Agroqogam.kz سايتىنىڭ ايتۋىنا قاراعاندا كاسىپورىن تىركەمە تەحنيكالاردى جيناۋدى قولعا الاتىن بولعان. وسى باسپانىڭ جازۋىنا قاراعاندا سولتۇستىك قازاقستان وبلىستىق كاسىپكەرلىك جانە يندۋستريالدى-يننوۆاتسيالىق دامۋ باسقارماسىنىڭ باستىعى نۇرجان سادىقوۆ بۇل كاسىپورىننىڭ جۇمىسىنان ۇلكەن ءۇمىت ەتەتىندىكتەرىن ايتقان. «Claas» تەحنيكالارىنا سايكەس ونىمدەر شىعاراتىن بۇل كاسىپورىننىڭ بولاشاعىنان ءبىز ۇلكەن ءۇمىت كۇتەمىز», دەگەن ەدى ول كوكتەمدە بەرگەن سۇحباتىندا.
بۇگىنگى تاڭدا «Reimann» جشس ءونىم شىعارۋعا قاجەتتى قۇرىلىس ورنىنىڭ نەگىزگى قۇرىلىستىق-مونتاجدىق جۇمىستارىن اياقتادى. وسىناۋ جۇمىستارعا قۇيىلعان ينۆەستيتسيا كولەمى 1,5 ملرد تەڭگەگە جەتىپ وتىر. جۋىردا وسى كاسىپورىننىڭ جۇمىس بارىسىمەن وبلىس اكىمى عاۋەز نۇرمۇحامبەتوۆ تانىستى. كاسىپورىن باسشىلىعى جىلدىڭ اياعىنا قاراي وزدەرىنىڭ ونىمدەرىن شىعاراتىنىن جەتكىزدى. ء«بىز جىلىنا 150 دانا تىركەمە تەحنيكالارىن شىعاراتىن بولامىز. كاسىپورىن تولىق قۋاتىنا ەنگەندە 150 ادامعا جۇمىس ورىندارى اشىلاتىن بولادى. بۇگىنگى تاڭعا دەيىن گەرمانيالىق ارىپتەستەرىمىزبەن ىنتىماقتاستىق كەلىسىمدەرى جاسالعان», دەدى كاسىپورىن باسشىسى ۆلاديمير كوۆشوۆ.
بۇل كاسىپورىن گەرمانيانىڭ «Claas» جانە «Horsch» كومپانيالارىمەن ىنتىماقتاستىق ورناتقان. گەرمانيا اگروشارۋاشىلىق سالاسى بيزنەسىنىڭ جارىق جۇلدىزى – «Claas» كومپانياسىنىڭ «قىزىلجار» اەا كەلۋىمەن وسىنداي قوسالقى كاسىپورىندار دا كەلىپ جاتىر. وبلىس اكىمى ولاردىڭ جۇمىسىنا قاناعاتتانعاندىق ءبىلدىرىپ, ەلىمىزدى اۋىل شارۋاشىلىعى ونىمدەرىمەن تولىق قامتاماسىز ەتۋگە ولاردىڭ ءىسى قۋاتتى كومەك بولاتىنىنا ريزاشىلىعىن ايتتى.
بۇعان دەيىن ع.نۇرمۇحامبەتوۆ «قازتەحماش» ماشينا جاساۋ زاۋىتىندا دا بولعان ەدى. بۇگىنگى تاڭدا وندا 85 ادام جۇمىس ىستەيدى, ورتاشا ەڭبەكاقى 300 مىڭ تەڭگەنىڭ كولەمىندە. شىعاراتىن ونىمدەرى ەلىمىزدىڭ بارلىق اۋماعىنا تارايدى. كاسىپورىن فينليانديالىق برەند سانالاتىن «Sampo» كومبايندارىن جينايدى. جشس-نىڭ باس ديرەكتورى اكىمگە: ء«بىز ورتا جانە ءىرى توراپتى قۇراستىرۋلارمەن اينالىسامىز. كومبايننىڭ 670 ءتۇرلى بولشەكتەرىن قابىلداپ, ولاردى دايىن ءونىم ەتىپ جينايمىز. سونىمەن بىرگە دايىن كومباينداردىڭ بەلگىلى ۋاقىتقا دەيىن توقتاۋسىز جۇرۋىنە كەپىلدىك بەرەتىن قىزمەت تە ۇيىمداستىردىق», دەدى. كاسىپورىن جىل سايىن 300 كومباينعا دەيىن قۇراستىرۋدى مەجەلەپ وتىر. بۇگىنگى تاڭدا 300 ملن تەڭگەنىڭ بولشەكتەرىن الۋعا تاپسىرىس بەرىپ قويىپتى.
