وتانداسىمىزبەن جۇدىرىقتاسۋدان قايمىعىپ, ءتۇرلى سىلتاۋدى جەلەۋ ەتىپ, جانىبەكتەن قاشا باستادى. ءالىمحان ۇلى دا اتاعى جوق بوكسشىلارمەن جۇدىرىقتاسىپ, بوسقا ۋاقىت وتكىزىپ الۋدان ءوزىن اۋلاق ۇستايتىنىن, تەك چەمپيون بوكسشىلارمەن عانا جۇدىرىقتاسۋعا نيەتتى ەكەنىن ايتتى. ورتا سالماق چەمپيوندارى بەلدىگىن تاستاپ, وزگە سالماققا «قاشىپ» جاتقاندا, بيىل عانا IBF نۇسقاسى بويىنشا الەم چەمپيونى اتانعان گەرمانيالىق ۆينچەنتسو گۋالتەري جانىبەكپەن جۇدىرىقتاسۋعا نيەتتى ەكەنىن ءبىلدىردى. ىزدەگەنگە سۇراعان دەگەندەي, ءالىمحان ۇلى بۇل ايقاسقا قۋانا كەلىستى.
قازاقتا «وتكەلدە ات اۋىستىرمايدى» دەگەن اتالى ءسوز بولسا دا, جانىبەك تاۋەكەلگە بارىپ, وسى ايقاستىڭ الدىندا جاتتىقتىرۋشىسىن اۋىستىرىپ, بۇل كەزدەسۋگە جاڭا باپكەردىڭ قول استىندا جاتتىقتى. جەكپە-جەك الدىندا امەريكالىق جۋرناليستەردىڭ وتانداسىمىزدان نە ءۇشىن باپكەر اۋىستىردىڭىز دەگەن سۇراعىنا بىلاي جاۋاپ بەرگەن ەدى: «مەن دجەيمس «باددي» ماكگيرتتەن وزىمە كەرەك دۇنيەنىڭ ءبارىن الدىم, ماعان ەندى جاڭا نارسەلەردى ۇيرەنۋ كەرەك. سوندىقتان باپكەر اۋىستىردىم. جەكسەنبى كۇنى مەنى جاڭا قىرىمنان تانيسىزدار».
ءيا, بۇل جەكپە-جەككە جانىبەك جاقسى دايىندىقپەن كەلگەن ەدى. گونگ ءۇنى ەستىلگەن بەتتەن ءالىمحان ۇلى العا ۇمتىلىپ, باستاپقىدا دجەب سوققىلارىمەن قارسىلاسىن شارشاتۋعا تىرىستى. اراسىندا گۋالتەريگە دە ءوز ونەرىن كورسەتۋگە مۇمكىندىك بەرىپ, ءبىر بارماعىن بۇگۋلى ۇستاپ ءجۇردى. وسىدان-اق جەكپە-جەك مەرزىمىنەن بۇرىن اياقتالاتىنى بەلگىلى بولا باستادى. بەسىنشى راۋندتا جانىبەك قارسىلاسىن اۋىر سوققىسىمەن ءبىر رەت ەسەڭگىرەتكەنىمەن, گەرمانيالىق بوكسشى تەز ەسىن جيىپ الدى. بىراق التىنشى راۋندقا كەلگەندە وتانداسىمىزدىڭ بىرنەشە قايتالانعان سوققىسىنان كەيىن رينگتەگى تورەشى گۋالتەريدىڭ دەنساۋلىعىن ويلاپ, جەكپە-جەكتى مەرزىمىنەن بۇرىن اياقتاۋعا ءماجبۇر بولدى. تەحنيكالىق نوكاۋت!
وسىلايشا, جانىبەك ءالىمحان ۇلى ءبىر جىلدان ءسال اسا ۋاقىتتا ورتا سالماقتىڭ ەكى بىردەي التىن بەلدىكتى يەلەنگەن قازاق بوكسشىلارى اراسىندا ءۇشىنشى كۇرزى جۇدىرىق يەسى اتاندى. ولار كىمدەر دەسەڭىز, ءبىرىنشىسى, ارينە, گەننادي گولوۆكين, ەكىنشىسى – جەڭىل سالماقتاعى جانات جاقيانوۆ.
