ءىس-شارانىڭ شىمىلدىعى باتىرلاردىڭ جوڭعارلارمەن كەسكىلەسكەن ۇرىسى كورسەتىلگەن كورىنىسپەن اشىلىپ, قازاق حاندىعىنىڭ قازىعىن قاققان كەرەيدىڭ اق كيىزگە كوتەرىلۋىنە ۇلاستى. كىرەبەرىستە ورىن تەپكەن قاراۋىل مۇناراسى, جاعالاي قونعان اقشاڭقان كيىز ۇيلەر, جاستاردى تەربەتكەن التىباقان, ۇستالار مەن شەبەرلەردىڭ اۋىلى, ەجەلگى ءداۋىر جارمەڭكەسى قوناقتاردى ەلىتىپ, ەجەلگى زامانعا ەرىكسىز جەتەلەدى.
كەڭ دالادا ۇلتىمىزدىڭ باي مادەنيەتىن ۇلىقتاعان ءىس-شارانىڭ باستى ماقساتى – ۇمىتىلا باستاعان قۇندىلىقتاردى ناسيحاتتاپ, ءتول تاريحىمىزدى تارازىلاپ, ءداستۇرلى دالا مادەنيەتىن دارىپتەۋ ءارى جاس ۇرپاقتىڭ ساناسىنا بابالارىمىزدىڭ ءومىر داعدىسىن ءسىڭىرۋ. سونىمەن قاتار توي مەيماندارىنا شۋ ءوڭىرىنىڭ جاۋھارلارى مەن جەتىستىكتەرى كورسەتىلدى.
مادەني ءىس-شارا بارىسىندا الاڭدى جاعالاي جايعاسقان قولونەر شەبەرلەرىنىڭ ورداسى دا كوپشىلىك قاۋىمعا ەرەكشە اسەر سىيلادى. كەيبىرەۋلەر الاڭنىڭ ءبىر بولىگىندە وتكىزىلىپ جاتقان ات سپورتى ويىندارىن تاماشالاپ جاتسا, ەندى ءبىرى ون ساۋساعىنان ونەر تامعان شەبەرلەر مەن ۇستالاردىڭ قولونەر تۋىندىلارىن كورىپ, زور قىزىعۋشىلىقپەن قارادى. سونداي-اق قالىڭ قاۋىمنىڭ ءبىر بولىگى قاز-قاتار تىگىلگەن قازاق ۇيلەردە ۇلتتىق دامنەن اۋىز ءتيىپ, اۋداننىڭ قۇرت جاساپ, ماي شايقاپ, تارى ءتۇيىپ جاتقان قىز-كەلىنشەكتەرىنىڭ كەلەلى ىستەرىنە زەر سالدى.
اشىق اسپان استىنداعى مەرەكە اياسىندا «قارەكەت» قوعامدىق قايىرىمدىلىق قورى اتىنان اۋدانداعى ءۇش وتباسىنا سالتاناتتى تۇردە باسپانا كىلتى تابىس ەتىلدى. سونداي-اق جۋىردا ۇلكەن سىندا جەڭىس تۋىن جەلبىرەتكەن سپورت ساڭلاعى, كاسىبي بوكسشى باتىر جۇكەمباەۆقا شاپان جابىلىپ, زور قۇرمەتتىڭ بەلگىسى رەتىندە تۇلپار مىنگىزدى. ال مادەني ءىس-شارانىڭ سوڭى قازاق ەسترادا جۇلدىزدارىنىڭ قاتىسۋىمەن كونتسەرتتىك باعدارلاماعا ۇلاستى.
