قالاداعى مال بازارىندا حرومتاۋ اۋدانى بوگەتساي اۋىلدىق وكرۋگىنەن كەلگەن ءشوپتىڭ ءار باۋ 800 تەڭگەدەن ساتىلىپ جاتىر. جۇك كولىگىنە تيەلگەن 300 باۋ ءشوپتىڭ ءبارىن ساتىپ العان ادامعا ءار بۋماسىن 550 تەڭگەدەن بەرەدى. اۋدانداردا دا شابىلعان ءشوپتىڭ باعاسى ارزان ەمەس. ماسەلەن, مۇعالجار اۋدانىنىڭ ەلدى مەكەندەرىندە 250-300 كگ سالماقتاعى ءبىر وراما ءشوپ 6 مىڭ تەڭگەدەن, سالماعى 18-23 كگ بولاتىن ءبىر باۋ ءشوپ 500 تەڭگەدەن ساتىلىپ جاتىر. شىلدە-تامىز ايلارىندا وسى جاقتاعى ءشوپ ساتاتىن قوجالىقتار باۋ ءشوپتى 400 تەڭگەدەن, وراما ءشوپتى 5 مىڭ تەڭگەدەن ساتقان ەدى.
جازداعى قۋاڭشىلىقتان ىرعىز, شالقار, ايتەكە بي, حرومتاۋ اۋداندارىندا ءشوپ شىعىمى از بولدى. ونىڭ ۇستىنە جىلدان-جىلعا ءىرى قارا مەن جىلقىنىڭ باسى ءوسىپ, كەرىسىنشە دالا وسىمدىكتەرىنىڭ ءتۇرى سيرەپ, قۇنارى ازايىپ بارادى. شارۋالار الداعى ۋاقىتتا جەردى قۇنارلاندىرۋ مەن مال ازىعىن ەگۋدىڭ جاڭا تاسىلدەرىن ويلاپ تاپپاسا, ءۇي مالىنا دالانىڭ ءشوبى جەتپەي قالاتىن ءتۇرى بار. قازىر مال دالادا. قىس جايلى بولعان جىلدارى جەلتوقسان ايىنىڭ ورتاسىنا دەيىن قوي, سيىر ازىعىن اياعىمەن تابادى. ال قىس ەرتە ءتۇسىپ, مال قوراعا قامالعاندا ءشوپ باعاسى قازىرگىدەن دە قىمباتتايدى. قىسى ۇزاق, ايازى مەن بورانى كوپ ولكەدە مال قورادا بەس اي تۇرادى. ال ءبىر سيىردى قىستاتۋعا ۇنەمدەگەننىڭ وزىندە 150 باۋ ءشوپ كەرەك.
