اشىق دەرەككوز
ەلىمىزدىڭ ءار وڭىرىنەن كەلگەن ءبىلىم باسقارماسى مەكەمەلەرى وكىلدەرىن, عالىمدار-پەداگوگتەر, دارىگەرلەر, پسيحولوگتاردى توعىستىرعان ءىس-شاراعا الماتى قالالىق ءبىلىم باسقارماسىنىڭ ء«بىلىم بەرۋدەگى جاڭا تەحنولوگيالاردىڭ قالالىق عىلىمي-ادىستەمەلىك ورتالىعى» مەن Nestlé Kazakhstan ۇيىتقى بولدى.
كەزدەسۋ بارىسىندا «سالاۋاتتى تاماقتانۋ مەكتەبى» بىرەگەي ءبىلىم بەرۋ جوباسىنىڭ جۇمىس تاجىريبەسى تالقىلاندى. ەلىمىزدە 10 جىلدان بەرى جۇزەگە اسىرىلىپ كەلە جاتقان وسى باعدارلامانىڭ ارقاسىندا 200 مىڭنان استام بالا دۇرىس تاماقتانۋ ەرەجەلەرىن مەڭگەردى دەسەك تە بولادى. مۇنداي ناتيجەلەرگە باعدارلاما اياسىندا بالالاردى پايدالى ادەتتەرگە تاربيەلەۋدىڭ ينتەراكتيۆتى ادىستەرىن بەلسەندى تۇردە قولدانۋ ارقىلى قول جەتكىزىلدى.
باعدارلاما جالعاسىن تاباتىندىقتان, جاڭا وقۋ جىلى باستالعالى بەرى بىرنەشە جاڭا ءبىلىم بەرۋ رەسۋرستارى ىسكە قوسىلىپ وتىر. ياعني, تسيفرلى ساباقتار, فۋد-زەرتحانا, ء«بىزدىڭ داستارحان» بايقاۋى سىندى جاڭا باستامالار تاماقتانۋعا بايلانىستى ءبىلىم مەن داعدىلاردى قالىپتاستىرۋ ءۇشىن عانا ەمەس, سونداي-اق بالالاردى تاماق دايىنداي بىلۋگە ۇيرەتەدى. سونىمەن قاتار جوبا اياسىندا بالالاردىڭ ۇلتتىق اسپازدىق مادەنيەتكە دەگەن قىزىعۋشىلىعىن قالىپتاستىرۋ دا قاراستىرىلادى.
ء«بىلىم بەرۋ جۇيەسىندە وقىتۋ ساپاسىن ارتتىرۋ ماقساتىندا يننوۆاتسيالىق تەحنولوگيالار بەلسەندى ەنگىزىلىپ جاتىر. الايدا, مەكتەپ تەك زاماناۋي جانە ءتيىمدى ءبىلىم بەرۋ باعدارلامالارىن عانا ەمەس, سونىمەن قاتار تاربيەلىك, ونىڭ ىشىندە وسكەلەڭ ۇرپاقتا سالاۋاتتى تاماقتانۋ مادەنيەتىن قالىپتاستىرۋمەن بايلانىستى باعدارلامالاردى قاجەتسىنەدى. سوندىقتان مەكتەپ وقۋشىلارىنا ءوز دەنساۋلىعىنا قامقورلىق جاساۋعا مۇمكىندىك بەرەتىن «سالاۋاتتى تاماقتانۋ مەكتەبى» باعدارلاماسىنىڭ ءمانى زور», دەيدى ى.التىنسارين اتىنداعى ۇلتتىق ءبىلىم اكادەمياسىنىڭ جەتەكشى عىلىمي قىزمەتكەرى, بيولوگيا عىلىمدارىنىڭ كانديداتى بوتاگوز احمەتوۆا.
«رەسپۋبليكا پەداگوگتەرى بيىلعى وقۋ جىلىندا «سالاۋاتتى تاماقتانۋ مەكتەبىنىڭ» تسيفرلى مودۋلدەرىمەن بەلسەندى تانىسا باستادى. مۇعالىمدەر جىل سايىن پەداگوگيكالىق جۇمىستىڭ جاڭا نىساندارى مەن ادىستەرى تۋرالى بىلەتىن رەسپۋبليكالىق تامىز كەڭەسى اياسىندا ءبىز قاتىسۋشىلارعا جوبا تۋرالى ايتىپ قانا قويماي, سونداي-اق كەيبىر قۇرالدارمەن جۇمىس ىستەۋدى ۇسىندىق. ناتيجەسى تاماشا – ءبىلىم بەرۋ رەسۋرستارى پەداگوگ-پراكتيكتەردىڭ جوعارى باعاسىنا يە بولدى», دەيدى الماتى قالالىق ءبىلىم باسقارماسىنىڭ ء«بىلىم بەرۋدەگى جاڭا تەحنولوگيالاردىڭ قالالىق عىلىمي-ادىستەمەلىك ورتالىعى» ءبولىمىنىڭ باسشىسى تاتيانا ەجوۆا.
ءوز كەزەگىندە وسى باستاماعا ون جىلدان استام ۋاقىت بويى اتسالىسىپ وتىرعان Nestlé ءبىلىم بەرۋ باعدارلامالارىنىڭ جەتەكشىسى, پەداگوگيكا عىلىمدارىنىڭ كانديداتى الەكساندرا ماكەەۆا: «سالاۋاتتى تاماقتانۋ مەكتەبى» جوباسىن يننوۆاتسيالار مەن تۇراقتى دامۋ ايرىقشالايدى. ونىڭ شاعىن وقۋ كۋرسىنىڭ ءارتۇرلى باعىتتارىن بىرىكتىرەتىن جانە كوپتەگەن ءتيىمدى ءارى زاماناۋي تەحنولوگيالار ارقىلى جۇزەگە اسىرىلاتىن اۋقىمدى كەشەنگە اينالعان ون جىلدىق تاريحى – وسىنىڭ جارقىن دالەلى. بۇگىنگى تاڭدا «سالاۋاتتى تاماقتانۋ مەكتەبى» بالالاردى عانا ەمەس, اتا-انالاردى, مۇعالىمدەردى, عالىمداردى بىرىكتىرىپ وتىر», دەيدى.
سونداي-اق دوڭگەلەك ۇستەلدەن كەيىن «سالاۋاتتى تاماقتانۋ مەكتەبى» باعدارلاماسىنىڭ تابىستى جۇمىسىنا 10 جىل» اتتى رەسپۋبليكالىق كونفەرەنتسيا ءوتىپ, قاتىسۋشىلار باعدارلامانىڭ ادىستەمەلىك اسپەكتىلەرىمەن تانىسىپ, ونى ىسكە اسىرۋ بويىنشا ەگجەي-تەگجەيلى نۇسقاۋلىقتارمەن تانىستى. سونداي-اق الماتى قالاسىنداعى ءبىلىم مەكەمەلەرىنە بارىپ, اشىق ساباقتارعا قاتىستى.
كونفەرەنتسيا اياسىندا ەلىمىزدە العاش رەت وتكەن ء«بىزدىڭ داستارقان» سۋرەتتەر بايقاۋىنا قاتىسقان وقۋشىلار ماراپاتتالدى.
