وبلىستىق ىشكى ساياسات باسقارماسى باستىعىنىڭ ورىنباسارى كەمەل وسپانوۆتىڭ جەتەكشىلىگىمەن وتكەن باسقوسۋعا قازاقستان مەن كسرو حالىق ءارتىسى جانە مەملەكەتتىك سىيلىقتارىنىڭ لاۋرەاتى, ەڭبەك ەرى ءاسانالى ءاشىموۆ, حالىق ءارتىسى تىلەكتەس مەيراموۆ, قازاقستاننىڭ ەڭبەك سىڭىرگەن قايراتكەرى سىرىم قاسقاباەۆ باستاعان ءبىر توپ ونەر مايتالمانى قاتىستى. سونىمەن قاتار ەتنوسارالىق قاتىناستار ماسەلەلەرى جونىندەگى رەسپۋبليكالىق اقپاراتتىق-ءتۇسىندىرۋ توبى, ەتنومادەني بىرلەستىكتەر وكىلدەرى, عىلىمي-شىعارماشىلىق زيالى قاۋىم, قوعامدىق, ونىڭ ىشىندە ازاماتتىق قوعام ينستيتۋتتارىنىڭ كوشباسشىلارى بولدى.
سولتۇستىك قازاقستان وبلىسى قاشاندا ءوزىنىڭ كوپمادەنيەتتى ارالۋاندىعىمەن قاتار, ەتنوستار اراسىندا قالىپتاسقان جىلى قارىم-قاتىناسىمەن ەرەكشەلەنەدى. قحا-نىڭ ەتنومادەني بىرلەستىكتەرى مەن قۇرىلىمدىق بولىمشەلەرى – ازاماتتىق قوعام مەن مەملەكەت وكىلدەرى اراسىندا بايلانىس ورناتاتىن بۋىن, ەتنوسارالىق كەلىسىم مەن بىرلىكتى نىعايتۋ سالاسىنداعى مەملەكەتتىك ساياساتتى تاراتۋشى ءرولىن اتقارادى. ولار ءوڭىردىڭ قوعامدىق ومىرىندە بەلسەندى, وبلىسىمىزدىڭ اتىنان رەسپۋبليكالىق جانە حالىقارالىق دەڭگەيدەگى ءتۇرلى ءىس-شارالارعا قاتىسادى.
قازاقستان حالقى اسسامبلەياسىنىڭ بىرەگەي باعدارلامالارىنىڭ ءبىرى – ەل حالقىنىڭ مادەنيەتىنە, تاريحىنا, داستۇرلەرىنە تەرەڭىرەك ۇڭىلۋگە باعىتتالعان «قازاقتانۋ» جوباسى. سولتۇستىك قازاقستان وبلىسىندا بۇل جوبا ەرەكشە تانىمال. جوبا نەگىزگى 5 باعىت بويىنشا جۇمىس ىستەيدى. ولار – «اس ءدامدى بولسىن!», «Qazaqtime», «حالىق مۇراسى», «ۇلتتىق ويىندارمەن تانىسايىق», «اسىل مۇرا». جوبا اياسىندا ناۋرىز مەيرامى قارساڭىندا ەتنومادەني بىرلەستىكتەر اراسىندا «تومپاق باۋىرساق» بايقاۋى, قازاق تىلىندە «عاجايىپتار الاڭى» ويىنى, «شەبەرلەردىڭ قالاسى» ساندىك-قولدانبالى شىعارماشىلىق جارمەڭكە-كورمەسى, ۇلتتىق ويىنداردان جارىس, جەرگىلىكتى ەمەس ۇلت وكىلدەرى اراسىندا «ونەرىمىز ساعان, قازاقستان!» فەستيۆالى وتكىزىلەدى. بيىل «قازاقتانۋ» جوباسىن ىسكە اسىرۋدىڭ ءبىر مىسالى شاكارىمنىڭ مەرەيتويىنا ارنالعان بەينەروليكتەر بايقاۋ-چەللەندجى بولدى.
باسقوسۋ كەزىندە ءاسانالى ءاشىموۆ, تىلەكتەس مەيراموۆ قوعامدىق كەلىسىمگە قاتىستى وي-پىكىرلەرىن ورتاعا سالدى. ونەر مايتالماندارى ءتۇرلى ەتنوستاردىڭ ءوزارا بەرىك دوستىعىن ورناتۋدا, ساقتاۋدا ونەردىڭ الاتىن ورنى زور ەكەنىن جەتكىزدى. وزدەرىنىڭ ورىس جانە باسقا ۇلتتار اراسىنداعى دوستارىنان كورگەن قولداۋلارىن, ولارعا وزدەرىنىڭ دە قولدان كەلگەنشە جاساعان كومەكتەرى تۋرالى قىزىقتى اڭگىمەلەرىن ايتتى.
جيىندا ع.مۇسىرەپوۆ اۋدانىنىڭ « ۇلىتاۋ» ەتنومادەني ورتالىعى توراعاسىنىڭ ورىنباسارى نيكولاي ۆەربوۆسكي, م.قوزىباەۆ اتىنداعى سولتۇستىك قازاقستان ۋنيۆەرسيتەتى «قازاقستان حالقى اسسامبلەياسى» كافەدراسىنىڭ مەڭگەرۋشىسى ليۋدميلا گريۆەننايا جوباعا قاتىستى باياندامالارىمەن تانىستىردى. جيىندا موڭعوليانىڭ استاناسى ۇلانباتىر قالاسىنداعى شىڭعىسحان اكادەمياسىنىڭ قۇرمەتتى اكادەميگى عيززات تابىلدين, قحا كەڭەسىنىڭ مۇشەسى, «دارىن» جاستار سىيلىعىنىڭ لاۋرەاتى تيمۋر جۇمىرباەۆ تاعى دا باسقا قاتىسۋشىلار سويلەدى. جاستارمەن قالاي جۇمىس ىستەۋ قاجەت, اسسامبلەيانىڭ وسى زامانعى بەينەسىن قالاي جاسايمىز دەگەن سۇراقتار توڭىرەگىندە كوزقاراسىمەن بولىسكەن تيمۋر جۇمىرباەۆتىڭ بايانداماسى تىڭداۋشىلاردى قىزىقتىرىپ, وعان تاقىرىپقا قاتىستى بىرنەشە سۇراق قويىلدى.
جيىنعا كەلگەن قوناقتار اقىن ماعجان جۇماباي ەسكەرتكىشىنە گۇل شوقتارىن قويىپ, وبلىستىق مۋزەيدى تاماشالادى. سونداي-اق جيىنعا قاتىسۋشىلار م.قوزىباەۆ اتىنداعى سقۋ قحا كافەدراسىنىڭ جۇمىسىمەن تانىستى.
سولتۇستىك قازاقستان وبلىسى
