فوتو: اشىق دەرەككوز
«جاساندى ينتەللەكتىنى قولدانىسقا ەنگىزۋ ادامدارعا ارنالعان جۇمىس ورىندارىنىڭ جاپپاي جويىلۋىنا الىپ كەلمەيدى. كەرىسىنشە, ادام ەڭبەگى ترانسفورماتسياعا ۇشىراپ, مۇلدەم جاڭا كاسىبي داعدىلارعا سۇرانىس پايدا بولادى. سوندىقتان قىزمەتكەرلەردى جاڭا داعدىلارعا مەكتەپتەن باستاپ باۋلۋ قاجەت. وسىعان وراي, ەڭ الدىمەن, تسيفرلىق ساۋاتتىلىق پەن ينفورماتيكانى وقىتۋ ساپاسىن ارتتىرعان ءجون. ول ءۇشىن بىلىكتى ۇستاز تاپشىلىعىن شەشۋ قاجەت», دەي كەلە پرەزيدەنت «Astana Hub» حالىقارالىق تەحنوپاركىندە ءبىلىم بەرۋ پلاتفورماسى تابىستى جۇمىس ىستەپ جاتقانىن ايتتى.
ونىڭ ايتۋىنشا, اتالعان پلاتفورما ارقىلى جوعارى وقۋ ورنىنىڭ ستۋدەنتتەرى باعدارلاما جاساۋدى ۇيرەنەدى. ۇكىمەت بارلىق ماسەلەنى پىسىقتاپ, مەكتەپ وقۋشىلارى ءۇشىن وسىنداي ونلاين پلاتفورمانى پيلوتتىق رەجيمدە ىسكە قوسۋى مۇمكىن.
«ۋنيۆەرسيتەتتەردە پاندەردى وقىتۋدىڭ مازمۇنى مەن ءادىسىن ايتارلىقتاي جاڭارتۋ قاجەت. بولاشاق مۇعالىمدەر, دارىگەرلەر, اگرونومدار, زاڭگەرلەر جانە سالالىق ماماندار جاساندى ينتەللەكت بويىنشا بازالىق ءبىلىمدى مىندەتتى تۇردە مەڭگەرۋى كەرەك. مەن جۋىرداعى جولداۋىمدا كەمىندە ءۇش بەلگىلى جوعارى وقۋ ورنى جاساندى ينتەللەكت باعىتىنا قاجەتتى كادر دايارلاۋمەن جانە زەرتتەۋلەر جۇرگىزۋمەن اينالىسۋى كەرەك دەگەن مىندەت جۇكتەدىم. نازارباەۆ ۋنيۆەرسيتەتى جانىنداعى اقىلدى جۇيەلەر جانە جاساندى ينتەللەكت ينستيتۋتىن تولىققاندى عىلىمي-زەرتتەۋ ينستيتۋتىنا اينالدىرۋ تاعى ءبىر ماڭىزدى قادام بولماق. ول ۇزدىك ماماندار مەن ساراپشىلاردىڭ ورتالىعىنا اينالىپ, ءبىرتۇتاس ەكوجۇيە قالىپتاستىرۋى كەرەك. ينستيتۋت قۇرامىنا IT يندۋسترياسىنىڭ الەمدىك جانە وتاندىق كوشباسشىلارىمەن تىعىز بايلانىستا جۇمىس ىستەيتىن عىلىمي-زەرتتەۋ جانە تاجىريبەلىك-كونسترۋكتورلىق جۇمىستار ورتالىعى كىرەدى. وسى رەتتە ينستيتۋت ازىرلەمەلەرىن كوممەرتسيالاندىرۋ جانە كەڭەيتۋ ماڭىزدى», دەدى ق.توقاەۆ.
