قاعبانىڭ جامىلعىسى ءار داۋىردە ءتۇرلى تۇستە بولىپتى. مۇحاممەد پايعامبار ونى اق يەمەن ماتاسىمەن جاپقان. ءبىزدىڭ قازىرگى كورىپ جۇرگەن قارا ءتۇستى جابۋ 749-1258 جىلدارى اراب حاليفاتىن بيلەگەن – ابباسيدتەردەن (مۇحاممەد پايعامباردىڭ نەمەرە اعاسى ابباس يبن ابدۋل-مۋتتاليبتەن تاراعان) باستاۋ العان.
جامىلعىنى جىلىنا ءبىر رەت يسلام كۇنتىزبەسى بويىنشا زۋل-حيدجا ايىنىڭ (قاجىلىق ايى) 9/10 كۇنى اۋىستىرىپ وتىرادى. اراپا كۇنى, ياعني قاعبادا قاجىلار بولمايتىن ۋاقىتتا ەسكى قيسۋا جاڭارتىلادى. جىلىنا ءبىر مەزگىل قاجىلىق ساپارعا بارعاندار قاعبانى كوزىمەن كورىپ, الاقاندارىمەن سيپاپ, وعان قول تيگىزىپ قانا قويماي, مۇمكىندىك بولسا, قيسۋادان تۇتامداي بولسا دا تابارىك الىپ قايتادى.
مۋزەيدىڭ اعا عىلىمي قىزمەتكەرى مەيرامگۇل شاياحمەتقىزىنىڭ ايتۋىنشا, 1892 جىلى مالىك عابدۋلليننىڭ ارعى اتالارىنىڭ بىرىنە قاسيەتتى قاعبانىڭ وسى تابارىگى بۇيىرعان. قيسۋانى اكادەميكتىڭ اكەسى عابدوللا قاريا قاستەرلەپ ۇستاپ, جايناماز رەتىندە پايدالانعان. 1995 جىلى مۋزەي اشىلعاندا باتىردىڭ ۇلى باتتال مەن نەمەرەسى ارسەن ونى مۋزەي قورىنا تاپسىرادى. قازىر قۇندى جادىگەر مۋزەيدىڭ «ۇيادان ۇشىپ قياعا سامعاعان» اتتى ەكسپوزيتسيالىق زالىنىڭ تورىنەن ورىن العان.
