1 ماۋسىم – 30 قازان ارالىعىندا رەسپۋبليكا كولەمىندە وتەتىن «قاراسورا-2023» جەدەل الدىن الۋ ءىس-شاراسى اياسىندا قىزىلوردا قالاسىنا جانە باسقا وبلىستارمەن شەكارالاس ارال جانە جاڭاقورعان اۋداندارىنا بەكەتتەر قويىلىپ, ەسىرتكى زاتىن انىقتاۋ ماقساتىندا جۇمىستار اتقارىلىپ كەلەدى. بۇل بەكەتتەردە كينولوگ ماماندار وزدەرىنە بەكىتىلگەن يتتەرمەن ەسىرتكىنىڭ زاڭسىز اينالىمىنا قاتىستى قىلمىستىق قۇقىق بۇزۋشىلىقتاردى انىقتايدى. بۇگىنگە دەيىن ەسىرتكى ىزدەۋگە قىزمەتتىك ۇيرەتىلگەن يتتەر كومەگىمەن 22 قىلمىس انىقتالىپ, اينالىمنان 26 كەلى 458,34 گرامم ماريحۋانا تاركىلەندى.
وتكەن ايدا «شىمكەنت – سامارا» تاسجولىنىڭ بويىنداعى ارال بەكەتىندە اتىراۋ وبلىسى تۇرعىنىنىڭ باسقارۋىنداعى «تويوتا-يپسۋن» اۆتوكولىگى توقتاتىلىپ, تەكسەرۋ بارىسىندا كولىك ىشىندەگى جولاۋشىلاردىڭ سومكەسىنەن 25 كەلى 187,41 گرامم كەپتىرىلمەگەن ماريحۋانا شىققان. سونىمەن قاتار 27 قىركۇيەكتە «قىزىلوردا – تۇركىستان» تاسجولىنىڭ بويىنداعى بەلكول بەكەتىندە قىزىلوردا قالاسى تۇرعىنىنىڭ باسقارۋىنداعى «شەۆرولەت كوبالت» اۆتوكولىگىن تەكسەرۋ بارىسىندا سومكەدەن ساراپتاما قورىتىندىسىنا سايكەس سالماعى 1033,45 گرامم بولاتىن ەسىرتكى تابىلدى.
اتالعان دەرەكتەر بويىنشا سوتقا دەيىنگى تەرگەپ-تەكسەرۋ ارەكەتتەرى جۇرگىزىلىپ جاتىر. جالپى, جىل باسىنان بەرى قىزمەتتىك ىزدەستىرۋ يتتەرى ارقىلى 46 قىلمىس اشىلىپ وتىر. ولار نەگىزىنەن ۇرلىق پەن ەسىرتكىنىڭ زاڭسىز اينالىمىنا قاتىستى قىلمىستار.
قىزىلوردا وبلىسى
