مۇنى وسى ۇلكەن حالىقارالىق جيىندا قازاقستان پرەزيدەنتى قاسىم-جومارت توقاەۆتىڭ سويلەگەن سوزىنەن دە انىق اڭعاردىم. ال وسى جينالىسقا كەلەر الدىندا «Astana Hub» تەحنولوگيالار پاركىندە ماعان ەرەكشە شابىت بەرگەن ادامدارعا جولىقتىم. ولار ماعان وتە جاقسى اسەر قالدىردى. تاماشا مۇمكىندىك پەن بەرىك سەنىمدى كورگەندە جاقسىلىققا دەگەن ءۇمىتىم ۇلعايدى. ءبىز قازاقستاننىڭ دامۋىنا ۇلەس قوسقان يننوۆاتورلارمەن تانىستىق, ولاردىڭ جۇمىسىن باقىلادىق. قازاقستان تۋرالى ويلارىم وزگەرىپ, وزىمە وتە قىزىقتى تاجىريبە جيناعانداي بولدىم. بۇل ەلدىڭ الەۋەتى زور ەكەنىنە كوزىم جەتتى. ادامدارى ءبىلىمدى ءارى ەرەكشە ىنتالى ەكەن. شىنىندا دا, بۇل مەملەكەت ورتالىق ازياداعى تەحنولوگيالىق حابقا اينالۋى مۇمكىن.
التى جىل بۇرىن قازاقستاندا تسيفرلىق شەشىمدەر ەنگىزىلەتىنىن ەستىدىم. قازىر بۇل ەلدە Kaspi قولدانباسى بار, ونى بارلىعى پايدالانادى. ەستۋىمشە, مۇندا كوپ ادام قولما-قول اقشانى دا قولدانبايدى. بۇل – تسيفرلىق جەتىستىك. شىنى كەرەك, قازاقستان ءدال وسى تۇرعىدان العاندا اقش-تان الدەقايدا وزىق تۇر. مىسالى, اقش-تا «Starbucks»-قا كەلىپ, كوفەنىڭ اقشاسىن تولەۋگە قانشاما ادامنىڭ تيىن ساناپ تۇرعانىن كورەسىز. ال قازاقستانداعى مۇنداي جەتىستىكتەر ەرەكشە قۇبىلىس ءارى ول قوعامعا ۇلكەن اسەر ەتەدى.
مەن جاساندى ينتەللەكت ءومىرىمىزدى جاقسارتاتىنىنا 100 پايىز سەنىمدىمىن. سوندىقتان بارلىعى جاساندى ينتەللەكتىگە ينۆەستيتسيا سالۋى كەرەك. مىسالى, مەن بيتكويندى جاقسى كورەمىن. ويتكەنى ول ورتالىقتاندىرىلماعان. بيتكويننىڭ بولاشاعى زور. ونى دامىعان مەملەكەتتەر قۇشاق جايا قابىلدادى.
كەيىنگى ۋاقىتتا قازاقستاننان ەرەكشە ستارتاپتار شىعىپ جاتىر. بۇل – قۋانتارلىق جاعداي. ستارتاپتار ەكونوميكانى دامىتۋعا, جۇمىس ورىندارىن قۇرۋعا ءارى ءومىردى جاقسارتۋعا كومەكتەسەدى. بۇل ەلدىڭ ءدال وسىنداي كوزقاراستا بولعانى كوپكە ۇلگى.
تيم درەيپەر,
ۆەنچۋرلىق ينۆەستور, «Draper Fisher Jurvetson» كومپانياسىنىڭ تەڭ قۇرىلتايشىسى,
درەيپەر ۋنيۆەرسيتەتىنىڭ نەگىزىن قالاۋشى
