Kazakhstan Growth Forum شاراسىنىڭ گەنەراتيۆتى جاساندى زەردە كومەگىمەن بيزنەستى ترانسفورماتسيالاۋ تاقىرىبىنداعى پانەلدىك سەسسياسىندا وتاندىق بيزنەسمەن, AITAS حولدينگىنىڭ نەگىزىن قالاۋشى سەرىك تولىقپاەۆ اگرووندىرىستىك كەشەندە جاساندى زەردەنى جانە تسيفرلاندىرۋدى قولدانۋدىڭ ارتىقشىلىقتارى, سونداي-اق بيزنەستى باسقارۋ جۇيەسىندەگى يننوۆاتسيالىق تاسىلدەر تۋرالى كەڭىنەن اڭگىمەلەپ بەردى. سۇحبات بارىسىندا سپيكەر جاساندى زەردەنىڭ ەندىگى جەردە زاماناۋي اگرارلىق كاسىپورىنداردا كەڭىنەن قولدانىلاتىنىن اتاپ ءوتتى.
«اگروسەكتورداعى جاساندى زەردە Machine Learning (ماشينانى وقىتۋ) جانە سomputer vision (كومپيۋتەر كوزى) باعىتتارىندا جۇمىس ىستەيدى. سوڭعى ەكى جىل ىشىندە جاساندى زەردەنى وسىمدىك شارۋاشىلىعىندا بەلسەندى پايدالانىپ ءجۇرمىز. وسىنىڭ ارقاسىندا سالانىڭ تابىسى 10-15%-عا ارتتى», دەپ مالىمدەدى س.تولىقپاەۆ.
AITAS ماماندارى اگرووندىرىستىك كەشەندە IT سالاسىندا قولدانىلاتىن تسيفرلىق شەشىمدەردىڭ كوپشىلىگىن ۇتىمدى جۇزەگە اسىرۋعا بولادى دەپ بىلەدى. ماشينانى وقىتۋ شارۋالارعا ەگىن ءتۇسىمى مەن اۋا رايىن بولجاۋعا كومەكتەسەدى. كومپيۋتەر كوزى ارنايى باعدارلامالانعان درون ارقىلى پايدالى وسىمدىكتى جانە ءارامشوپتى تانۋعا, ولاردىڭ كولەمىن انىقتاۋعا جول اشادى. سونىمەن قاتار جاساندى زەردە اۋىل شارۋاشىلىعى القاپتارىندا ناقتى جەر وڭدەۋدى دامىتۋعا ۇلەس قوسا الادى. ماسەلەن, مۇنداي تەحنولوگيانىڭ كومەگىمەن حولدينگ شارۋالارى جەردىڭ قۇنارلىلىعى تۇرعىسىنان القاپتى بىرنەشە بولىككە ءبولىپ, ەگىندى سوعان ورايلاستىرىپ سالادى. ياعني قۇنارلىلىعى جوعارى ايماقتارعا وتىرعىزىلاتىن تۇقىم كولەمى جوعارىراق بولادى, بۇل ءوز كەزەگىندە بارىنشا ءتيىمدى ءونىم الۋعا سەپتىگىن تيگىزەدى.
اڭگىمە بارىسىندا س.تولىقپاەۆ IT-سالاسىنا, ستارتاپتاردى قولداۋعا جانە ۇيىم قىزمەتىن باسقارۋ جۇيەسىنە ارنالعان جاڭا تاسىلدەردى پايدالانۋعا ينۆەستيتسيا سالۋدىڭ ماڭىزدى ەكەنىن ايتىپ ءوتتى. ونىڭ پىكىرىنشە, AITAS حولدينگى ءتۇرلى يننوۆاتسياعا, جەكەلەي العاندا نارىقتاعى قۇندىلىقتار قاتىناسىنا وزگەرىس اكەلۋى مۇمكىن ايرىقشا جوبالارعا قولداۋ بىلدىرەدى.
سونداي-اق اگرووندىرىستىك ۇيىمنىڭ نەگىزىن قالاۋشى AITAS ترانسفورماتسياسى تۋرالى دا ايتىپ ءوتتى: «كومپانيا ەرەكشە ۋاقىتتى باستان وتكەرىپ جاتىر. باسقارۋ جۇيەسىن باسشىلىققا الا وتىرىپ, قازىرگى جانە بولاشاق بيزنەسىمىزدى «Run», «Change» جانە «Disrupt» اتتى ءۇش باعىتقا ءبولىپ تاستادىق. بۇلاردىڭ ارقايسىسى نازار اۋدارۋعا تۇرارلىق مودەل دەپ ويلايمىن. «Run» – بەلگىلى ءبىر قارقىنمەن دامىپ وتىرۋعا مۇمكىندىك بەرەتىن, الايدا نارىق شەكاراسىنان شىعا المايتىن بيزنەس. «Change» – نارىق الەۋەتىن ارتتىرا الاتىن وداقتارمەن, ستراتەگتەرمەن بىرلەسۋ. «Disrupt» – ستارتاپتار, جاڭا بيزنەس-مودەلدەر, بۇل باعىتتىڭ اياسىندا بۇكىل الەم بويىنشا «ديزراپت» تەحنولوگيالاردى ىزدەپ, بولاشاقتا كۇرت دامىتۋعا بولادى-اۋ دەگەن جوبالارعا قاراجاتىمىزدىڭ 10%-ىن باعىتتايمىز», دەيدى س.تولىقپاەۆ.
ايتا كەتەلىك, AITAS – قازاقستانداعى ەڭ ءىرى تسيفرلىق اگروونەركاسىپتىك حولدينگ, ونىڭ قۇرامىنا «كۋس&ۆكۋس» برەندىمەن بەلگىلى وسكەمەن جانە ورتالىق ازياداعى ەڭ ءىرى ماكينسك قۇس فابريكالارى, الماتى اسىل تۇقىمدى قۇس رەپرودۋكتورى, «AMP» برەندىمەن ەت, دەليكاتەس, شۇجىق ونىمدەرىن ءوندىرۋ, Aitas Foundation كورپوراتيۆتىك قورى سياقتى 15-تەن استام كاسىپورىن كىرەدى. حولدينگتە جەمشوپ جانە جەمشوپ كومپونەنتتەرىمەن قامتاماسىز ەتۋ ماقساتىندا شىعىس قازاقستان جانە سولتۇستىك قازاقستان وبلىستارىنداعى 35 مىڭ گەكتاردان استام اۋماقتى الىپ جاتقان بىرنەشە شارۋاشىلىق كىرەتىن Aitas Agro بيزنەس-باعىتى جۇمىس ىستەيدى.
