«جارىسقا مايلاياق, جولداياق دەگەن ون ايلىق ەكى تازىمدى اكەلدىم. ەكەۋى دە بابىندا. ولارعا كەيدە قارساق قۋالاتامىز. مەن تاماعىن بەرىپ, ەركەلەتەمىن. ەكەۋىن دە جاقسى كورەمىن», دەيدى التى جاسار ايبارىس قىراننۇر.
وڭىردە وسىمەن ءتورتىنشى مارتە ۇيىمداستىرىلىپ وتىرعان بايقاۋدىڭ باستى ماقساتى – ۇلتتىق سالت-ءداستۇردى جاڭعىرتۋمەن قاتار, جەتى قازىنانىڭ ءبىرى سانالاتىن قازاق تازىسىنىڭ تۇقىمىن وسىرۋگە قىزىعۋشىلىقتى ارتتىرۋ, الداعى رەسپۋبليكالىق چەمپيوناتقا شىن جۇيرىكتى انىقتاۋ.
«حالقىمىز ەجەلدەن اسىل تۇقىمدى يتتەردى ايرىقشا قاستەرلەپ, تۇرمىس-تىرشىلىگىنە سەنىمدى سەرىك ەتكەن. تازىمەن اشارشىلىق جىلدارى اۋىلدى اسىراعانى تۋرالى اڭگىمەلەردى بىلەمىز. قۇماي تازى جويىلۋعا شاق قالعان ەدى, سەلەكتسيونەرلەردىڭ, سونىڭ ىشىندە الماتى وبلىسىنىڭ يت وسىرۋشىلەرىنىڭ ارقاسىندا وسى كۇنى قاتارى كوبەيدى. ناتيجەسىندە, وبلىستا قۇماي تازىلاردىڭ قاتىسۋىمەن ءتۇرلى جارىستاردى ءجيى وتكىزۋ داستۇرگە اينالدى. بۇگىن ءىرى حالىقارالىق جارىسقا ىرىكتەۋ جۇرگىزىلەدى. وعان ەلىمىزدىڭ عانا ەمەس, كورشىلەس رەسەي, قىرعىزستان, وزبەكستاننىڭ اۋەسقوي كينولوگتەرى قاتىساتىن بولادى», دەيدى الماتى وبلىستىق «ارعىماق كوكپار» فەدەراتسياسىنىڭ پرەزيدەنتى كەنجە جانبوتا.
اتالعان شىرعا تارتۋ جارىسىندا التى توپقا بولىنگەن تازىلار ءبىر شاقىرىمعا جۇگىرىپ, باق سىناستى. جارىس قورىتىندىسىندا قاراساي اۋدانىنان كەلگەن قاراقۇماي دەيتىن تازى الدىنا قارا سالماي 1-ورىندى يەلەنسە, ەكىنشى ورىندى ەڭبەكشىقازاق اۋدانىنان قاتىسقان اقتىلەك كادىرجاننىڭ سارىقۇمايى ەنشىلەدى. ءۇشىنشى ورىن نەستەر كۋردجيديدىڭ ۇشارىنا بۇيىردى.
«قاراقۇمايدى كۇشىك كەزىنەن ءوسىرىپ كەلەمىن. مۇنىڭ الدىندا دا بىرنەشە جارىسقا قاتىسىپ, جۇلدەلى ورىنداردى يەلەندى. تازى تازالىعىمەن ەرەكشەلەنەدى. كورىنگەندى جەي بەرمەيدى, وتە تالعامپاز بولادى. اتا-بابا مۇراسىن جاڭعىرتۋعا وتباسىمىزبەن اتسالىسۋدامىز», دەيدى جارىس جەڭىمپازى قاراقۇمايدىڭ يەسى ەرقانات ماناتوۆ.
الماتى وبلىسىنىڭ دەنەشىنىقتىرۋ جانە سپورت باسقارماسى, الماتى وبلىسىنىڭ بۇقارالىق سپورتتىق ءىس-شارالار ورتالىعى, وبلىستىق «ارعىماق كوكپار» فەدەراتسياسى ۇيىمداستىرعان شىرعا تارتۋ جارىسىنىڭ جەڭىمپازدارى الداعى ۋاقىتتا استانادا «اسىل قازىنا» رەسپۋبليكالىق تازى ءوسىرۋ قاۋىمداستىعى ۇيىمداستىراتىن «قازاقتىڭ تازىلارى» اتتى حالىقارالىق جارىسقا جولداما الدى.
الماتى وبلىسى
