ۇلىتاۋ ايماعىنداعى ءتۋريزمدى دامىتۋ ماسەلەسى قارالعان جيىنعا پارلامەنت ءماجىلىسىنىڭ دەپۋتاتى, كەڭەس توراعاسىنىڭ ورىنباسارى ج.ءاشىمجان, ۇلىتاۋ وبلىسى ءماسليحاتىنىڭ توراعاسى ب.شىڭعىسوۆ, ۇلىتاۋ وبلىسى اكىمىنىڭ ورىنباسارى د.رىسپەكوۆ, كەڭەستىڭ وڭىرلىك مۇشەلەرى, زيالى قاۋىم وكىلدەرى قاتىستى.
ا.ءالتاي جيىنعا قاتىسۋشىلاردى ايماقتا ءتۋريزمدى دامىتۋدىڭ جاي-كۇيىنە قاتىستى جەتىستىكتى عانا ەمەس, كەدەرگى كەلتىرەتىن ماسەلەلەردى دە ورتاعا سالۋدى ۇسىندى. وبلىس اكىمىنىڭ ورىنباسارى د.رىسپەكوۆتىڭ بايانداماسىنان وڭىردە اۋىز تولتىرىپ ايتارلىقتاي ەشتەڭە جوقتىعى اڭعارىلدى. ىزدەنىستەر بار, بىراق ءتۇيىندى تۇستار كوپ.
ۇلت ۇياسى اتانعان ۇلىتاۋ – تاريحي-مادەني ەسكەرتكىشتەرگە وتە باي ايماق. ناقتى ايتقاندا, وبلىس اۋماعىندا مۇنداي ەسكەرتكىشتەر سانى 494 دەسەك, سونىڭ 17-ءسى رەسپۋبليكالىق ماڭىزعا يە. سونداي-اق ايماقتا 35 قاسيەتتى نىسان بار, مۇنىڭ 25-ءى جالپىۇلتتىق ماڭىزدى نىسان بولىپ سانالادى.
وبلىس اۋماعىندا ارحەولوگيالىق جۇمىستار ودان ءارى جۇرگىزىلىپ جاتىر. بۇل ماقساتتا بيىل رەسپۋبليكالىق بيۋدجەتتەن 54 ملن تەڭگە قاراجات ءبولىنىپ, لاقپاي, اقتاس, قۇجال, اقساي قورىمدارى مەن التىن وردا داۋىرىنە جاتاتىن «تالماس اتا» كەسەنەسىنىڭ ماڭايىندا قازبا جۇمىستارى ءجۇرىپ جاتىر. ارينە, الداعى ۋاقىتتا بۇل نىسانداردان تىڭ جاڭالىقتار اشىلىپ, تۋريستىك باعىتتى تولىقتىرۋى مۇمكىن.
جيىندا ءسوز الىپ, ويىن ورتاعا سالعان قوعام بەلسەندىسى ا.سۇلەيمەنوۆ, ۇلىتاۋ اۋدانىنىڭ قۇرمەتتى ازاماتى, ەڭبەك ارداگەرى ش.ۇمبەتوۆ, قولونەر شەبەرى, «بىلەۋتى» ەتنواۋىلىنىڭ جەتەكشىسى ك.ءبايدىلدينوۆ, « ۇلىتاۋ» ۇلتتىق مۋزەي-قورىعىنىڭ باسشىسى ءا.كۇزەرباەۆ, ت.ب. وڭىردە ءتۋريزمدى دامىتۋدىڭ كەشەندى جوسپارى, ناقتى جوباسى جاسالماي وتىرعانىنا قىنجىلىس ءبىلدىردى.
ءتۋريزمدى دامىتۋ ءۇشىن جارقىراعان جول, قولجەتىمدى بايلانىس, ساپالى سەرۆيس كەرەك دەسەك, وسى ۇشەۋى دە وبلىستا ءبىر جاعىنا قاراي قيسايىپ جاتىر. قوماقتى قارجىعا سالىنعان جوشىحان كەشەنىنىڭ دە كەلەشەگى ب ۇلىڭعىر تارتىپ بارادى. ويتكەنى مۇندا عىلىمي-زەرتتەۋ جۇمىستارىمەن اينالىسۋعا مۇلدەم مۇمكىندىك جوق. جيىنعا قاتىسۋشىلار ءماجىلىستىڭ قوس دەپۋتاتىنا وسىعان تىكەلەي ارالاسۋدى ۇسىنىپ, ماسەلەنى شەشۋدى تاپسىردى.
اتاعى دارداي حان ورداسىنىڭ حال-كۇيى قالاي؟ الىستان ات ارىلتىپ جەتكەن تۋريست سول جەرگە بارعاندا نە كورەدى؟ تەرەكتى اۋليە ەسكەرتكىشىنىڭ مۇلدەم قاراۋسىز جاتۋىن قالاي تۇسىنۋگە بولادى؟ قاراۋسىزدىقتىڭ سالدارىنان بۇل جەردەگى تاسقا باسىلعان سۋرەتتەر, پەتروگليفتەر جويىلىپ كەتپەي مە؟ ىشكى ءتۋريزمدى دامىتۋدىڭ ءوزى جولعا قويىلماعان. جەزقازعان – قىزىلوردا, جەزقازعان – ارقالىق كولىك جولدارىنىڭ ناشارلىعى دا ءتۋريزمدى دامىتۋعا كەدەرگى كەلتىرىپ وتىرعانى تۇسىنىكتى. بىراق تۋريستىك باعىتتاردى انىقتاپ, جول بويىندا كەمپينگتەر, سانيتارلىق-گيگيەنالىق توراپتار, قاراپايىم دارەتحانالار سالۋعا بولماي ما؟ وكىنىشكە قاراي, وبلىستا مۇنداي جۇمىستار دا ءالى قولعا الىنباعان.
كەڭەسكە قاتىسۋشىلار وسىنداي تولعاقتى ماسەلەلەردى ورتاعا سالدى. جيىن قورىتىسىندا وبلىس باسشىلىعىنا بىرقاتار ۇسىنىس جولداندى.
جەزقازعان