قازىر پەتروپاۆلداعى دايىن ءونىم شىعاراتىن كاسىپورىنداردىڭ اراسىندا «Alageum Electric» كومپانياسى ۇزدىكتەردىڭ قاتارىنا ەنگەن. ەلىمىزدىڭ بىرنەشە قالاسىندا فيليالدارىن اشىپ, ترانسفورماتور شىعاراتىن بۇل كاسىپورىن تۋرالى «ەگەمەنگە» بۇرىن دا جازعان بولاتىنبىز. ول دا «قىزىلجار» اەا-دا شاڭىراق كوتەرگەن كاسىپورىنداردىڭ ءبىرى. قازىر كاسىپورىندا 200-گە جۋىق ادام ناپاقاسىن ايىرۋدا. ورتاشا ەڭبەكاقى 330 مىڭ تەڭگەدەن كەلەدى ەكەن. بۇلار تۋرالى وبلىس اكىمىنە كاسىپورىننىڭ ديرەكتورى ەرسۇلتان شامشيەۆ ايتىپ بەردى. كاسىپورىننىڭ تاعى ءبىر ەرەكشەلىگى – ول ءوز جۇمىسشىلارىنا ارناپ سالىپ جاتقان 100 پاتەرلىك ءۇيدىڭ قۇرىلىسىن دا اياقتاپ قالدى. قازاننىڭ سوڭعى كۇندەرىنىڭ بىرىندە ءجۇز شاقتى شاڭىراق جاڭا پاتەرلەردىڭ كىلتىن الاتىن بولادى. «ارينە, ۇيلەر تەگىن بەرىلمەيدى. ءبىز پاتەر بەرۋشى, «وتباسى بانك» جانە پاتەر ساتىپ الۋشى ءۇش جاقتى كەلىسىمشارت جاسايمىز. بىزدە بەس جىل جۇمىس ىستەگەن جۇمىسشى پاتەردىڭ جارتى اقشاسىن ءوزىنىڭ دەپوزيتىندە جيناعان بولسا قالعانىن «وتباسى بانك» ونى يپوتەكا ارقىلى نەسيەلەندىرىپ, پاتەردى ءوزىنىڭ مەنشىگىنە الاتىن بولادى», دەدى ەرسۇلتان شامشيەۆ.
سونىمەن بىرگە وبلىس اكىمى تۇرمىستىق حيميا ونىمدەرىن شىعاراتىن «رادۋگا» جشس مەن اەا تاعى ءبىر قاتىسۋشىسى «KazKran» جشس جۇمىسىمەن تانىستى. «رادۋگانىڭ» ءوندىرىس رىنوگىندا جۇرگەنىنە بىرنەشە جىلدىڭ ءجۇزى بولدى. قازىر وندا اي سايىن 100 تونناعا جۋىق سۇيىق جانە قاتتى سابىن شىعارىلادى. كۇنىنە 20 تونناداي ماكۋلاتۋرانى وڭدەپ, 20 ءتۇرلى تازا قاعاز ونىمدەرىن جاسايدى. مۇندا قازىر 80-دەي ادام جۇمىس ىستەپ, ايىنا 250 تونناداي دايىن ونىمدەر شىعارادى. فابريكا ونىمدەرىنىڭ قاتارىندا مەحانيكالىق جاشىكتەر, شكافتار, مەتالدىق جيھازدار جانە ت.ب. بار.
وبلىس اكىمى كوتەرگىش جاراقتار مەن كوپىرلىك كراندار شىعاراتىن زاۋىتتىڭ دا جۇمىسىمەن تانىستى. بۇل كاسىپورىن دا «قىزىلجار» اەا قاتىسۋشىسى. 2 ملرد تەڭگە ينۆەستيتسيا قۇيىلعان كاسىپورىننىڭ ونىمدەرى 2025 جىلدان باستاپ شىعادى, قازىر وندا جۇمىس ورىندارى دايىندالۋ ۇستىندە. قىزىلجاردىڭ ءوندىرىستىڭ قۋاتى وسىنداي قارقىنمەن دامىپ كەلەدى.
پەتروپاۆل
